យុវជនបាតុករថៃ បន្តបាតុកម្ម ក្រោយសមត្ថកិច្ចចុះរឹបអូសសៀវភៅ "រាជានិយម និង សង្គមថៃ"
កាលពីល្ងាចថ្ងៃសៅរ៍ទី២០មីនា យុវជនបាតុករថៃជាច្រើននាក់ បានមកជួបជុំគ្នានៅក្រុងបាងកក ក្បែរព្រះបរមរាជវាំង ដើម្បីតវ៉ាឲ្យដោះលែងក្រុមសកម្មជនប្រជាធិបតេយ្យជាច្រើននាក់ ដែលត្រូវបានតុលាការថៃ សម្រេចដាក់ឃុំ។ ការជួបជុំនេះ បានរងការបង្ក្រាបយ៉ាងដំណំ ពីសំណាក់សមត្ថកិច្ចថៃ ដោយបានប្រើកាណុងបាញ់ទឹក និងកាំភ្លឹងគ្រាប់កៅស៊ូ ផងដែរ។
ចុះផ្សាយនៅថ្ងៃ៖
ស្តាប់ - ០២:៤៥
យុវជនបាតុករថៃ បានជួបជុំគ្នា នៅក្បែរព្រះបរមរាជវាំង ដោយមិនញញើតនឹងការហាមឃាត់ កាលពីល្ងាចថ្ងៃសៅរ៍ទី២០មីនា។ នៅទីលានខាងមុខព្រះបរមរាជវាំងបាងកក សមត្ថកិច្ច បានយកទូកុងទឺន័ររាប់សិបគ្រឿង មកដាក់គរ ធ្វើជារបងខណ្ឌ កុំឲ្យបាតុករ ឈានចូលទៅជិតព្រះបរមរាជវាំង។ កម្លាំងសមត្ថកិច្ចប្រមាណ៣០០០ពាន់នាក់ ត្រូវបានគេដាក់ពង្រាយ យាមទាំងថ្ងៃទាំងយប់ នៅក្រុងបាងកក ដើម្បីចាំទប់ការធ្វើបាតុកម្ម។
ក្រោមសម្រែក ស្រែកថា « ដោះលែងមិត្តភ័ក្ត្រយើងភ្លាម » ក្រុមបាតុករ បានយកខ្សែពួរ ទាញទូកុងទឺន័រទំលាក់ ដើម្បីបើកផ្លូវ។ បើកបានហើយ យុវជនបាតុករ ដែលមានការប្តេជ្ញាចិត្ត បានស្ទុះចូលទៅក្បែរនគរបាល មុននឹងរងនូវគ្រាប់កាំភ្លើងកៅស៊ូ ឧស្ម័នបង្ហូរទឹកភ្នែក និងកាណុងបាញ់ទឹក ពីសំណាក់សមត្ថកិច្ច។ នៅវេលាម៉ោងប្រមាណជា៨ និង៣០នាទីយប់ ក្រុមបាតុករបានដាក់ថយ បំបែកជួរគ្នា ដោយនៅសល់តែមួយចំនួនតូចតែប៉ុណ្ណោះ។
សូមបញ្ជាក់ថា នៅថ្ងៃសៅរ៍ទី២០មីនាដែរ សមត្ថកិច្ចថៃ បានចុះទៅទីតាំងបោះពុម្ពសផ្សាយសៀវភៅមួយកន្លែងឈ្មោះ « បោះពុម្ពផ្សាយថៃ » ដើម្បីរឹបអូសយកសៀវភៅ ដែលមានឈ្មោះថា « របបរាជានិយម និងសង្គមថៃ »។ សៀវភៅនេះ គឺជាសម្រង់សន្ទរកថា របស់លោក Anon Numpa មេធាវីសិទ្ធិមនុស្ស និងជាសកម្មជនប្រជាធិបតេយ្យដ៏ល្បីម្នាក់ ហើយដែលបច្ចុប្បន្ន ត្រូវបានសមត្ថកិច្ចថៃចាប់ដាក់ឃុំ។
នាយនគរបាលក្រុងបាងកក បានអះអាងប្រាប់អ្នកយកព័ត៌មានបារាំងថា ការចុះទៅរឹបអូសសៀវភៅនេះ គឺដោយសារតែក្រុមបាតុករ បានផ្សាយតាមបណ្តាញសង្គមថា នឹងចែកចាយសៀវភៅនេះ ក្នុងពេលធ្វើបាតុកម្ម។ លោកបញ្ជាក់ថា ជំហានបន្ទាប់ គឺសមត្ថកិច្ច និងពិនិត្យខ្លឹមសារនៃសៀវភៅនេះ ថាតើវាបានបំពាននឹងច្បាប់ជាធរមានដែរឬទេ។
គួរកត់សំគាល់ថា ក្រុមបាតុករ បានធ្វើការផ្សព្វផ្សាយ ចែករំលែកអត្ថបទសៀវភៅនេះ នៅតាមបណ្តាញអ៊ីនធ័រណិត យ៉ាងព្រោងព្រាតរួចទៅហើយ និងបានអំពាវនាវ ឲ្យសកម្មជនទាំងអស់ ត្រូវចែកចាយបន្តៗ មិនថាតាមអ៊ីនធ័រណិត ឬតាមការបោះពុម្ពក្រៅផ្លូវការនោះទេ។ ក្រុមបាតុករក៏បានអំពាវនាវ ឲ្យគ្រប់គ្នាអានខ្លឹមសារនៃសៀវភៅនេះ ឲ្យឮៗ នៅក្នុងពេលធ្វើបាតុកម្ម។
គួររំលឹកថា ចលនាបាតុកម្មទាមទារប្រជាធិបតេយ្យនៅថៃ បានចាប់ផ្តើមស្ទុះឡើងវិញ កាលពីខែកុម្ភៈ បន្ទាប់ពីមនុស្សសំខាន់ៗជាច្រើននាក់ នៃចលនានេះ ត្រូវបានតុលាការថៃសម្រេចឃុំខ្លួន ពីបទ ប្រមាថព្រះជេស្តារព្រះមហាក្សត្រ។ ក្នុងចំណោមអ្នកជាប់ចោទចំនួន៧៣នាក់ គឺមានលោក Parit Chiwarak លោក Anon Numpa និងកញ្ញា Panusaya Sithijirawattanakul ជាដើម ដែលសុទ្ធតែជាសកម្មជនចេញមុខខ្លាំងជាងគេ ក្នុងចលនាទាមទារលទ្ធិប្រជាធិបតេយ្យនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ