ផ្ទុះករណីឆ្លងនិងស្លាប់ដោយកូវីដ១៩ខ្លាំង ថៃ រឹតបន្តឹងវិធានការ
ប្រទេសថៃបានចេញវិធានការថ្មី តឹងតែងខ្លាំង ចាប់ពីថ្ងៃចន្ទទី ២៦មេសាទៅ ដើម្បីប្រឈមនឹងការស្ទុះឡើងខ្លាំងជាថ្មី នៃការចម្លងរីករាលដាល ជំងឺកូវីដ១៩។ បន្ទាប់ពីស្ងប់ស្ងាត់មួយ ចំនួនអ្នកឆ្លងថ្មី និងអ្នកស្លាប់ដោយកូវីដ១៩ បានកើនឡើងខ្លាំងដល់កំរិតខ្ពស់បំផុតមិនធ្លាប់ជួបប្រទះពីមុនមក នារយៈពេលប៉ុន្មានថ្ងៃចុងក្រោយមកនេះ។
ចុះផ្សាយនៅថ្ងៃ៖
ស្តាប់ - ០២:១៦
ត្រូវពាក់ម៉ាស់ជាដាច់ខាត នៅតាមទីសាធារណៈ ក្នុងទីក្រុងបាងកក និងក្នុង៤៩ខេត្តផ្សេងទៀត។ អ្នកហ៊ានល្មើស មិនពាក់ម៉ាស់ នឹងត្រូវពិន័យជាប្រាក់ ២ម៉ឺនបាត។ បន្ទាប់ពីបាន បិទសាលារៀន បាររង្គសាល និងហាមមិនឱ្យលក់គ្រឿងស្រវឹងនៅតាមអាហារដ្ឋាន តាំងពីសប្តាហ៍មុនមក ចាប់ពីថ្ងៃចន្ទទី ២៦មេសានេះទៅ ទីកន្លែងសាធារណៈជាច្រើនផ្សេងទៀត ដូចជារោងភាពយន្ត សាលកីឡា អាងហែលទឹក ... ក៏ត្រូវបិទទ្វារដែរ។
មានប្រជាជនសរុបជាង៧០លាននាក់ ប្រទេសថៃកំពុងប្រឈមនឹងសន្ទុះរាតត្បាតកូវីដ១៩ជាថ្មី ដោយរាប់ឃើញមានអ្នកឆ្លងថ្មី ដល់ទៅ ជាង ៥៧៥០០ករណី គិតត្រឹមថ្ងៃអាទិត្យទី ២៥មេសា ទល់នឹង២៩០០០ករណីប៉ុណ្ណោះ កាលពីដើមខែមេសា។ ពោលគឺចំនួនអ្នកឆ្លងថ្មីបានកើនឡើងស្ទើរទ្វេមួយពីរ ក្នុងរយៈពេលមិនជាងកន្លះខែបន្តិច។
១១នាក់ ជាចំនួនមនុស្សស្លាប់ដោយកូវីដ១៩ ក្នុងមួយ ថ្ងៃអាទិត្យទី ២៥មេសា ពោលគឺចំនួនដ៏បំផុតពុំធ្លាប់មានកត់ត្រាក្នុងបញ្ជីរបស់ថៃទេ គិតចាប់តាំងពីមានលេចជំងឺកូវីដ១៩មក។
តើអ្វីជាមូលហេតុដែលនាំឱ្យថៃដែលមានចំណាត់ការល្អ ទប់ស្កាត់កូវីដ១៩បានយ៉ាងប្រសើរក្នុងរយៈពេលមួយឆ្នាំកន្លងមកនេះ តាមរយៈនយោបាយត្រួតពិនិត្យព្រំដែន និងតាមដានអ្នកវិជ្ជមានកូវីដយ៉ាងតឹងតែង បែរជាមានសន្ទុះចម្លងថ្មីយ៉ាងខ្លាំងក្លាទៅវិញ នៅពេលនេះ ? នេះមកពីភាពយឺតយ៉ាវនៃយុទ្ធនាការចាក់ថ្នាំបង្ការ ដូចដែលប្រជាពលរដ្ឋបានស្រែករិះគន់រដ្ឋាភិបាលមែនឬ ? បើប្រៀបធៀបនឹងប្រទេសជិតខាងក្នុងតំបន់ ដំណើរការចាក់ថ្នាំបង្ការជូនប្រជាពលរដ្ឋថៃមានការយឺតយ៉ាវខ្លាំងជាងគេមែន។
ប្រឈមនឹងសម្រែកនេះ នាយករដ្ឋមន្ត្រីថៃលោកប្រាយុទ្ធចាន់អូចាបានប្រកាសតាមប្រព័ន្ធសង្គមហ្វេសប៊ុក ថារដ្ឋាភិបាលនឹងខិតខំប្រឹងស្វែងរកវ៉ាក់សាំង ដើម្បីអាចសម្រេចកម្មវត្ថុចាក់ជូនប្រជាពលរដ្ឋ ឱ្យបាន៣០ម៉ឺននាក់ក្នុងថ្ងៃ។
ដោយឡែកនៅប្រទេសឡាវ ដែលហាក់ដូចជាពុំរងការរាតត្បាតខ្លាំងក្នុងរលកដំបូងនោះ អាជ្ញាធរបានប្រកាសដាក់ក្រុងវៀងចន្ទក្នុងភាពអាសន្ន និងហាមប្រជាពលរដ្ឋមិនឱ្យចេញក្រៅផ្ទះ លើកលែងតែករណីចាំបាច់ត្រូវទៅផ្សារទិញម្ហូប និងទៅពេទ្យ ព្រោះការចម្លងចាប់មានល្បឿនខ្លាំង មិនដល់មួយសប្តាហ៍ផងឡាវរាប់ឃើញមានអ្នកឆ្លងឡើងពី ៥៨ ដល់ ៣២៣នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ