អាជ្ញាធរថៃបើកកោះភូកេត ទទួលទេសចរណ៍បរទេស ដែលបានចាក់វ៉ាក់សាំងរួចទាំង២ដូស
ដើម្បីស្រោចស្រង់វិស័យទេសចរណ៍ ដែលជាដង្ហើមសេដ្ឋកិច្ចដ៏សំខាន់របស់ថៃ ចាប់ពីថ្ងៃទី១កក្កដានេះទៅ អាជ្ញាធរថៃ បានបើកកោះភូកេត ដែលជាកោះទេសចរណ៍ដ៏ល្បីមួយរបស់ខ្លួន ដើម្បីទទួលភ្ញៀវទេសចរណ៍បរទេស។ ភ្ញៀវទេសចរណ៍ដែលមកដល់កោះភូកេត នឹងមិនមានកាតព្វកិច្ចត្រូវធ្វើចត្តាឡីស័កទេ ក៏ប៉ុន្តែ ត្រូវតែបានទទួលការចាក់វ៉ាក់សាំង រួចរាល់ទាំង២ដូស។
ចុះផ្សាយនៅថ្ងៃ៖
ស្តាប់ - ០២:៣៤
យន្តហោះដឹកអ្នកដំណើរ បានចាប់ផ្តើមចុះចត នៅព្រលានយន្តហោះកោះភូកេត នៅវេលាម៉ោងប្រមាណជា១១ព្រឹក បន្ទាប់ពីរដ្ឋាភិបាលថៃ បានសម្រេចបើកខេត្តនេះ ដើម្បីទទួលភ្ញៀវទេសចរណ៍បរទេសឡើងវិញ។ នៅក្នុងថ្ងៃ១កក្កដា ដែលជាថ្ងៃទីមួយ នៃការអនុវត្តវិធានការថ្មីនេះ មានភ្ញៀវទេសចរណ៍បរទេស យ៉ាងហោច ២៥០នាក់ បានធ្វើដំណើរមកដល់កោះភូកេត ដែលស្ងាត់ជ្រងំខុសពីសព្វមួយដង។
ដើម្បីស្រោចស្រង់វិស័យទេសចរណ៍ រដ្ឋាភិបាលថៃ បានសម្រេចបើកកោះទេសចរណ៍ដ៏ល្បីល្បាញរបស់ខ្លួននេះ បើទោះបីជាស្ថានភាពឆ្លងរាលដាលកូវីដ១៩ នៅក្នុងប្រទេសថៃ មានលក្ខណៈកាន់តែធ្ងន់ធ្ងរយ៉ាងណាក្តី ក្នុងអំឡុងពេលនេះ។ តែយ៉ាងណា អាជ្ញាធរថៃ អះអាងថា ខេត្តភូកេត មិនស្ថិតក្នុងស្ថានភាពធ្ងន់ធ្ងរដូចតំបន់ផ្សេងទៀតទេ។ ប្រជាជននៅលើកោះនេះ ប្រមាណជា៧០% បានទទួលការចាក់វ៉ាក់សាំង យ៉ាងហោចចំនួន១ដូសហើយ។
យ៉ាងណាក៏ដោយ អាជ្ញាធរថៃ បានដាក់លក្ខខណ្ឌមួយចំនួន ទាក់ទិននឹងការបើកកោះភូកេតនេះ។ ភ្ញៀវទេសចរណ៍ ដែលអាចចូលមកកោះភូកេត គឺត្រូវតែ បានទទួលការចាក់វ៉ាក់សាំងរួចរាល់ទាំង២ដូស។ ពេលមកដល់ ពួកគេពុំមានកាតព្វកិច្ចធ្វើចត្តាឡីស័កទេ ក៏ប៉ុន្តែ គឺត្រូវនៅលើកោះភូកេតនេះ រយៈពេលយ៉ាងហោច១៤ថ្ងៃសិន មុននឹងអាចធ្វើដំណើរ ទៅទីកន្លែងផ្សេងទៀត នៅក្នុងប្រទេសថៃ។ ក្នុងអំឡុងពេលស្នាក់នៅលើកោះភូកេត ភ្ញៀវទេសចរណ៍ត្រូវធ្វើតេស្ត (PCR) រកកូវីដ ចំនួន៣ដង។ មួយវិញទៀត មិនមែនគ្រប់ភ្ញៀវទេសចរណ៍បរទេស សុទ្ធតែអាចមកបានទេ គឺបានតែជនបរទេស ដែលមកពីប្រទេសចំនួន៦៦ប្រទេសតែប៉ុណ្ណោះ ដែលរដ្ឋាភិបាលថៃ ចាត់ទុកថា គ្មានស្ថានភាពធ្ងន់ធ្ងរ ទាក់ទិននឹងបញ្ហាកូវីដ។
គួរបញ្ជាក់ថា វិស័យទេសចរណ៍ មានចំណែក១ភាគ៥នៃទំហំសេដ្ឋកិច្ចថៃ។ មុនមានវិបត្តិកូវីដ១៩ មានទេសចរណ៍បរទេសចំនួនប្រមាណ៤០លាននាក់ មកលេងនៅថៃ ជារៀងរាល់ឆ្នាំ។ នៅភូកេត ក៏ដូចជានៅតំបន់ទេសចរណ៍ល្បីៗផ្សេងទៀត ៩០%នៃសណ្ឋាគារ ហាងទំនិញត្រូវបិទទ្វារ ហើយជាពិសេសនោះ អ្នកលក់ដូរតូចតាច បានបាត់បង់ចំណូលទាំងស្រុង។ តាមការគ្រោងទុក រដ្ឋាភិបាលថៃ នឹងអនុវត្តវិធានការបើកទទួកភ្ញៀវទេសចរណ៍បរទេស នៅកោះសាមុយ ក្នុងរវាងខែកក្កដានេះដែរ ដោយអនុវត្តលក្ខខណ្ឌប្រហាក់ប្រហែលគ្នា ទៅនឹងកោះភូកេត។
តែយ៉ាងណាក៏ដោយ លោក កុងសាក់ ឃូភុងសាកន ប្រធានសមាគមក្រុមសណ្ឋាគារភាគខាងត្បូងប្រទេសថៃ បានលើកឡើងថា លក្ខខណ្ឌទាំងអស់នេះ តឹងតែងពេកណាស់ ដែលធ្វើឲ្យគ្មានទេសចរណ៍ណាហ៊ានមកទេ។ ប្រសិនបើនៅខែតុលា រដ្ឋាភិបាលមិនដកចេញ នូវការលក្ខខណ្ឌទាំងនេះទេ រដូវកាលទេសចរណ៍ថ្មីនេះ នឹងត្រូវឆាចោលទៀតហើយ ហើយសណ្ឋាគារភាគច្រើន ប្រាកដជាត្រូវរលំ បិទទ្វារជារៀងរហូត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ