ថៃ មានផ្ទុះរោងចក្រប្លាស្ទិក ស្លាប់យ៉ាងហោចណាស់ម្នាក់
នៅវេលាម៉ោងបី ទៀបភ្លឺ ព្រហាមថ្ងៃចន្ទទី ៥កក្កដា ២០២១នេះ មានហេតុការណ៍ផ្ទុះរោងចក្រប្លាស្ទិក ក្បែរអាកាសយានដ្ឋានអន្តរជាតិក្រុងបាងកក។ មានស្លាប់យ៉ាងហោចណាស់ម្នាក់ និងរបួស ២៧នាក់។ នេះបើតាមតួលេខផ្តល់ដោយអាជ្ញាធរថៃ ដែលបានគូសបញ្ជាក់ថាប្រតិបត្តិការជម្លៀសប្រជាជនពលរដ្ឋមិនទាន់បញ្ចប់ទេ គិតមកទល់នឹងពេលរសៀល។
ចុះផ្សាយនៅថ្ងៃ៖
ស្តាប់ - ០១:៤៧
ហេតុការណ៍ផ្ទុះឆេះ បានកើតឡើងនៅក្នុងរោងចក្រផលិតប្លាស្ទិក របស់ក្រុមហ៊ុនតៃវ៉ាន់ Ming Dih Chemical Co ដែលស្ថិតនៅជិតបង្កើយនឹងអាកាសយានដ្ឋានអន្តរជាតិថៃ។ ស្នូរផ្ទុះបានលាន់ឮខ្លាំង អមដោយអគ្គីភ័យយ៉ាងសន្ធោសន្ធៅ ឆាបឆេះរោងចក្រ និងអគារ ព្រមទាំងផ្ទះសម្បែងជាច្រើនខ្នងទៅជុំវិញនោះ ក្នុងរង្វង់អង្កត់ផ្ចិតប្រមាណ១គីឡូម៉ែត្រ។ រហូតដល់ថ្ងៃត្រង់ហើយ ផ្សែងខ្មៅឆេះហុយទ្រលោម នៅអណ្តែតពេញផ្ទៃមេឃ អាចមើលឃើញ ពីកណ្តាលទីក្រុងបាងកកដែលស្ថិតនៅចម្ងាយ៣៥គីឡូម៉ែត្រពីរោងចក្រទៀត។
បើតាមសេចក្តីប្រកាសរបស់ចៅសង្កាត់ បង់ភ្លី នៅក្នុងចំណោមអ្នកស្លាប់មានម្នាក់ជាក្រុមពន្លត់អគ្គីភ័យ។ ចំណែកជនរងរបួស ច្រើនជាគ្រោះថ្នាក់មុតដាច់រលាត់សាច់។
ដោយខ្លាចក្រែងថានឹងអាចមានករណីផ្ទុះបន្តទៀត អាជ្ញាធរបានណែនាំពលរដ្ឋមិនឱ្យគេចខ្លួនយ៉ាងហោចចម្ងាយកន្លះគីឡូម៉ែត្រពីកន្លែងកើតហេតុ និងបានសម្រេចជម្លៀសប្រជាពលរដ្ឋរស់នៅតំបន់ជុំវិញរោងចក្រ ប្រមាណជាង៥០០នាក់ ទៅកាន់ទីកន្លែងមានសុវត្ថិភាព ដែលស្ថិតនៅចម្ងាយ៩គីឡូម៉ែត្រ។ នេះបើតាមការលម្អិតរបស់នគរបាលថៃ ដោយគូសបញ្ជាក់ទៀតថា ដរាបណាអគ្គីភ័យនៅ មិនទាន់ពន្លត់បាន គេមិនទាន់អាចកំណត់បានអំពីមូលហេតុនៃការផ្ទុះឆេះនៅរោងចក្រប្លាស្ទិកនេះទេ។
ប្រតិបត្តិការសង្គ្រោះ បន្តធ្វើរហូតដល់រសៀលថ្ងៃចន្ទទី ៥កក្កដា ពេញមួយសង្កាត់តែម្តង ដើម្បីជម្លៀសប្រជាពលរដ្ឋរាប់ពាន់ផ្សេងទៀតឱ្យចាកចេញពីលំនៅឋានសិន។
សូមបញ្ជាក់ថា រោងចក្រផលិតស្នោប្លាស្ទិករបស់ក្រុមហ៊ុនតៃវ៉ាន់ មានឃ្លាំងស្តុកសារធាតុគីមី ប្រមាណ ៥០តោន ក្នុងឃ្លាំងចំនួន៥ទៅ៦ដាច់ដោយឡែកពីគ្នា ក្នុងបរិវេណរបស់រោងចក្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ