ប៉ូលិសថៃ បាញ់ឧស្ម័នបង្ហូរទឹកភ្នែក លើហ្វូងបាតុករគាំទ្រលទ្ធិប្រជាធិបតេយ្យ
នៅក្រុងបាំងកក ថ្ងៃសៅរ៍ ទី៧សីហា បាតុករគាំទ្រលទ្ធិប្រជាធិបតេយ្យថៃ បានប្រមូលផ្តុំគ្នារាប់រយនាក់ ធ្វើបាតុកម្មប្រឆាំងនឹងរដ្ឋាភិបាល។ ពួកគេប្រឆាំងនឹងចំណាត់ការរបស់រដ្ឋអំណាចថៃ ដែលចាត់ចែងទប់ទល់ជំងឺកូវីដ មិនបានល្អ ហើយក៏ប្រឆាំងនឹងរដ្ឋអំណាចរបស់លោកនាយករដ្ឋមន្ត្រី ប្រាយុទ្ធ ចាន់ អូចា ដែលប្រើច្បាប់ប្រមាថព្រះមហាក្សត្រ ដើម្បីបំបិទមាត់ក្រុមជំទាស់។ បាតុករថៃ បានដុតឡានប៉ូលីស ហើយប៉ូលិសបានចាប់ខ្លួនបាតុករមួយចំនួនដែរ។
ចុះផ្សាយនៅថ្ងៃ៖
ស្តាប់ - ០២:១៧
កម្មវត្ថុរបស់ហ្វូងបាតុករថៃ គឺ ទាមទារឲ្យរដ្ឋាភិបាលកែប្រែនយោបាយ ចាត់ចែងវិធានការទប់ស្កាត់កូវីដ១៩។ បាតុករថៃ ចង់ឲ្យរដ្ឋអំណាចក្រុងបាំងកក ទិញថ្នាំបង្ការគុណភាពខ្ពស់ ដូចជា Pfizer ឬ Moderna ដែលពួកគេយល់ថា ល្អជាងវ៉ាក់សាំង Sinovac របស់ចិន។ Sinovac ដែលពួកបាតុករថៃ គិតថា មិនសូវមានប្រសិទ្ធភាព និងទប់ទល់មិនឈ្នះនឹង មេរោគកូវីដ បំប្លែងខ្លួន Delta។
តាមទីភ្នាក់ងារព័ត៌មានបារាំងAFP ស្រុកថៃ មានឆ្លងកូវីដចំនួន ជាង ២២ ០០០នាក់ ហើយស្លាប់មនុស្ស ជាង ២១០ នាក់។ ក្នុងចំណោម ប្រជាជនសៀម ប្រមាណ ៧០លាននាក់ ពេលនេះ មានតែជាង ៤លាន ៥សែន នាក់ ប៉ុណ្ណោះ ដែលបានទទួលថ្នាំបង្ការ គ្រប់២លើក។ ហេតុដូច្នេះហើយ ទើបបាតុករថៃ សសេរបដាថា «រដ្ឋាភិបាលអសមត្ថភាព» «ចុះចេញពីតំណែងទៅ!» និងចោទថា«រដ្ឋាភិបាលឧក្រិដ្ឋ!»។
កាលពីថ្ងៃព្រហស្បតិ៍ អ្នកនាំពាក្យរដ្ឋាភិបាលថៃ បានថ្លែងថា ពីពេលនេះដល់ចុងឆ្នាំ រដ្ឋសង្ឃឹមថា នឹងចាក់ថ្នាំបង្ការឲ្យប្រជាជន ចំនួន១០លានដូស ក្នុងមួយខែៗ។ តែពលរដ្ឋហ្វូងបាតុករ នៅថ្ងៃសៅរ៍ ថានឹងមិនឈប់តវ៉ា និងមិនទម្លាក់ដៃ ឈប់ធ្វើបាតុកម្មឡើយ។
ទន្ទឹមនឹងរឿងនេះ ហ្វូងបាតុករគាំទ្រលទ្ធិប្រជាធិបតេយ្យថៃ ក៏បានកម្តៅសំណុំរឿងចាស់ គឺច្បាប់ប្រឆាំងនឹងការជេរប្រមាថព្រះមហាក្សត្រនិងខ្សែរាជវង្ស។ បាតុករថៃ ទាមទារឲ្យរំលាយច្បាប់ឥតប្រយោជន៍នេះចោលទៅ។ ចំពោះពួកគេ ក៏ដូចជាអង្គការសង្គមស៊ីវិលដែរ ច្បាប់របៀបនេះ គួរតែគ្មានទេ ក្នុងប្រទេសប្រជាធិតេយ្យ។
សូមជ្រាបថា ក្រោមច្បាប់ប្រឆាំងនឹងការជេរប្រមាថស្តេចថៃ គឺនគរបាលបានចាប់ខ្លួនបាតុករនិងអ្នកប្រឆាំង ប្រមាណជាង ១១០នាក់ហើយ។ អ្នកខ្លះ ត្រូវដោះលែង ដោយបង់ប្រាក់ធានាខ្លួន តែអ្នកខ្លះទៀត ដែលជាក្បាលម៉ាស៊ីនដឹកនាំបាតុកម្ម ត្រូវតុលាការថៃ កាត់ទោសឲ្យជាប់គុក ដោយបូកបញ្ចូលករណីល្មើសជាច្រើនចំណុច រហូតស្ថានទម្ងន់ទោស ត្រូវជាប់ពន្ធនាគារ ៦០ឆ្នាំ ហើយខ្លះទៀត ៣០ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ