ស្រីលង្កា៖ គំរោងយកកូនកោះធ្វើទីបញ្ចុះសពអ្នកស្លាប់ដោយកូវីដ១៩ ត្រូវបានអ្នកកាន់សាសនាអ៊ីស្លាមប្រឆាំង
ភាពតានតឹងរវាងរដ្ឋាភិបាលស្រីលង្កា និងសហគមអ្នកកាន់សាសនាអ៊ីស្លាមក្នុងប្រទេសនេះ បានផុសផុលឡើងជាថ្មី ដោយសារតែបញ្ហាបញ្ចុះសពអ្នកជំងឺ ដែលស្លាប់ដោយកូវីដ១៩។ រដ្ឋាភិបាលស្រីលង្កា មានគំរោង យកកូនកោះតូចមួយ ធ្វើជាទីបញ្ចុះសពអ្នកស្លាប់ដោយកូវីដ១៩ ដែលប្រការនេះ ត្រូវបានសហគមអ្នកកាន់សាសនអ៊ីស្លាមបដិសេធ ហើយចាត់ទុកថាជាការប្រមាថមាក់ងាយ មកលើជំនឿសាសនារបស់ពួកគេ។
ចុះផ្សាយនៅថ្ងៃ៖
ស្តាប់ - ០២:៤៤
ដោយខ្លាចក្រែងថាមេរោគជំងឺកូវីដ១៩ ឆ្លងចូលទៅក្នុងស្រទាប់ទឹកក្នុងដី និងឆ្លងទៅអ្នកស្រុក រដ្ឋាភិបាលស្រីលង្ការ បានសម្រេចកាលពីសប្តាហ៍មុន ថាចង់យកកូនកោះមួយ ឈ្មោះ Iranaitivu ស្ថិតនៅចំងាយប្រមាណ១៣គីឡូម៉ែត្រ នៅភាគខាងជើងកោះស្រីលង្កា ធ្វើជាទីបញ្ចុះសពអ្នកស្លាប់ដោយកូវីដ១៩។ គំរោងនេះ បានធ្វើឲ្យសហគមអ្នកកាន់សាសនាអ៊ីស្លាម និងអ្នកកាន់សាសនាគ្រិះ ចេញមកតវ៉ា ដោយពួកគេទាមទារ យកសពទៅបញ្ចុះ នៅក្នុងទីបញ្ចុះសពរបស់សហគមពួកគេ និងដោយគោរពតាមក្រិត្យក្រមសាសនា។
គួរកត់សំគាល់ថា សពមនុស្សស្លាប់ដោយជំងឺកូវីដ១៩ នៅក្នុងប្រទេសស្រីលង្កា បានក្លាយជាបញ្ហានយោបាយ ប្រកាន់រើសអើង រវាងសហគមសាសនាផ្សេងៗគ្នាក្នុងប្រទេសនេះ ដែលមានទាំងសាសនាហិណ្ឌូ សាសនាព្រះពុទ្ធ សាសនាគ្រិះ និងសាសនាអ៊ីស្លាម។ ក្នុងចំណោមប្រជាជនប្រមាណ២១លាននាក់ មានអ្នកកាន់សាសនាអ៊ីស្លាមប្រមាណ១០% នៅស្រីលង្កា។ គណបក្សសន្និបាទមូស្លីមស្រីលង្កា បានចេញមុខតវ៉ា ដោយលើកឡើងថា គំរោងរបស់រដ្ឋាភិបាលស្រីលង្កា ដែលជាក្រុមអ្នកកាន់ពុទ្ធសាសនា គឺជាការប្រមាថមើលងាយ មកលើប្រពៃណីជំនឿសាសនាអ៊ីស្លាម។
កាលពីខែមេសា ឆ្នាំមុន រដ្ឋាភិបាលស្រីលង្កា បានសម្រេចហាមឃាត់រាល់ការបញ្ចុះសពអ្នកស្លាប់ដោយកូវីដ១៩ ដោយសពត្រូវតែយកទៅបូជា បន្ទាប់ពីមានព្រះសង្ឃពុទ្ធសាសនាមួយអង្គ បានមានដីកាថា បើបញ្ចុះសព មេរោគនឹងជ្រាបចូលទៅស្រទាប់ទឹកក្នុងដី ហើយធ្វើឲ្យឆ្លងទៅដល់អ្នកស្រុក។ ប៉ុន្តែ បន្ទាប់ពីមានការតវ៉ារិះគន់ខ្លាំង រដ្ឋាភិបាលស្រីលង្កា បានប្តូរចិត្ត លប់ចោលការតម្រូវឲ្យយកសពទៅបូជា ហើយកែប្រែមកជាការ យកទៅបញ្ចុះនៅលើកោះដាច់ស្រយ៉ាលវិញ។
ទាក់ទិននឹងការលើកឡើងរបស់អាជ្ញាធរស្រីលង្កា ដែលថាខ្លាចឆ្លងកូវីដ១៩ចូលទៅក្នុងស្រទាប់ទឹកក្រោមដីនេះ អង្គការសុខភាពពិភពលោក ធ្លាប់បានអះអាងរួចហើយ ថាគ្មានហានិភ័យបែបនេះទេ។ យ៉ាងណាមិញ ក្រុមអ្នកជំនាញរបស់រដ្ឋាភិបាលស្រីលង្កាខ្លួនឯង ក៏បានបញ្ជាក់កាលពីខែមករាដែរ ថាអាចបញ្ចុះសពបាន ដោយគោរពលក្ខខណ្ឌម៉ដ្ឋចត់។
សូមបញ្ជាក់ថាគិតមកត្រឹមថ្ងៃទី៣មីនា យោងតាមតួលេខផ្លូវការ នៅស្រីលង្កាមានអ្នកស្លាប់ដោយកូវីដ១៩ ចំនួន៤៨៣នាក់។ តំណាងសហគមសាសនាអ៊ីស្លាម បានអះអាងថា ជាងពាក់កណ្តាលនៃអ្នកស្លាប់ទាំងនេះ គឺជាអ្នកកាន់សាសនាអ៊ីស្លាម។ ប្រភពដដែល បានបន្ថែមថា ការឆ្លងរាលដាល និងមានស្លាប់ច្រើនក្នុងចំណោមអ្នកកាន់សាសនាអ៊ីស្លាម គឺដោយសារពួកគេ មិនហ៊ានទៅរកការព្យាបាល ដោយខ្លាចថាបើស្លាប់ គឺគេនឹងយកទៅបូជា ផ្ទុយពីប្រពៃណីខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ