អាមេរិក និងសហភាពអឺរ៉ុបបង្កើនទណ្ឌកម្មសេដ្ឋកិច្ចសំដៅមន្រ្តីយោធាជាន់ខ្ពស់ភូមា
កងទ័ពភូមាដែលទទួលខុសត្រូវ ធ្វើរដ្ឋប្រហារទម្លាក់រដ្ឋាភិបាលស៊ីវិលរបស់លោកស្រី អ៊ុងសាន ស៊ូជី បានរងសម្ពាធកាន់តែខ្លាំងពី សហគមន៍អន្តរជាតិ។ ប្រឈមនឹងបាតុកម្មរបស់មហាជនភូមា ក្នុងស្រុក ថ្នាក់ដឹកនាំយោធាភូមាមួយចំនួន ត្រូវជាប់ទណ្ឌកម្ម សេដ្ឋកិច្ចបន្ថែមទៀត ពីសហរដ្ឋអាមេរិក និងសហភាពអឺរ៉ុប។ ក្រុមប្រទេសមហាអំណាចឧស្សាហកម្មទាំង ៧ ដែលមានបារាំង អាមេរិក អង់គ្លេស ជប៉ុន កាណាដា អ៊ីតាលី និងអាល្លឺម៉ង់ បានចេញសេចក្តីថ្លែងការណ៍នៅថ្ងៃអង្គារនេះ ទាមទារឲ្យរបបសឹកស្តាររបបប្រជាធិបតេយ្យ និងដោះលែង លោកស្រី អ៊ុងសាន ស៊ូជី ដោយគ្មានលក្ខខណ្ឌ។
ចុះផ្សាយនៅថ្ងៃ៖
នៅក្នុងសេចក្តីថ្លែងការណ៍ រួម ចេញផ្សាយនៅថ្ងៃអង្គារនេះ រដ្ឋមន្រ្តីការបរទេសរបស់ក្រុមប្រទេសមហាអំណាចឧស្សាហកម្មG7បាននិយាយថ្កោលទោស អំពើហិង្សា របស់ប៉ូលិស ទាហានភូមា ទៅលើបាតុករ ដែលបានធ្វើបាតុកម្ម៣សប្តាហ៍មកហើយ ដើម្បី ប្រឆាំងរដ្ឋប្រហារយោធាភូមា។
សេចក្តីថ្លែងការណ៍បង្ហាញជំហររួមរបស់ក្រុមប្រទេស G7 ធ្វើឡើង នៅមួយថ្ងៃក្រោយ អាមេរិក និងសហភាពអឺរ៉ុបបានសម្រេចដាក់ទណ្ឌកម្មសេដ្ឋកិច្ចរៀងខ្លួនៗ ទៅលើអ្នកទទួលខុសត្រូវកងទ័ពភូមា ដែលបានចូលរួមធ្វើរដ្ឋប្រហារ ទម្លាក់រដ្ឋាភិបាលរបស់លោកស្រី អ៊ុងសាន ស៊ូជី កាលពីថ្ងៃទី ១កុម្ភៈ។
នៅ យប់ថ្ងៃចន្ទ ឈានចូលថ្ងៃអង្គារនេះ ក្រសួងការបរទេសអាមេរិកបានប្រកាសដាក់ទណ្ឌកម្មសេដ្ឋកិច្ចលើមន្រ្តីយោធា ជាន់ខ្ពស់២រូបបន្ថែមទៀត ដែលក្នុងនោះ មានម្នាក់ ជាមេបញ្ជាការកងទ័ពអាកាស។ ចាប់តាំងពីមានរដ្ឋប្រហារយោធានៅភូមា អាមេរិកធ្លាប់បានចាត់វិធានការដាក់ទណ្ឌកម្មសេដ្ឋកិច្ចលើមេដឹកនាំយោធា ធំៗរបស់ភូមា ចំនួន ១០ រូប ដែលនៅក្នុងនោះមានផងដែរ ឧត្តមសេនីយ៍ មីន អ៊ុងឡាំង។ ជាមួយទណ្ឌកម្មសេដ្ឋកិច្ច អាមេរិកបានបិទខ្ទប់ មិនឲ្យកងទ័ពភូមា អាចចូលប្រើប្រាស់ មូលនិធិ ប្រមាណ ១ពាន់លានដុល្លារ របស់រដ្ឋាភិបាលភូមា ដែលមានតម្កល់ទុក នៅធនាគារអាមេរិក។
នៅថ្ងៃចន្ទ ម្សិលមិញ រដ្ឋមន្រ្តីការបរទេសអាមេរិក លោកអង់តូនី ប្លីងកិន បានព្រមានថា អាមេរិកនឹងចាត់វិធានការថ្មីបន្ថែមទៀត ដើម្បី ប្រឆាំងអ្នកដែលប្រព្រឹត្តអំពើហិង្សា បង្រ្កាបប្រជាជនភូមា ដែលធ្វើបាតុកម្មដោយសន្តិភាព។
ទណ្ឌកម្មថ្មីរបស់អាមេរិក កើតឡើង នៅក្រោយ បាតុករ ៣នាក់ ស្លាប់ នៅក្នុងការបង្រ្កាបហិង្សា របស់ប៉ូលិស និងទាហានភូមា ដែលមានប្រើឧស្ម័នបង្ហូរទឹកភ្នែក គ្រាប់កាំភ្លើងកោស៊ូ ឬ គ្រាប់កាំភ្លើងពិត ដើម្បី បំបែកក្រុមបាតុករ នៅ ចុងសប្តាហ៍មុន។
នៅក្រោយការបង្រ្កាបហិង្សារបស់យោធាភូមាទៅលើបាតុករ សហភាពអឺរ៉ុប កាលពីថ្ងៃចន្ទម្សិលមិញ បានសម្រេចដាក់ ទណ្ឌកម្មសេដ្ឋកិច្ច ផងដែរ សំដៅ ប្រឆាំងផលប្រយោជន៍សេដ្ឋកិច្ច និងហិរញ្ញវត្ថុរបស់អ្នកទទួលខុសត្រូវកងទ័ពភូមា។ ជារួម សហភាពអឺរ៉ុបនឹងផ្អាករាល់ជំនួយហិរញ្ញវត្ថុដែលត្រូវប្រើសម្រាប់កម្មវិធីកំណែទម្រង់រដ្ឋាភិបាលភូមា ប៉ុន្តែ សហភាព អឺរ៉ុបនឹងមិនកាត់បន្ថយទំនាក់ទំនងពាណិជ្ជកម្មជាមួយភូមា នោះទេ ដើម្បីកុំឲ្យប៉ះពាល់ដល់ប្រាក់ចំណូលរបស់ប្រជាជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ