ស្រីលង្កាកំពុងត្រៀម ប្រឈមនឹងការធ្លាយប្រេងខ្មៅពីនាវា ដែលកំពុងឆេះនិងលិចក្នុងសមុទ្រ
នាវាដឹកទំនិញមួយគ្រឿង បានជួបគ្រោះអគ្គីភ័យតាំងតែពីថ្ងៃទី២០ឧសភា ហើយកំពុងតែលិចទៅក្នុងសមុទ្រ ក្បែរប្រទេសស្រីលង្ការ។ អាជ្ញាធរប្រទេសនេះ កំពុងតែភ័យបារម្ភអំពីការបែកធ្លាយប្រេងខ្មៅចូលទៅក្នុងសមុទ្រ ដែលអាចបង្ករជាមហន្តរាយធម្មជាតិ ដ៏ធ្ងន់ធ្ងរបំផុតមិនធ្លាប់មានសម្រាប់ប្រទេសនេះ។ អាជ្ញាធរស្រីលង្ការ បានសុំជំនួយពីប្រទេសឥណ្ឌាក្បែរខាង ដើម្បីត្រៀមទប់ទល់ជាមួយគ្រោះមហន្តរាយនេះ។
ចុះផ្សាយនៅថ្ងៃ៖
ស្តាប់ - ០២:៥២
អាជ្ញាធរស្រីលង្ការ បានអះអាងថា គេបានស្នើសុំជំនួយ ពីប្រទេសឥណ្ឌា នៅក្នុងប្រតិបត្តិការត្រៀម ទប់ទល់ក្នុងករណីដែលមានប្រេងខ្មៅ ហូរធ្លាយចេញពីនាវា ដែលកំពុងតែលិចនៅក្នុងសមុទ្រ ចំងាយប្រមាណ១៤គីឡូម៉ែត្រពីឆ្នេរ។ គេត្រូវការនូវសម្ភារៈចាំបាច់មួយចំនួន ដើម្បីទប់បង្ឃាំងប្រេងខ្មៅ និងសារធាតុធ្វើឲ្យប្រេងខ្មៅកកជាដើម ដើម្បីងាយស្រួលក្នុងការប្រមូល កើបចេញពីផ្ទៃសមុទ្រ។
សូមបញ្ជាក់ថា នាវា MV X-Press Pearl ដែលមានប្រវែង១៨៦ម៉ែត្រ បានឆេះនៅថ្ងៃទី២០ឧសភា ដោយរហូតមកទល់ពេលនេះ ក្រុមពន្លត់អគ្គីភ័យ មិនទាន់អាចពន្លត់បានទាំងស្រុងនៅឡើយទេ។ ក្រៅពីមានផ្ទុកសារធាតុកំទេចស្នោប្លាស្ទិក ចំនួន២៨កុងទឺនឺ នាវានេះមានផ្ទុកអាស៊ីតស៊ីទ្រិកចំនួន២៥តោន ព្រមទាំងប្រេងខ្មៅចំនួន៣៥០តោនថែមទៀត។ ការបែកធ្លាយអាស៊ីត និងប្រេងខ្មៅ ដ៏សន្ធឹកសន្ធាប់នេះ អាចជាគ្រោះមហន្តរាយធម្មជាតិ ដ៏ធំបំផុត សម្រាប់ប្រទេសស្រីលង្កា។
យោងតាមលិខិតប្រកាស របស់ក្រុមហ៊ុន X-Press Feeders ដែលជាម្ចាស់នាវា នៅព្រឹកថ្ងៃព្រហស្បតិ៍ទី៣មិថុនា គឺផ្នែកខាងក្រោយនៃនាវា បានលិចចូលទៅដល់បាតសមុទ្រហើយ ជម្រៅប្រមាណ២១ម៉ែត្រ ខណៈដែលផ្នែកខាងមុខកំពុងលិចសន្សឹមៗដែរ។ តែយ៉ាងណា ក្រុមឆ្មាំសមុទ្រស្រីលង្ការ អះអាងថា រហូតមកទល់ពេលនេះ គឺនៅពុំទាន់ឃើញមានប្រេងខ្មៅ ហូរធ្លាយចេញពីនាវាចូលក្នុងទឹកសមុទ្រទេ។
គួរបញ្ជាក់ថា ទោះមិនទាន់មានប្រេងហូរធ្លាយទៅក្នុងសមុទ្រ តែឆ្នេរសមុទ្រស្រីលង្ការ ប្រវែងប្រមាណ៨០គីឡូម៉ែត្រ កំពុងតែរងនូវមហន្តរាយរួចទៅហើយ ដោយសារតែបំណែកកំទេចស្នោប្លាស្ទិក ធ្លាយចេញពីកុងទឺនឺ ដែលធ្លាក់ចូលទៅក្នុងសមុទ្រ។ ប្រជានេសាទ ត្រូវបានអាជ្ញាធរហាមឃាត់ មិនឲ្យធ្វើការនេសាទ ក្នុងតំបន់ទាំងនេះ ដោយប្រការនេះ បានធ្វើឲ្យប៉ះពាល់ដល់ជីវភាពរបស់ពួកគេ។ កាលពីថ្ងៃចន្ទទី ៣១ឧសភា លោក Gotabaya Rajapaksa ប្រធានាធិបតីស្រីលង្ការ បានសុំជំនួយពីអាជ្ញាធរអូស្ត្រាលី ដើម្បីវាយតម្លៃការខូចខាត លើប្រព័ន្ធជីវចម្រុះ។
អាជ្ញាធរស្រីលង្ការ បានបើកការស៊ើបអង្កេតព្រហ្មទណ្ឌផងដែរ ទាក់ទិននឹងករណីអគ្គីភ័យនេះ។យោងតាមការអះអាង អគ្គីភ័យលើនាវា គឺបណ្តាលមកពីការបែកធ្លាយអាស៊ីតនីទ្រិក ដែលផ្ទុកនៅលើនាវានេះ។ ក្រុមនាវិកបានសង្កេតឃើញអាស៊ីតហូរធ្លាយលើនាវា តាំងតែពីថ្ងៃទី១១ឧសភា ពោលគឺមុនពេលនាវា បើកចូលមកដល់ដែនទឹកស្រីលង្កា។ សមាជិកក្រុមនាវិកចំនួន៣នាក់ ដែលក្នុងនោះ២នាក់ជាជនជាតិរុស្ស៊ី កំពុងស្ថិតក្នុងការឃុំឃាំងសួរចម្លើយ ហើយមិនអាចចាកចេញពីស្រីលង្កាបានទេ ដរាបណាការស្រាវជ្រាវមិនទាន់ចប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ