ពលករភូមាចូលធ្វើបាតុកម្មជាមួយសកម្មជនប្រជាធិបតេយ្យថៃ នៅបាងកក
ប៉ូលិសថៃបានប្រើឧស្ម័នបង្ហូរទឹកភ្នែក បាញ់ទឹក ដើម្បីបំបែកហ្វូងបាតុករដែលបានមកប្រមូលផ្តុំគ្នាជាថ្មី នាថ្ងៃអាទិត្យទី ២៨កុម្ភៈ២០២១នេះ នៅទីក្រុងបាងកក មុនគេហដ្ឋាននាយករដ្ឋមន្ត្រីថៃ លោក ប្រាយុទ្ធចាន់អូចា។ បាតុករដែលមានគ្នាកាន់តែច្រើនឡើងៗ និងមានទាំងពលករភូមាជាច្រើនរយនាក់ផង។
ចុះផ្សាយនៅថ្ងៃ៖
ស្តាប់ - ០២:០៩
ចលនាយុវជនអ្នកប្រជាធិបតេយ្យដែលស្រែកទាមទារឱ្យនាយករដ្ឋមន្ត្រីប្រាយុទ្ធចាន់អូចា ចុះចេញពីតំណែង ហាក់បានចុះថយឥទ្ធិពលនិងកម្លាំង បន្ទាប់ពីមានរលកចម្លងរាតត្បាតកូវីដ១៩ជាលើកទីពីរនៅប្រទេសថៃ។ ប៉ុន្តែក្រោយពីមេដឹកនាំរបស់ខ្លួនបួនរូបរងការចាប់ខ្លួន ក្នុងចំណោមការចាប់ខ្លួនសកម្មជនប្រជាធិបតេយ្យចំនួន៥៨នាក់ផ្សេងទៀត ពីបទបានចូលធ្វើបាតុកម្ម ហើយអាចនឹងត្រូវជាប់ដល់ទៅ១៥ឆ្នាំ ពីបទប្រមាថព្រះមហាក្សត្រមក ចលនាបាតុកម្មបានរើប និងរីកធំធាត់ឡើងវិញ។
នៅថ្ងៃអាទិត្យទី ២៨កុម្ភៈនេះ មានយ៉ាងហោចបាតុកប្រមាណពីរពាន់នាក់បានមកប្រមូលផ្តុំគ្នា ដើរដង្ហែក្បួននៅទីក្រុងបាងកក តាំងពីផ្លូវបំបែកជិតវិមានជ័យជំនះសំដៅមូលដ្ឋានទ័ពដែលមានគេហដ្ឋាននាយករដ្ឋមន្ត្រីប្រាយុទ្ធចាន់អូចាស្នាក់នៅ។
អ្វីជាការគួរឱ្យកត់សម្គាល់ខ្លាំង គឺក្រៅអំពីសកម្មជនប្រជាធិបតេយ្យថៃ គេសង្កេតឃើញមានពលករភូមាជាច្រើនរយនាក់ផ្សេងទៀត បានមកបំប៉ោងក្បួនបាតុកម្ម។ ពលករភូមានៅថៃចង់ឆ្លៀតឱកាសបរិហារសកម្មភាពរបស់ក្រុមយោធាដែលបានធ្វើរដ្ឋប្រហារទម្លាក់រដ្ឋាភិបាលស៊ីវិលដឹកនាំដោយលោកស្រីអ៊ុងសានស៊ូជី និងដែលនាយករដ្ឋមន្ត្រីថៃ ទើបតែទទួលជួប កាលពីថ្ងៃទី ២៤កុម្ភៈ នៅទីក្រុងបាងកក។ រដ្ឋាភិបាលយោធាភូមាដែលបាននិងកំពុងធ្វើការបង្ក្រាប និងប្រើអំពើហិង្សាកាន់តែខ្លាំងឡើងៗ លើបាតុករ រហូតបង្កឱ្យមានស្លាប់យ៉ាងហោចណាស់ ១៨នាក់ នៅថ្ងៃអាទិត្យទី ២៨កុម្ភៈ២០២១។ នេះបើតាមតួលេខផ្តល់ដោយអង្គការសហប្រជាជាតិ។
ទន្ទឹមពេលជាមួយគ្នា បាតុកម្មនៅក្នុងទីក្រុងបាងកកក៏រងការបង្ក្រាប យ៉ាងហិង្សាដែរ។ នេះជាលើកទីមួយ គិតតាំងពីប៉ុន្មានសប្តាហ៍ចុងក្រោយមកនេះ ដែលប៉ូលិសថៃបានចាប់ផ្តើមប្រើមធ្យោបាយធំ មិនប៉ះពាល់ដល់ជីវិត ដើម្បីបំបែកបាតុកម្ម។ បើតាមបាតុករជួរមុខ ប៉ូលិសថៃ បានត្រៀមលក្ខណៈគ្រប់យ៉ាង មានទាំងការបាញ់គ្រាប់បែកផ្សែងបង្ហូរទឹកភ្នែក ប្រើកាណុងបាញ់ទឹក ឬគ្រាប់លាយល្បាយគីមី ឬគ្រាប់ជ័រ ប្រើដំបងវាយហ្វូងបាតុករ។ បាតុករដែលមានពាក់អាវភ្លៀង ពាក់មួកសុវត្ថិភាព កាន់ទង់ជាតិក្រហម រុលទម្លុះរនាំងប៉ូលិស របងបន្លា បង្កឱ្យមានការប៉ះទង្គិចជាមួយប៉ូលិសខ្លាំង ហើយខ្លះ នាំគ្នាលើកដៃទទេឡើងលើ ឬម្រាមដៃបី ជានិម្មិត្តរូបនៃការតស៊ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ