មជ្ឈមណ្ឌលនុយក្លេអ៊ែរTaishan ចិនផ្អាកដំណើរការ ក្រោយមានគ្រោះថ្នាក់
មួយខែកន្លះក្រោយហេតុការណ៍គ្រោះថ្នាក់ នៅមជ្ឈមណ្ឌលនុយក្លេអ៊ែរថៃសានមក ភ្នាក់ងារថាមពលនុយក្លេអ៊ែរចិន CGN បានប្រកាសនៅថ្ងៃសុក្រទី ៣០កក្កដា ២០២១ ផ្អាកដំណើរម៉ាស៊ីនប្រតិករនុយក្លេអ៊ែរមួយរយៈដើម្បីជួសជុល។ មជ្ឈមណ្ឌលនុយក្លេអ៊ែរថៃសាន Taishan ជារោងចក្រនុយក្លេអ៊ែរដែលមានបំពាក់ម៉ាស៊ីនប្រតិករទំនើបចុងក្រោយប្រើបច្ចេកវិទ្យាបារាំងដំបូងគេបង្អស់នៅលើពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ដោយឈរលើគោលការណ៍រក្សាសុវត្ថិភាពជាអាទិភាពចំបង មជ្ឈមណ្ឌលនុយក្លេអ៊ែរ ថៃសាន នឹងបញ្ឈប់ដំណើរការម៉ាស៊ីនប្រតិករទី១របស់ខ្លួន ដើម្បីជួសជុល និងដើម្បីស្វែករកមូលហេតុដែលនាំឱ្យមានគ្រោះថ្នាក់ប៉ះពាល់ដល់គ្រឿងចំហេះផង ព្រមទាំងដើម្បីប្តូរផ្លាស់ស្នូលនុយក្លេអ៊ែរខូចចេញផង។ នេះបើតាមសេចក្តីថ្លែងការណ៍របស់ភ្នាក់ងារនុយក្លេអ៊ែរចិនCGN ដោយគូសបញ្ជាក់ទៀតថា សេចក្តីសម្រេចនេះធ្វើឡើងក្រោយមានកិច្ចពិភាក្សាហ្មត់ចត់រវាងអ្នកបច្ចេកទេសចិននិងបារាំង។
ការបញ្ឈប់ដំណើរការម៉ាស៊ីនប្រតិករនុយក្លេអ៊ែរ មិនមែនដោយហេតុអាចមានគ្រោះថ្នាក់កើតឡើង ក្នុងពេលឆាប់ៗឡើយ។ គ្រោះថ្នាក់កាលពីថ្ងៃទី ១៤មិថុនា បង្កឱ្យមានការខូចខាតប៉ះពាល់ដល់បណ្តូលចំហេះមែន តែជាការខូចខាតអាចទទួលនិងបន្តដំណើរការបានតាមបែបបច្ចេកទេស។ បណ្តូលចំហេះ ដែលមានជាតិអ៊ុយរ៉ានីញ៉ូម និងដែលជាអ្នកផ្តល់ថាមពល ឬជាស្នូលរបស់ប្រតិករនុយក្លេអ៊ែរ តែងតែខូច ជាញឹកញយធម្មតា។ ម៉ាស៊ីនប្រតិករ នៅតែអាចដំណើរការបានប្រកបដោយស្ថិរភាពដដែលទេ។ នេះបើតាមការគូសបញ្ជាក់បន្ថែមរបស់ក្រុមហ៊ុន។
កាលពីសប្តាហ៍មុន ក្រុមហ៊ុនអគ្គីសនីបារាំងEDF បានប្រកាសជាសាធារណៈថា ប្រសិនបើគ្រោះថ្នាក់កើតឡើងក្នុងមជ្ឈមណ្ឌលនុយក្លេអ៊ែរនៅលើទឹកដីបារាំង ក្រុមហ៊ុននឹងសម្រេចផ្អាកម៉ាស៊ីនប្រតិករភ្លាម។ តែមជ្ឈមណ្ឌលនុយក្លេអ៊ែរ ថៃសាន ស្ថិតនៅលើទឹកដីចិន។ ដូច្នេះសេចក្តីសម្រេចត្រូវស្ថិតនៅលើក្រុមហ៊ុនTNP JVC ដែលជាអ្នកគ្រប់គ្រងរោងចក្រ។ ក្រុមហ៊ុនអគ្គីសនីបារាំង មានភាគហ៊ុនតែ៣០% ចំណែក៧០%ទៀតជារបស់ក្រុមហ៊ុននុយក្លេអ៊ែរចិន CGN។ ម្យ៉ាងទៀតEDF គ្រាន់តែជាអ្នកផ្តល់បច្ចេកវិទ្យានុយក្លេអ៊ែរEPRប៉ុណ្ណោះ មិនមែនជាគ្រប់គ្រងនិងធ្វើផលិតកម្មរោងចក្រនុយក្លេអ៊ែរនេះទេ។
សូមបញ្ជាក់ថាមជ្ឈមណ្ឌលអគ្គសនី ថៃសាន ដែលស្ថិតនៅខេត្តក្វាងទុងភាគខាងត្បូងប្រទេសចិន ជារោងចក្រនុយក្លេអ៊ែរដែលមានបំពាក់ម៉ាស៊ីនប្រតិករទំនើបចុងក្រោយ របស់បារាំងហៅកាត់ថា EPR ដំបូងគេបង្អស់នៅលើពិភពលោក។ ម៉ាស៊ីនប្រតិករប្រើបច្ចេកវិទ្យាEPRបារាំងនេះ ល្បីថាផ្តល់ថាមពលខ្លាំង ហើយមានសុវត្ថិភាពខ្ពស់ប្រសើរជាងរោងចក្រនុយក្លេអ៊ែរចាស់ៗ និងជាមោទនភាពនៃវិស័យថាមពលនុយក្លេអ៊ែរបារាំងផង និងជាអំនួតរបស់ក្រុមហ៊ុនអគ្គីសនីបារាំង EDFផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ