មន្ទីរពិសោធន៍ BioNTech នឹងបើកសាខាផលិតវ៉ាក់សាំងរបស់ខ្លួន នៅសិង្ហបុរី
មន្ទីរពិសោធន៍អាល្លឺម៉ង់ BioNTech មានគម្រោងបើកសាខាមួយនៅប្រទេសសិង្ហបុរី ដើម្បីផលិតវ៉ាក់សាំងប្រឆាំងកូវីដ១៩។ នេះគឺជាការឆ្លើយតប ទៅនឹងតម្រូវការនៃការពង្រីកសង្វាក់ផលិតកម្ម ដើម្បីឈានទៅផ្គត់ផ្គង់ វ៉ាក់សាំងប្រឆាំងកូវីដ១៩ ដល់ប្រទេសនៅតំបន់អាស៊ី។ សូមបញ្ជាក់ថា មន្ទីរពិសោធន៍ BioNTech បានរួមសហការជាមួយមន្ទីរពិសោធន៍ Pfizer ស្រាវជ្រាវផលិតវ៉ាក់សាំងប្រភេទARN ដែលមានប្រសិទ្ធិខ្ពស់ ព្រមទាំងបានទទួលការទុកចិត្ត កាន់តែខ្លាំងឡើងៗ។
ចុះផ្សាយនៅថ្ងៃ៖
ស្តាប់ - ០២:៤២
ក្រៅពីគ្រោងបង្កើតទីតាំងសាខាធំប្រចាំតំបន់អាស៊ីអាគ្នេយ៍ នៅសិង្ហបុរី មន្ទីរពិសោធន៍អាល្លឺម៉ង់ BioNTech និងបង្កើតទីតាំងផលិតមួយទៀត នៅសិង្ហបុរី។ ទីតាំងផលិតថ្មីនេះ នឹងមានសមត្ថភាព ផលិតសេរ៉ូម ARN messager ដែលជាសារធាតុផ្សំដ៏ចាំបាច់បំផុត សម្រាប់ផលិតចេញជាវ៉ាក់សាំងប្រឆាំងកូវីដ១៩។ ជាមន្ទីរពិសោធន៍ថ្មីនេះ បំពាក់ដោយគ្រឿងយន្ត ម៉ាស៊ីនរ៉ូបូ និងមានអ្នកបច្ចេកទេសជំនាញខ្ពស់ ចំនួនប្រមាណ៨០នាក់។
លោក Ugur Sahin អគ្គនាយកមន្ទីរពិសោធន៍ BioNTech បានលើកឡើងថា វាជារឿងចាំបាច់ និងបន្ទាន់បំផុតនាពេលនេះ ដែលត្រូវតែពង្រីកសមត្ថភាព ផលិតវ៉ាក់សាំងនៅតំបន់ផ្សេងទៀត។ ហើយវាក៏ឆ្លើយតបទៅនឹងយុទ្ធសាស្រ្តរបស់សហគ្រាសផលិតឱសថនេះ ក្នុងការពង្រឹងវត្តមាននៅទូទាំងពិភពលោកផងដែរ។
សូមបញ្ជាក់ថា មន្ទីរពិសោធន៍ BioNTech គឺជាមន្ទីរពិសោធន៍តូចមួយ នៅក្រុងMayence ភាគខាតលិចអាល្លឺម៉ង់ មានជំនាញផ្នែក Biotechnologie។ BioNTech បានសហការជាមួយសហគ្រាសផលិតឱសថដ៏ធំរបស់អាមេរិក ឈ្មោះPfizer ដើម្បីផលិតវ៉ាក់សាំងប្រឆាំងកូវីដ១៩ ដោយប្រើបច្ចេកទេស ARN messager។
ពីដំបូង មតិទូទៅបានសម្តែងការមិនទុកចិត្ត ចំពោះបច្ចេកទេសថ្មីនេះ ក៏ប៉ុន្តែឆ្លងកាត់ការសាកល្បង និងការចាក់ទ្រង់ទ្រាយធំ ប៉ុន្មានខែមកនេះ បានធ្វើឲ្យអ្នកជំនាញទទួលស្គាល់ថា វ៉ាក់សាំងប្រភេទ ARN messager ពិតជាមានប្រសិទ្ធភាពខ្ពស់ ហើយជាងនេះទៀត គឺមានប្រសិទ្ធភាពល្អ ទល់នឹងកូវីដ១៩ទំរង់បំប្លែងខ្លួនថ្មី។ យ៉ាងណាមិញ សហភាពអឺរ៉ុប ទើបតែបានប្រកាស ថាគេបានចុះកិច្ចសន្យាទិញវ៉ាក់សាំងប្រឆាំងកូវីដ១៩ របស់ Pfizer/BioNTech ចំនួន១៨០០លានដូសទៀត។
គួរកត់សំគាល់ថា គុណវិបត្តិនៃវ៉ាក់សាំង ប្រភេទ ARN messager គឺទាក់ទិននឹងការស្តុកទុក ដែលតម្រូវឲ្យទុកក្នុងទូបង្កកធំៗ ក្នុងសីតុណ្ហភាពប្រមាណ-៧០°c។ ល្បាយសេរ៉ូម ARN messager គឺត្រូវបានផលិតដោយម៉ាស៊ីនបច្ចេកទេសដ៏ស្មុគស្មាញ និងដោយប្រុងប្រយ័ត្នបំផុត។ បច្ចុប្បន្ននេះ BioNTech មានរោងចក្រផលិត តែ១ទីតាំងទេ គឺនៅក្រុង Marbourg ប្រទេសអាល្លឺម៉ង់។ ចំណែកមន្ទីរពិសោធន៍ Pfizer មានទីតាំងផលិតនៅអាមេរិកមួយកន្លែង និងនៅក្រុងPuurs ប្រទេសប៊ែលហ្ស៊ិក មួយកន្លែងទៀត។ កាលពីសប្តាហ៍មុន BioNTech បានអះអាងថា គេនឹងផលិតវ៉ាក់សាំងឲ្យបាន ៣ពាន់លានដូស នៅក្នុងឆ្នាំ២០២១ និង ៣ពាន់លានដូសទៀត នៅឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ