អាហ្វហ្កានីស្ថាន៖ភេរវកម្មបំផ្ទុះគ្រាប់បែកបានសម្លាប់មនុស្សយ៉ាងតិច ១៦នាក់ក្នុងថ្ងៃទី២នៃបទឈប់បាញ់
នៅក្នុងប្រទេសអាហ្វហ្កានីស្ថាន អំពើភេរវកម្មបំផ្ទុះគ្រាប់បែកនៅក្នុងវិហារអ៊ីស្លាមជាយក្រុងកាប៊ូលនាថ្ងៃសុក្រ ទី១៤ ឧសភាបានបណ្តាលឲ្យសម្លាប់មនុស្សយ៉ាងតិច ១៦នាក់។ ព្រឹត្តិការណ៍មួយនេះបានកើតមានឡើងចំថ្ងៃទី២ នៃបទឈប់បាញ់រវាងរដ្ឋាភិបាល និងចលនាឧទ្ទាមតាលីបង់ចុះហត្ថលេខាកាលពីថ្ងៃព្រហស្បតិ៍ ទី១៣ ឧសភា និងក្រោយពីអាមេរិកទើបបានដកទ័ពទាំងអស់ចេញពីមូលដ្ឋានយោធាក្នុងខេត្តកង់ដាហារដែលជាមូលដ្ឋានយោធាមួយដ៏សំខាន់ជាងគេរបស់អាមេរិកក្នុងទឹកដីអាហ្វហ្កានីស្ថាន។
ចុះផ្សាយនៅថ្ងៃ៖
ស្តាប់ - ០២:២១
អំពើភេរវកម្មបំផ្ទុះគ្រាប់បែកក្នុងវិហារអ៊ីស្លាមនៅជាយក្រុងកាប៊ូលបានកើតឡើង ខណៈដែលអ្នកកាន់សាសនាអ៊ីស្លាមកំពុងសូត្រធម៌នារសៀលថ្ងៃសុក្រ ទី១៤ ឧសភា និងត្រៀមបិទបញ្ចប់ពិធីតមអាហារនៅថ្ងៃសៅរ៍ ទី១៥ ឧសភា។ នេះជាការកត់សម្គាល់ទី១។ ចំណែកការកត់សម្គាល់ទី២ មានពីរចំណុច ទី១ អំពើភេរវកម្មបំផ្ទុះគ្រាប់បែកពេលនេះបានកើតមានឡើង ចំពេលដែលរដ្ឋាភិបាលអាហ្វហ្កានីស្ថាន និងចលនាឧទ្ទាមតាលីបង់ទើបបានចុះកិច្ចព្រមព្រៀងឈប់បាញ់រយៈពេល ៣ថ្ងៃដោយរាប់ចាប់ពីថ្ងៃព្រហស្បតិ៍ ទី១៣ ឧសភា និងចំណុចទី២ អំពើភេរវកម្មបំផ្ទុះគ្រាប់បែកពេលនេះបានកើតមានឡើង ខណៈដែលអាមេរិកទើបបានដកទ័ពរបស់ខ្លួនទាំងអស់ចេញពីមូលដ្ឋានយោធាក្នុងខេត្តកង់ដាហារកាលពីថ្ងៃពុធ ទី១២ ឧសភា។
ព័ត៌មាននេះត្រូវបានបញ្ជាក់ដោយលោកខូយ៉ា យ៉ាយ៉ា អាឡាវី អ្នកនាំពាក្យកងទ័ពអាហ្វហ្កានីស្ថានក្នុងខេត្តកង់ដាហារ។ តាមលោកអាឡាវី ពិធីប្រគល់មូលដ្ឋានយោធារវាងទ័ពអាមេរិក និងទ័ពអាហ្វហ្កានីស្ថានត្រូវធ្វើនៅក្រោយការបិទបញ្ចប់ពិធីតមអាហាររបស់អ្នកកាន់សាសនាអ៊ីស្លាម។ គួររម្លឹកថា មូលដ្ឋានយោធាក្នុងខេត្តកង់ដាហារជាមូលដ្ឋានយោធាដ៏សំខាន់ទី២ ដែលបម្រើឲ្យកម្លាំងទ័ពអាមេរិក និងកម្លាំងទ័ពអន្តរជាតិក្នុងទឹកដីអាហ្វហ្កានីស្ថាន។ មួយវិញទៀត ខេត្តកងដាហារដែលស្ថិតនៅប៉ែកខាងត្បូងប្រទេសធ្លាប់ជាអតីតទីតាំងរបស់ចលនាឧទ្ទាមតាលីបង់។ ក្នុងរយៈពេលប៉ុន្មានខែចុងក្រោយនេះ ខេត្តកង់ដាហារបានក្លាយជាឆាកនៃការប្រឈមមុខដាក់គ្នារវាងកម្លាំងរដ្ឋាភិបាល និងពួកឧទ្ទាមតាលីបង់។
គេនៅមិនទាន់ដឹងថា តើអំពើភេរវកម្មបំផ្ទុះគ្រាប់បែកក្នុងវិហារអ៊ីស្លាមដែលបណ្តាលឲ្យស្លាប់មនុស្សយ៉ាងតិច ១៦នាក់ និងរបួសប្រមាណ ១៥នាក់ក្នុងថ្ងៃសុក្រ ទី១៤ ឧសភាជាទង្វើរបស់អ្នកណាទេ ហើយក៏នៅមិនទាន់មានក្រុមណាចេញមុខសារភាពជាស្នាដៃរបស់ខ្លួនដែរ។ អ្វីដែលគេអាចនិយាយបាន បទឈប់បាញ់ដែលទើបបានចូលជាធរមានក្នុងថ្ងៃទី២ មិនត្រូវបានគោរពត្រឹមត្រូវទេ។ នៅក្នុងអំពើភេរវកម្មកន្លងមក ពិសេសកាលពីថ្ងៃទី៨ ឧសភាទៅលើសាលារៀនសម្រាប់កូនសិស្សស្រីដែលបណ្តាលឲ្យស្លាប់ជាង ៥០នាក់ រដ្ឋាភិបាលបានទម្លាក់ការទទួលខុសត្រូវលើពួកតាលីបង់ ទោះបីជាពួកនេះបន្តបដិសេធក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ