យុវជនបាតុករថៃ១៨នាក់ជាប់ចោទ ក្នុងនោះ៣នាក់ បន្ថែមដោយបទល្មើសប្រមាថព្រះចេស្តាព្រះមហាក្សត្រ
កាលពីថ្ងៃចន្ទ ទី៨មីនា តុលាការក្រុងបាងកក បានចោទប្រកាន់យុវជនប្រជាធិបតេយ្យចំនួន១៨នាក់ ពីបទធ្វើកម្មភាពបាតុកម្មប្រឆាំងរដ្ឋាភិបាល។ ក្នុងចំណោមនេះ មានយុវជននាំមុខ៣នាក់ ត្រូវជាប់ចោទបន្ថែម ពីបទប្រមាថព្រះចេស្តាព្រះមហាក្សត្រ ហើយត្រូវតុលាការបដិសេធ មិនដោះលែង ឲ្យនៅក្រៅឃុំទេ។
ចុះផ្សាយនៅថ្ងៃ៖
ស្តាប់ - ០២:១៣
យុវជនប្រជាធិបតេយ្យថៃចំនួន១៨នាក់ ត្រូវជាប់ចោទក្រោមបទចោទប្រកាន់ចំនួន១១ករណី ដែលពាក់ព័ន្ធនឹងហេតុការណ៍មហាបាតុកម្ម ប្រឆាំងរដ្ឋាភិបាលកាលពីថ្ងៃទី ១៩ និង ២០ កញ្ញា ឆ្នាំ២០២០។ នេះបើផ្អែកតាមការបញ្ជាក់ឲ្យដឹង ពីអ្នកនាំពាក្យការិយាល័យព្រះរាជអាជ្ញា អមតុលាការក្រុងបាងកក កាលពីរសៀលថ្ងៃចន្ទ ទី៨មីនា។
ប្រភពដដែលអះអាងថា ក្នុងចំណោមអ្នកជាប់ចោទទាំង១៨នាក់ គឺមាន៣នាក់ ត្រូវបានតុលាការក្រុងបាងកក សម្រេចបដិសេធ មិនដោះលែងឲ្យនៅក្រៅឃុំទេ ដោយសារអ្នកទាំង៣នោះ ត្រូវជាប់ចោទមួយបន្ថែមទៀត គឺបទល្មើសប្រមាថព្រះចេស្ដាព្រះមហាក្សត្រ ដោយយោងលើមាត្រា១១២ នៃក្រមព្រហ្មទណ្ឌថៃ។
សូមបញ្ជាក់ថា យុវជនទាំង៣ គឺជាយុវជនដែលចេញមុខសកម្មខ្លាំងជាងគេ ក្នុងចលនាបាតុកម្មកន្លងមក មានឈ្មោះ កញ្ញា Panusaya Sithijirawattanakul ហៅ Rung លោក Panupong Jadnok ហៅ Mike និងលោក Jatupat Boonpattararaksa ហៅ Pai។ សមត្ថកិច្ចថៃ បានបញ្ជូនអ្នកទាំង៣យកទៅដាក់ឃុំ ក្រោមក្រសែរភ្នែកបាតុករជាច្រើននាក់ ដែលរងចាំនៅខាងមុខតុលាការក្រុងបាងកក។
កញ្ញា Rung Panusaya ធ្លាប់បានលើកឡើងប្រាប់អ្នកកាសែតថា « ទោះរូបនាង និងសកម្មជនផ្សេងទៀត ត្រូវគេចាប់ដាក់ឃុំ ច្រើននាក់យ៉ាងណាក៏ដោយ ក៏ចលនាទាមទារលទ្ធិប្រជាធិបតេយ្យនៅប្រទេសថៃ មិនសាបសូន្យដែរ ព្រោះថាយុវជនថៃទាំងអស់ មិនចាំបាច់ត្រូវការរូបនាង ឬអ្នកណាម្នាក់ មកដឹកនាំពួកគេទេ »។
គួរកត់សំគាល់ថា បន្ទាប់ពីបានស្ងប់ស្ងាត់ ប្រមាណជា២ខែ ចលនាបាតុកម្មប្រជាធិបតេយ្យនៅថៃ ហាក់បានស្ទុះឡើងវិញ ចាប់ពីខែកុម្ភៈមក នៅក្រោយពេលដែលមនុស្សសំខាន់ៗ៤នាក់ ដែលដឹកនាំចលនានេះ ត្រូវបានតុលាការថៃ ចោកប្រកាន់ និងចាប់ដាក់ឃុំពីបទប្រមាថព្រះចេស្ដាមហាក្សត្រ។ ក្នុងចំណោមនេះ គឺមានលោក Parit Chiwarak ហៅ Penguin និងលោក Anon Numpa មេធាវីសិទ្ធិមនុស្សដ៏ល្បីម្នាក់។ គិតមកត្រឹមពេលនេះ មានបាតុការប្រជាធិបតេយ្យថៃ ចំនួនប្រមាណ៥៧នាក់ ដែលកំពុងជាប់ឃុំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ