ចិនបរិហារសេចក្តីថ្លែងការណ៍រួមរបស់ក្រុមប្រទេសមហាឧស្សាហកម្មG៧
នៅថ្ងៃចន្ទទី ១៤មិថុនានេះ ចិនបានប្រកាសបរិហារ សេចក្តីថ្លែងការណ៍រួម របស់មេដឹកនាំនៃក្រុមប្រទេសមហាឧស្សាហកម្មG៧ ដែលរិះគន់ចិន។ សម្រាប់ប៉េកាំងសេចក្តីថ្លែងការណ៍នោះ ជាការជ្រៀតជ្រែកកិច្ចការផ្ទៃក្នុងចិន និងមានទម្រង់ជាការ មួលបង្កាច់ការពិតដែលកើតឡើងនៅក្នុងប្រទេស។ ប៉េកាំងបានជំរុញឱ្យក្រុមមហាអំណាចបញ្ឈប់សកម្មភាពបរិហារកេរ្ត៍ចិន ព្រោះការអធនរបស់ចិនមានកំរិត។
ចុះផ្សាយនៅថ្ងៃ៖ កែប្រែថ្ងៃទី៖
តាមរយៈស្ថានទូតចិនប្រចាំទីក្រុងឡុងដ៍ ប៉េកាំងបានសម្តែងការខឹងសម្បារ និងការប្រឆាំងយ៉ាងដាច់ណាត់ ចំពោះសេចក្តីថ្លែងការណ៍របស់G៧ ដែលមានសរសេរទាក់ទងនឹងតំបន់ស៊ីនជាំង ហុងកុង និងតៃវ៉ាន់ ព្រោះវាបានប្តូរទម្រង់នៃហេតុការណ៍ និងជាការលាតត្រដាងនូវចេតនារបស់ប្រទេសខ្លះ ដូចយ៉ាងសហរដ្ឋអាមេរិក។
“ចិនជាប្រទេសសន្តិនិយម ដែលផ្តល់តម្លៃដល់កិច្ចសហប្រតិបត្តិការអន្តរជាតិ ប៉ុន្តែការអធនរបស់ចិនមានកំរិត ! ដូច្នេះសូមកុំជ្រៀតជ្រែកកិច្ចការផ្ទៃក្នុងចិន សូមកុំមួលបង្កាច់ និងធ្វើឱ្យខូចឈ្មោះ ឬលួចប្រយោជន៍ចិនឱ្យសោះ ! នេះបើតាមសំណេររបស់ស្ថានទូតចិន ដោយលម្អិតទៀតថា ចិនការពារយ៉ាងមុះមុតអធិបតេយ្យភាពជាតិ សន្តិសុខ និងផលប្រយោជន៍អភិវឌ្ឍន៍ជាតិ ហើយប្រឆាំងដាច់ខាតរាល់គ្រប់ទម្រង់នៃភាពអយុត្តិធម៌ និងការរំលោភប៉ះពារលើចិន។”
សម្រាប់ចិន ក្នុងខណៈនេះ សហគមន៍អន្តរជាតិ ត្រូវការការរួបរួមគ្នានិងកិច្ចសហប្រតិបត្តិការជាមួយគ្រប់ប្រទេស ដើម្បីប្រឈមនឹងជំងឺរាតត្បាតសាកលកូវីដ១៩ និងស្រោចស្រង់សេដ្ឋកិច្ចពិភពលោក មិនមែនត្រូវការនយោបាយបែបបង្ហាញអំណាចសាបព្រោះការបែកបាក់ទេ។ សហរដ្ឋអាមេរិកនិងក្រុមប្រទេស G៧ គួរតែគោរពនិងយល់អំពីស្ថានការណ៍ ហើយឈប់បង្កភាពប្រឈមដាក់ចិន និងឈប់ធ្វើនយោបាយលើការអង្កេតរកប្រភពជំងឺកូវីដ១៩។ នេះបើតាមស្ថានទូតចិនដដែល។
សូមបញ្ជាក់ថា នៅល្ងាចថ្ងៃអាទិត្យទី ១៣មិថុនា ក្រោយការបិទបញ្ចប់ជំនួបប្រជុំកំពូលរបស់ខ្លួន ក្រុមប្រទេសមហាឧស្សាហកម្មG៧ បានចេញសេចក្តីថ្លែងការណ៍រួម អំពាវនាវឱ្យចិនគោរពសិទ្ធិមនុស្ស នៅតំបន់ស៊ីនជាំងដែលមានប្រជាពលរដ្ឋភាគច្រើនកាន់សាសនាអ៊ីស្លាម បង្កើនស្វ័យភាពដល់ហុងកុងឱ្យបានច្រើនជាងមុន និងផ្តល់តម្លៃដល់សន្តិភាព និងស្ថិរភាពតំបន់ច្រកសមុទ្ទតៃវ៉ាន់ ព្រមទាំងទាមទារបើកអង្កេតស៊ីជម្រៅនិងពេញលេញរកប្រភពនៃ កូរ៉ូណាវីរ៉ុសទៀត។ ជាសេចក្តីថ្លែងការណ៍រួមដែលបញ្ជាក់អំពីភាពចាំបាច់នៃការរួមកម្លាំងគ្នា ដើម្បីប្រឈម និងទប់ទល់ចិន តាំងពី ក្នុងបុព្វហេតុការពារប្រជាធិបតេយ្យរហូតដល់ការប្រជែងផ្នែកបច្ចេកវិទ្យា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ