តៃវ៉ាន់៖គ្រោះថ្នាក់រថភ្លើងបានបណ្តាលឲ្យស្លាប់មនុស្សយ៉ាងតិច ៤៨នាក់
នៅតៃវ៉ាន់ គ្រោះថ្នាក់រថភ្លើងនាព្រឹកថ្ងៃសុក្រ ទី២ មេសាបានបណ្តាលឲ្យមានមនុស្សយ៉ាងតិច ៤៨នាក់បាត់បង់ជីវិត និងមានរបួសចំនួន ៦៦នាក់ត្រូវបានដឹកទៅកាន់មន្ទីរពេទ្យ។ រថភ្លើងដែលដឹកពេញដោយអ្នកដំណើរបានជួបគ្រោះថ្នាក់នៅក្នុងរូងភ្នំមួយក្នុងខេត្តឆ្នេរសមុទ្រ Hualien ស្ថិតប៉ែកខាងលិចកោះតៃវ៉ាន់។ នេះជាគ្រោះថ្នាក់រថភ្លើងដ៏ធ្ងន់ធ្ងរដែលតៃវ៉ាន់មិនធ្លាប់ជយបទេ គិតតាំងពីឆ្នាំ ១៩៩១។
ចុះផ្សាយនៅថ្ងៃ៖
ស្តាប់ - ០២:២៣
គ្រោះថ្នាក់រថភ្លើងដែលមាន ៨ទូរ និងមានអ្នកដំណើរជិះប្រមាណជា ៣៥០នាក់បានកើតមាននៅក្នុងរូងភ្នំនាវេលាម៉ោង ៩កន្លះព្រឹកម៉ោងនៅកោះតៃវ៉ាន់។ តាមការសន្និដ្ឋានដំបូងរបស់ប៉ូលិសខេត្តឆ្នេរសមុទ្រ Hualien គ្រោះថ្នាក់រថភ្លើងនោះបានបង្កឡើងដោយគ្រឿងចក្រមួយគ្រឿងដែលចតមិនត្រឹមត្រូវ និងបានរអិលធ្លាក់លើផ្លូវរថភ្លើងចំពេលដែលរថភ្លើងមកដល់។ តែប៉ូលិសបានបញ្ជាក់ថា ការស៊ើបអង្កេតនឹងបន្តធ្វើដើម្បីកំណត់ពីមូលហេតុឲ្យបានវច្បាស់លាស់។ រូបភាពផ្តល់ដោយកាកបាទក្រហមតៃវ៉ាន់បានបង្ហាញពីក្រុមជួយសង្រ្គោះដើរលើដំបូលរថភ្លើងនៅក្នុងរូងភ្នំដើម្បីជម្លៀសអ្នកដំណើរដែលជាប់គាំងនៅក្នុងទូររថភ្លើង។ នៅវេលាថ្ងៃត្រង់ អ្នកដំណើររងរបួស និងរួចជីវិតទាំងអស់ត្រូវបានជម្លៀសចេញពីទូររថភ្លើង។
គេសម្គាល់ឃើញថា អ្នកដំណើរជិះក្នុងទូររថភ្លើងផ្នែកខាងក្រោយហាក់មិនសូវជួបគ្រោះធ្ងន់ធ្ងរទេ។ រូបភាពផ្សព្វផ្សាយលើទំព័រ Facebook ដោយកាសែត UDN បានបង្ហាញថា មានទូររថភ្លើងផ្នែកខាងក្រោយយ៉ាងតិច ២ទូរមិនបានរងការខូចខាតអ្វីទេ។ ស្រ្តីអ្នកដំណើរម្នាក់បានថ្លែងថា អ្នកដំណើរបានវាយបំបែកកញ្ចក់បង្អួចទូររថភ្លើងតោងឡើងលើដំបូលដើម្បីចេញ។ គួរជម្រាបថា គ្រោះថ្នាក់រថភ្លើងនេះបានកើតមានក្នុងថ្ងៃទី១ នៃពិធីសែនផ្នូរប្រចាំឆ្នាំ និងចំពេលឈប់សម្រាកចុងសប្តាហ៍។ នៅក្នុងពិធីសែនផ្នូរនេះ ប្រជាជនភាគច្រើនបានធ្វើដំណើរទៅកាន់ស្រុកកំណើតតាមរថយន្ត ឬតាមរថភ្លើង។
អ្វីជាការកត់សម្គាល់ គ្រោះថ្នាក់រថភ្លើងពេលនេះជាគ្រោះថ្នាក់ដ៏ធ្ងន់ធ្ងរមួយដែលតៃវ៉ាន់មិនធ្លាប់ជួបប្រទះទេនាប៉ុន្មានទសវត្សចុងក្រោយនេះ។ គ្រោះថ្នាក់រថភ្លើងចុងក្រោយបានកើតមានក្នុងឆ្នាំ ២០១៨ ដោយបណ្តាលឲ្យស្លាប់ ១៨នាក់ និងរបួសជាង ២០០នាក់ក្នុងចំណោមអ្នកដំណើរទាំង ៣៦៦នាក់។ ក្នុងឆ្នាំ ២០០៣ គ្រោះថ្នាក់រថភ្លើងបានផ្តាច់ជីវិតមនុស្សចំនួន ១៧នាក់ និងរបួស ១៥៦នាក់។ ក្នុងឆ្នាំ ១៩៩១ គ្រោះថ្នាក់រថភ្លើងបានផ្តាច់ជីវិតមនុស្សចំនួន ៣០នាក់ និងរបួស ១១២នាក់ ហើយគ្រោះថ្នាក់ក្នុងឆ្នាំ ១៩៨១ ក៏បានសម្លាប់អ្នកដំណើរចំនួន ៣០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ