ចិនគ្រោងបើកព្រំដែនទទួលយកជនបរទេសមកពីអាមេរិកឬឥណ្ឌាជាដើម ដែលបានទទួលចាក់វ៉ាក់សាំង ចិន
ប្រទេសចិនគ្រោងបើកព្រំដែនឲ្យបរទេសអាចធ្វើដំណើរចូលទៅវិញ ប៉ុន្តែ ក្នុងលក្ខខណ្ឌថា ពួកគេបានទទួលចាក់វ៉ាក់សាំងរបស់ចិន។ នៅក្នុងសេចក្តីប្រកាសព័ត៌មានរបស់ខ្លួន កាលពី ថ្ងៃចន្ទ ស្ថានទូតចិន នៅ សហរដ្ឋអាមេរិកបានបញ្ជាក់ថា ស្ថានទូតនឹងចាប់ផ្តើម ទទួលពាក្យតសុំទិដ្ឋាការជនបរទេសរបស់ជនបរទេសណាដែលបានទទួលរួចហើយ វ៉ាក់សាំង បង្ការជំងឺកូវីដ ដែលផលិតនៅប្រទេសចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
មួយឆ្នាំក្រោយ បិទព្រំដែនមិនទទួល ជនបរទេសដើម្បី ទប់ស្កាត់ការចម្លង រាលដាលជំងឺកូវីដ ទីក្រុងប៉េកាំងដែលបានគ្រប់គ្រងស្ថានការណ៍កូវីដ បានសឹងទាំងស្រុង គ្រោងនឹងបើកព្រំដែនស្វាគម ជនបរទេសឡើងវិញ ប៉ុន្តែ មានភ្ជាប់លក្ខខណ្ឌថា ជនបរទេសដែលចង់ធ្វើដំណើរត្រលប់ទៅប្រទេសចិន ត្រូវតែបានទទួលចាក់វ៉ាក់សាំងចិន។
សូមបញ្ជាក់ថា នៅក្នុងយុទ្ធនាការចាក់វ៉ាក់សាំង ក្នុងប្រទេស អាជ្ញាធរចិនអនុញ្ញាតគេប្រើប្រាស់ តែវ៉ាក់សាំង ៤ប្រភេទ ដែលផលិតឡើង ក្នុងទឹកដីចិន ប៉ុន្តែ ដោយគ្មានទទួលឲ្យប្រើប្រាស់វ៉ាក់សាំងមកពី បរទេសនោះទេ។
នៅក្នុងដំណាក់កាលបើកព្រំដែនដំបូងនេះ អាជ្ញាធរចិន គ្រោងនឹងផ្តល់ទិដ្ឋាការការងារ ទិដ្ឋការធ្វើជំនួញ ឬ ដើម្បីហេតុផលមនុស្សធម៌ សម្រាប់ជនបរទេសដែលមកពីសហរដ្ឋអាមេរិក ឥណ្ឌា ប៉ាគីស្ថាន អ៊ីតាលី ហ្វីលីពីន និងស្រីលង្កា។
តាមសេចក្តីថ្លែងការណ៍របស់ស្ថានទូតចិន ប្រចាំសហរដ្ឋអាមេរិក ស្ថានទូតនឹងចាប់ពិចារណាផ្តល់ទិដ្ឋាការ ដល់អ្នកដាក់ពាក្យណាដែលបានទទួលវ៉ាក់សាំងចិន យ៉ាងហោច ណាស់ ១ដូស ឬ ២ដូស នៅ ១៤ថ្ងៃមុន ដាក់ពាក្យសុំទិដ្ឋាការ។
ស្ថានទូតចិន នៅ ប្រទេស ឥណ្ឌា ប៉ាគីស្ថាន ហ្វីលីពីន និងស្រីលង្ការបានចេញសេចក្តីថ្លែងការណ៍ដូចគ្នានេះដែរ។ ប៉ុន្តែ បញ្ហានៅត្រង់ថា រហូតមកដល់ថ្ងៃនេះ សហរដ្ឋ អាមេរិក ឥណ្ឌា និងអ៊ីតាលី ជាដើម គ្មានប្រើវ៉ាក់សាំងរបស់ចិន ដើម្បី យុទ្ធនាការចាក់វ៉ាក់សាំងប្រឆាំងជំងឺកូវីដ នៅក្នុងទឹកដី របស់ខ្លួននោះទេ។ អាមេរិក និងឥណ្ឌា ប្រើប្រាស់តែវ៉ាក់សាំងដែលផលិតនៅទឹកដី របស់ខ្លួន ដូចជា Pfizer Moderna ឬAstraZeneca ចំណែកអ៊ីតាលីចាក់តែវ៉ាក់សាំងណាដែលទីភ្នាក់ងារ ឱសថអឺរ៉ុបផ្តល់ការអនុញ្ញាតិតែប៉ុណ្ណោះ។ ការណ៍នេះធ្វើឲ្យគេជឿថា ការប្រកាសរបស់ស្ថានទូតចិននឹងទាក់ទាញ បានមនុស្សតិចណាស់ ឬសឹងតែគ្មានតែម្តង នៅអាមេរិក ឥណ្ឌា ឬអ៊ីតាលី។
ដោយលើកយកហេតុផល បើកព្រំដែន សម្រាប់ជនបរទេស ដែលចាក់វ៉ាក់សាំងចិន តើចិនកំពុងទាក់ទាញឲ្យគេចាក់វ៉ាក់សាំង របស់ខ្លួន? តាមរយៈ យុទ្ធសាស្រ្តការទូតវ៉ាក់សាំង ចិនបានចែកចាយ នាំចេញវ៉ាក់សាំងរបស់ខ្លួន ទៅកាន់ប្រទេសជាច្រើន ដូចជា តួកគី ហ្វីលីពីន ឥណ្ឌូណេស៊ី និងកម្ពុជា។ ប៉ុន្តែ យ៉ាងណាក៏ដោយ វ៉ាក់សាំង ចិន គ្មានវត្តមាននៅគ្រប់កន្លែងនោះទេ ដូចជានៅ ឥណ្ឌា និងស្រីលង្ការជាដើម។
នៅពេលចិន នៅមិនទាន់ត្រៀមខ្លួនដើម្បី អាចផលិតវ៉ាក់សាំង គ្រប់គ្រាន់សម្រាប់តម្រូវការបរទេស វ៉ាក់សាំងរបស់ចិនកំពុងប្រឈមនឹងអរិភាព ការមិនជឿទុកចិត្ត ពីសំណាក់អ្នកប្រើប្រាស់ ជាពិសេស នៅបណ្តាប្រទេសលោកខាងលិច ដោយសារតែដំណើការធ្វើតេស្តសាកល្បងវ៉ាក់សាំងរបស់ចិន នៅខ្វះតម្លាភាព។ អង្គការសុខភាពពិភពលោកផ្ទាល់បានអនុញ្ញាតឲ្យគេប្រើប្រាស់ជាផ្លូវការ វ៉ាក់សាំង ចំនួន ៣ប៉ុណ្ណោះ ដែលនៅក្នុងនោះ មានវ៉ាក់សាំងរបស់ក្រុមហ៊ុនអាមេរិកាំង Pfizer Johnson&Johnson និងAstraZeneca ប៉ុន្តែ គ្មានទេ Sinovac ដែលជាវ៉ាក់សាំង ផលិតឡើងនៅប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ