ក្រុមគាំទ្ររបបសិក បណ្តេញឯកអគ្គរដ្ឋទូតភូមានៅអង់គ្លេស ចេញពីស្ថានទូតទីក្រុងឡុងដ៍
នៅស្ថានទូតភូមា ប្រចាំទីក្រុងឡុងដ៍ប្រទេសអង់គ្លេស ភាពរញ៉េរញ៉ៃបានកើតឡើង កាលពីថ្ងៃពុធ ទី៧មេសាម្សិលមិញនេះ ដោយក្រុមមន្ត្រីទូតនិងមន្ត្រីយោធាភូមា ដែលគាំទ្ររបបសិក បានបណ្តេញលោកអគ្គរដ្ឋទូតភូមា ចេញពីស្ថានទូត ដោយសារតែលោកអគ្គរដ្ឋទូតរូបនេះ មានគំនិតគាំទ្រលោកស្រីអ៊ុងសាន ស៊ូជី។ រដ្ឋាភិបាលអង់គ្លេស បានសំដែងការថ្កោលទោស ចំពោះអំពើក្អេងក្អាងរបស់ក្រុមកងទ័ពភូមា នៅលើទឹកដីអង់គ្លេស។
ចុះផ្សាយនៅថ្ងៃ៖
ស្តាប់ - ០២:២០
លោក Kyaw Zwar Minn គឺជាឯកអគ្គរដ្ឋទូតភូមា ប្រចាំទីក្រុងឡុងដ៍ប្រទេសអង់គ្លេស ហើយដែលមានទំនោរគាំទ្រលោកស្រី អ៊ុងសាន ស៊ូជី។ កាលពីថ្ងៃពុធ ទី៧មេសា លោកត្រូវបានក្រុមមន្ត្រីភូមា ដែលគាំទ្ររបបសិក បណ្តេញចេញពីស្ថានទូត។ លោក Kyaw Zwar Minn បានបញ្ជាក់ថា គឺតំណាងកងទ័ពភូមា ប្រចាំនៅស្ថាទូត ជាអ្នកបានដណ្តើមកាន់កាប់ស្ថានទូតនៅទីក្រុងឡុងដ៍។ លោកបានចាត់ទុកថា នេះគឺជាអំពើរដ្ឋប្រហារប្លន់អំណាចមួយ។
លោក Dominic Raab រដ្ឋមន្ត្រីការបរទេសអង់គ្លេស បានសរសេរលើទំព័រ Twitter ថា ការបណ្តេញលោកអគ្គរដ្ឋទូតភូមាដែលគាំទ្រលោកស្រីអ៊ុងសាន ស៊ូជី និងការដណ្តើមស្ថានទូតយកទៅគ្រប់គ្រងបែបនេះ វាគឺជាអំពើគំរាមយ៉ាងព្រហ៊ើនរបស់របបសិកភូមា ធ្វើនៅលើទឹកដីអង់គ្លេស។ លោកបន្តថា រដ្ឋាភិបាលអង់គ្លេស សូមប្រកាសថ្កោលទោស អំពើគំរាមសំឡុតរបស់កងទ័ពភូមានេះ។
ដោយឡែកនៅក្នុងស្រុកភូមាឯណោះវិញ របបសិកបានប្រើប្រាស់ប្រព័ន្ធតុលការ ចោទប្រកាន់ និងចេញដីកាតាមចាប់ខ្លួន អ្នកសិល្បៈ តារាចម្រៀង តារាសម្តែង តារាបង្ហាញម៉ូដ និងអ្នកកាសែត សរុបចំនួន១២០នាក់។ ជាក់ស្តែង តារាចម្រៀង សម្តែង និងបង្ហាញម៉ូដប្រុស ដ៏ល្បីម្នាក់នៅភូមា ឈ្មោះ Paing Takhon ត្រូវបានសមត្ថកិច្ចចុះទៅចាប់ខ្លួនដល់ផ្ទះ នៅក្រុងរ៉ង់ហ្គូន នៅព្រឹកថ្ងៃព្រហស្បតិ៍។ នេះបើផ្អែកតាមប្រភពពីអ្នកស្រី Thi Thi Lwin បងស្រីរបស់តារារូបនេះ។ ទំព័រ Facebook និង Instagram របស់តារាដ៏ល្បីអាយុ២៤ឆ្នាំរូបនេះ ដែលមានហ្វេនតាមដានរាប់លាននាក់នោះ ត្រូវបានអាជ្ញាធរភូមាបិទខ្ទប់ មិនឲ្យដំណើរការទេ។
គួរកត់សំគាល់ថា ចលនាបាតុកម្មនៅតែបន្តមាន ក៏ប៉ុន្តែគេសង្កេតឃើញថា អ្នកចូលរួមបានចុះថយ ដោយសារពួកគេខ្លាចការបាញ់សម្លាប់។ យោងតាមអង្គការជួយអ្នកទោសនយោបាយភូមា កាលពីថ្ងៃពុធទី៧មេសា មានបាតុករ១២នាក់ទៀតបានស្លាប់ ដែលធ្វើឲ្យចំនួនមនុស្សស្លាប់សរុបទាំងអស់ មានប្រមាណ៦០០នាក់ គិតចាប់ពីពីផ្ទុះបាតុកម្មមក។ មនុស្សដែលជាប់ឃុំវិញ មានប្រមាណ២៨០០នាក់។ អង្គការនេះ អះអាងថា ការបង្រ្កាប គំរាមសំឡុតប្រជាជន មិនមែនតែនៅតាមទីក្រុងធំៗទេ គឺក្រុមយោធា បានពង្រីកទៅដល់តាមទីជនបទទូទាំងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ