អាហ្វហ្កានីស្ថាន៖ ភេរវកម្មហិង្សាកើនឡើងខ្លាំង ខណៈអាមេរិកកំពុងពិចារណាដកទ័ព
កាលពីថ្ងៃសៅរ៍ទី២០កុម្ភៈ មានហេតុការណ៍ ភេរវកម្មបំផ្ទុះគ្រាប់ចំនួន៣ករណី បានកើតឡើងនៅទីក្រុងកាប៊ូល ប្រទេសអាហ្វហ្កានីស្ថាន ដោយបានសម្លាប់ជីវិតមនុស្សប្រមាណ៥នាក់។ គួរកត់សំគាល់ថា មួយរយៈចុងក្រោយនេះ ហេតុការណ៍ភេរវកម្មបានកើនតឡើង សឹងមិនលស់ថ្ងៃនៅអាហ្វហ្កានីស្ថាន ខណៈដែលសហរដ្ឋអាមេរិក កំពុងពិចារណាថាត្រូវដកទ័ពចេញឬយ៉ាងណា។ អគ្គមេបញ្ជាការកងទ័ពអាមេរិកម្នាក់លើកឡើងថា គឺក្រុមតាលីបង់ ដែលជាអ្នកនៅពីក្រោយអំពើហិង្សាទាំងនេះ។
ចុះផ្សាយនៅថ្ងៃ៖
ស្តាប់ - ០២:១៩
គ្រាប់បែក៣គ្រាប់ត្រូវបានគេដាក់បំផ្ទុះ នៅទីតាំង៣ផ្សេងគ្នា នៅវេលាព្រឹកថ្ងៃសៅរ៍ទី២០កុម្ភៈ នៅទីក្រុងកាប៊ូល។ ទីតាំងកើតហេតុ គឺសុទ្ធតែជាទីប្រជុំជន មានបុគ្គលិករដ្ឋ ទាហាន និងសមត្ថកិច្ចរដ្ឋាភិបាលអាហ្វហ្កានីស្ថាន ឆ្លងកាត់។ ក្នុងចំណោមមនុស្ស៥នាក់ ដែលស្លាប់ គឺមានជនស៊ីវីល និងបុគ្គលិកក្រសួងការពារជាតិអាហ្វហ្កានីស្ថាន២នាក់។ នេះបើផ្អែកតាមការអះអាង របស់អ្នកនាំពាក្យក្រសួងមហាផ្ទៃអាហ្វហ្កានីស្ថាន។
ថ្វីបើភេរវកម្មថ្មីៗនេះ មិនទាន់ត្រូវបានក្រុមណាមួយចេញមុខទទួលថាជាស្នាដៃខ្លួន តែគ្រប់គ្នាបានសម្លឹងទៅកាន់ក្រុមតាលីបង់។ មួយរយៈចុងក្រោយនេះ ហេតុការណ៍ភេរវកម្ម បានកើតមានសឹងតែរៀងរាល់ថ្ងៃ មិនថានៅក្រុងកាប៊ូល ឬនៅទីក្រុងធំៗផ្សេងទៀត របស់អាហ្វហ្កានីស្ថាន។ ក្រៅពីនេះទៀត ករណីធ្វើឃាត សម្លាប់អ្នកកាសែត អ្នកនយោបាយ អ្នកច្បាប់ និងសកម្មជនសិទ្ធិមនុស្ស ក៏បានកើនឡើងខ្លាំងដែរ នៅអាហ្វហ្កានីស្ថាន។ ទោះយ៉ាងណា ក្រុមតាលីបង់ បានអះអាងថាខ្លួនមិនមែនជាអ្នកធ្វើអំពើហិង្សាទាំងនេះទេ គឺមានក្រុមភេរវកម្មផ្សេងទៀត។
ដោយឡែក លោក Kenneth McKenzie មេបញ្ជាការនៃអង្គភាពកណ្តាល របស់កងទ័ពអាមេរិក ដែលបានទៅរដ្ឋធានីអ៊ីស្លាម៉ាបាដ កាលពីថ្ងៃសុក្រ ទី ១៩កុម្ភៈ បានលើកឡើងថា ក្រុមតាលីបង់ គឺជាអ្នកនៅពីក្រោយអំពើភេរវកម្មហិង្សា ដែលកើតមានឡើងជាញឹកញាប់បំផុត នៅអាហ្វហ្កានីស្ថាន។ លោកបន្ថែមថា អំពើហិង្សាបង្កឡើងដោយក្រុមតាលីបង់ គឺសំដៅវាយប្រហារ សម្លាប់សមាជិកនៃក្រុមសមត្ថកិច្ចរដ្ឋ និង សមាជិកកងទ័ពជាតិអាហ្វហ្កានីស្ថាន។ លោកមេបញ្ជាការកងទ័ពអាមេរិករូបនេះ បានថ្លែងថា ស្ថានភាពសុវត្ថិភាពសន្តិសុខ នៅអាហ្វហ្កានីស្ថាន នាពេលនេះ គឺគួរឲ្យបារម្ភខ្លាំងណាស់។
សូមបញ្ជាក់ថា យោងតាមកិច្ចព្រមព្រៀង ដែលរដ្ឋាភិបាលលោកដូណាល់ ត្រាំ បានចុះជាមួយក្រុមតាលីបង់កាលពីខែកុម្ភៈ២០២០ គឺសហរដ្ឋអាមេរិក សន្យាដកទ័ពចេញនៅខែឧសភាឆ្នាំ២០២១នេះ។ តែយ៉ាងណា រហូតមកទល់ពេលនេះ ការចរចាសន្តិភាព រវាងក្រុមតាលីបង់ និងរដ្ឋាភិបាលអាហ្វហ្កានីស្ថាន គឺមិនទៅមុខឡើយ។ សហរដ្ឋអាេមរិក ព្រមទាំងអង្គការអូតង់ កំពុងតែស្ទាក់ស្ទើរ និងគិតល្អិតល្អន់ ថាតើគួរដកទ័ពចេញនៅខែឧសភាឬយ៉ាងណា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ