អ្នកវិភាគ៖កូរ៉េខាងជើងតែងទាញបានផលចំណេញពីភាពតានតឹងរវាងប្រទេសមហាអំណាច
អាមេរិក និងកូរ៉េខាងត្បូងបានប្រកាសឲ្យដឹងក្នុងថ្ងៃពុធ ទី២៤ មីនាថា កូរ៉េខាងជើងបានបាញ់សាកល្បងគ្រាប់មីស៊ីលចម្ងាយជិតចំនួន ២គ្រាប់។ ការបាញ់សាកគ្រាប់មីស៊ីលពីសំណាក់ក្រុងព្យុងយ៉ាងពេលនេះបានធ្វើឡើង នៅក្រោយសំណើរទស្សនកិច្ចរបស់រដ្ឋមន្រ្តីការពារជាតិ និងរដ្ឋមន្រ្តីការបរទេសអាមេរិកនៅក្នុងទឹកដីកូរ៉េខាងត្បូង។ មួយវិញទៀត នេះជាការបាញ់សាកល្បងលើកទី១ តាំងពីលោកបៃដិនចូលកាន់តំណែងប្រធានាធិបតីអាមេរិក។ លោកអង់ទ័ន បុងដា អ្នកវិភាគរឿងកូរ៉េខាងជើងបានយល់ឃើញថា នៅក្នុងអតីតកាលក៏ដូចជានៅពេលនេះ ក្រុងព្យុងយ៉ាងតែងមាន និងប្រើយុទ្ធសាស្រ្តតែមួយ និងតែងទាញបានផលចំណេញពីភាពតានតឹងរវាងប្រទេសមហាអំណាច។
ចុះផ្សាយនៅថ្ងៃ៖
ស្តាប់ - ០២:០១
« អ្វីដែលសំខាន់ និងគួរឲ្យចាប់អារម្មណ៍ក្នុងរឿងកូរ៉េខាងជើងគឺជានិច្ចកាល កូរ៉េខាងជើងតែងមានយុទ្ធសាស្រ្តតែមួយ និងតែងទទួលបានផលចំណេញសឹងគ្រប់លើកជាមួយនឹងយុទ្ធសាស្រ្តនេះ។ កូរ៉េខាងជើងតែងទទួលបានពីយុទ្ធសាស្រ្តនៃភាពតានតឹងរវាងប្រទេសមហាអំណាច។ នៅក្នុងអតីតកាល កូរ៉េខាងជើងទទួលបានប្រយោជន៍ពីភាពតានតឹងរវាងសហភាពសូវៀត និងប្រទេសចិន ហើយឥឡូវនេះ គឺភាពតានតឹងរវាងប្រទេសចិន និងអាមេរិក។
ដូច្នេះ វាពិតជាគ្មានអ្វីគួរឲ្យភ្ញាក់ផ្អើលទេដែលនាប៉ុន្មានថ្ងៃចុងក្រោយនេះ កូរ៉េខាងជើងបានបង្ហាញជំហរ និងបញ្ជូនសារដើម្បីខិតទៅកៀកប្រទេសចិន។ ទាក់ទងនឹងការបាញ់សាកល្បងគ្រាប់មីស៊ីលពេលនេះវិញត្រូវបានគេចោទសួរថា ហេតុអ្វីបានជាគ្មានប្រតិកម្មខ្លាំងក្លាពីសហរដ្ឋអាមេរិក។ ចម្លើយគឺថា មកពីគ្រាប់មីស៊ីលដែលកូរ៉េខាងជើងបានបាញ់សាកល្បងហ្នឹងជាគ្រាប់មីស៊ីលចម្ងាយជិត ពោលមិនមែនជាគ្រាប់មីស៊ីបាលីស្ទិកទេ។
ចូរកុំភ្លេចថា ការបាញ់សាកល្បងគ្រាប់មីស៊ីលចម្ងាយជិតនេះមិនត្រូវបានហាមឃាត់ដោយសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិឡើយ។ គឺមានតែគ្រាប់មីស៊ីបាលីស្ទិកទេដែលបានហាមឃាត់ដោយសេចក្តីសម្រេចរបស់ក្រុមប្រឹក្សាសន្តិសុខ។ អ៊ីចឹងហើយបានជាគ្មានប្រតិកម្មខ្លាំងក្លាពីសហរដ្ឋអាមេរិក។ អ្វីដែលសំខាន់សម្រាប់ក្រុងព្យុងយ៉ាង និងក្រុងវ៉ាស៊ីនតោន គឺភាគីនីមួយៗកំពុងចង់ដឹងពីគ្នាទៅវិញ ទៅមកនូវយុទ្ធសាស្រ្ត និងខ្សែបន្ទាត់នយោបាយដែលត្រូវអនុម័ត។
សម្រាប់អាមេរិក ក្រោយពីមានជំនួបជាមួយកូរ៉េខាងត្បូង និងជប៉ុនមក អាមេរិកកំពុងសិក្សា និងពិនិត្យមើលឡើងវិញពីនយោបាយដែលខ្លួនត្រូវមានជាមួយកូរ៉េខាងជើង។ នៅប៉ុន្មានសប្តាហ៍ខាងមុខ គេនឹងបានដឹងពីនយោបាយអាមេរិកចំពោះកូរ៉េខាងជើង។ គឺចាប់ពីពេលនោះទើបគេអាចនិយាយបានថា តើមាន ឬមិនមាននូវកិច្ចចរចាឡើងវិញរវាងអាមេរិក និងកូរ៉េខាជើង។ តែខណៈនេះ ម្នាក់ៗកំពុងទន្ទឹងរង់ចាំមើល »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ