តួកម៉េនីស្ថានប្រកាសថា ខ្លួនបានសងប្រាក់បំណុលចិនរួចរាល់អស់ហើយ
ប្រធានាធិបតីរបស់ប្រទេសតួកម៉េនីស្ថាន បានប្រកាសថា ប្រទេសរបស់លោកបានសងបំណុល រាប់ពាន់លានដុល្លារ ដែលតួកម៉េនីស្ថានធ្លាប់បានខ្ចីពីប្រទេសចិន សម្រាប់សាងសង់ បំពង់បង្ហូរឧស្ម័ន ហើយនិងគម្រោងការធ្វើអាជីវកម្មឧស្ម័នផ្សេងទៀត។ នេះបើតាមការចុះផ្សាយរបស់កាសែតក្នុងស្រុកតួកម៉េនីស្ថាន កាលពីថ្ងៃសៅរ៍។ ចិនបានវិនិយោគប្រាក់រាប់ពាន់លានដុល្លារ លើឧស្សាហកម្មផលិតប្រេងឧស្ម័នរបស់ប្រទេសអាស៊ីកណ្តាលមួយនេះ សម្រាប់បំពេញតម្រូវការនាំចូលទៅស្រុកចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
មេដឹកនាំរបស់ប្រទេសអាស៊ីកណ្តាល តួកម៉េនីស្ថានបានអះអាងថា ប្រទេសរបស់លោកបានសងប្រាក់បំណុលចិន គ្រប់ចំនួន និងតាមពេលវេលាកំណត់។ តាមការចុះផ្សាយរបស់កាសែតក្នុងស្រុក ឈ្មោះ Neutralny Turkmenistan ប្រធានាធិបតី តួកម៉េនីស្ថាន លោកGurbanguly Berdymukhamedov បានប្រកាសថា ប្រាក់បំណុលរាប់ពាន់លានដុល្លារ ដែលតួកម៉េនីស្ថានបានខ្ចីពីប្រទេសចិន សម្រាប់ សាងសង់ បំពង់បង្ហូរឧស្ម័ន និងគម្រោងអភិវឌ្ឍន៍ តំបន់ប្រេង Galkynysh គឺត្រូវបានតួកម៉េនីស្ថានសងរួចរាល់អស់ហើយ។
នៅក្នុងអត្ថបទចុះផ្សាយរបស់កាសែតផ្លូវរដ្ឋខាងលើ ឧបនាយករដ្ឋមន្រ្តីទទួលបន្ទុកប្រេង និងឧស្ម័ន តួកម៉េនីស្ថាន Shakhum Abdurakhmanov បាននិយាយដែរថា ធនាគារអភិវឌ្ឍន៍ចិន ក៏បានទទួលដំណឹងពីការបង់សងប្រាក់បំណុលទាំងអស់ ពីតួកម៉េនីស្ថានរួចហើយដែរ។
ទាំងប្រធានាធិបតី និងឧបនាយករដ្ឋមន្រ្តីតួកម៉េនីស្ថានមិនបានបញ្ជាក់ពីទំហំប្រាក់បំណុល ដែលតួកម៉េនីស្ថានអះអាងថា បានសងរួចរាល់ទៅប្រទេសចិននោះទេ។ ប៉ុន្តែ នៅក្នុងអំឡុងទស្សនកិច្ចទៅតួកម៉េនីស្ថាន នៅឆ្នាំ ២០១១ ប្រធានធនាគារអភិវឌ្ឍចិន នៅជំនាន់នោះ គឺលោកJiang Chaoliang បាននិយាយថា ធនាគារបានផ្តល់ប្រាក់កម្ចី ចំនួន ៨,១ពាន់លានដុល្លារ សម្រាប់ឲ្យតួកម៉េនីស្ថាន សាងសង់បំពង់បង្ហូរប្រេង និង សម្រាប់គម្រោង តំបន់ប្រេង Galkynysh ដែលជាតំបន់ប្រេង ឧស្ម័នធំលេខពីរ ក្នុងពិភពលោក។
តួកម៉េនីស្ថាន ប្រទេសក្នុងអតីតសហភាពសូវៀត ដែល មានប្រជាជនជាង ៦លាននាក់ ទើបរកឃើញជង្រុកប្រេង និងឧស្ម័នដ៏សំខាន់ នៅឆ្នាំ ២០០៦។ ប្រទេសចិន ដែលស្ថិតនៅ រំលងមួយប្រទេស ពីតួកម៉េនីស្ថានបានវិនិយោគទឹកប្រាក់រាប់ពាន់លានដុល្លារ សម្រាប់ ក្លាយជាប្រទេស ទិញនាំចេញឧស្ម័ន និងប្រេងធំជាងគេរបស់តួកម៉េនីស្ថាន។
ដោយឆ្លងកាត់ប្រទេស អ៊ូប៊ែរគីស្ថាន និងកាហ្សាក់ស្ថាន បំពង់បង្ហូរឧស្ម័ន ដែលមានឈ្មោះថា ចិនអាស៊ីកណ្តាល បានចាប់ផ្តើមបង្ហូរឧស្ម័ន ទៅប្រទេសចិន តាំងពីឆ្នាំ ២០០៩។ សព្វថ្ងៃនេះ បំពង់បង្ហូរឧស្ម័ននេះ មានបែងចែកជាបីខ្សែ ចំណែកខ្សែទី៤ ដែលត្រូវឆ្លងកាត់ប្រទេសអាស៊ីកណ្តាលពីរទៀត គឺ គៀរហ្ស៊ីគីស្ថាន និងតាហ្ស៊ីគីស្ថាន កំពុងស្ថិតក្នុងគម្រោងការសាងសង់។
ក្នុងមួយឆ្នាំៗ តួកម៉េនីស្ថាននាំចេញ ឧស្ម័នប្រមាណ ៣០ពាន់លានម៉ែត្រគូប ទៅ ប្រទេសចិន ពោលគឺ ដល់ទៅ ៦ ឬ ៧ដង ច្រើន ជាង រុស្ស៊ី ដែលជាប្រទេសជិតខាង ទិញឧស្ម័នដ៏ច្រើនពីតួកម៉េនីស្ថាន។
ជារឿយៗ តួកម៉េនីស្ថាន បង្ហាញកំណើនសេដ្ឋកិច្ច ក្នុងស្រុក ប៉ុន្តែ របាយការណ៍របស់ក្រុមការពារសិទ្ធិមនុស្ស អន្តរជាតិធ្លាប់និយាយពីវិបត្តិរូបិយប័ណ្ណ ស្បៀងអាហារសម្រាប់ប្រជាជន។ នៅដើមឆ្នាំនេះ ជារឿងដែលកម្របំផុត ប្រធានាធិបតី តួកម៉េនីស្ថាន ដែលដឹកនាំប្រទេស ១៤ឆ្នាំមកហើយ បានចេញមុខ ទទួលស្គាល់ថា ប្រទេសរបស់លោកមានបញ្ហាសេដ្ឋកិច្ច និងទទូចសុំ ឲ្យម្ចាស់បំណុល ពន្យារទុកពេលឲ្យបន្ថែមទៀត។ ៩០ភាគរយ នៃប្រេងឧស្ម័នរបស់តួកម៉េនីស្ថាន ត្រូវលក់នាំចេញទៅបរទេស ដូច្នេះ តួកម៉េនីស្ថាន អាចជួបវិបត្តិសេដ្ឋកិច្ច ដោយងាយ នៅពេល តម្លៃប្រេងធ្លាក់ចុះថ្លៃ នៅទីផ្សារអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ