ពិភពលោកប្រតិកម្មទៅនឹងរបាយការណ៍ទាញសញ្ញាអាសន្នពីគ្រោះមហន្តរាយអាកាសធាតុ
តាំងពីនាយករដ្ឋមន្រ្តី រហូតមកដល់អង្គការ និងសកម្មជនដើម្បីបរិស្ថាន បានបញ្ចេញប្រតិកម្មជាបន្តបន្ទាប់ ទៅនឹងរបាយការណ៍របស់ក្រុមជំនាញអន្តរដ្ឋាភិបាល ស្តីពីអាកាសធាតុ ដែលទាញសញ្ញាអាសន្ន និងខ្សែបន្ទាត់ក្រហមសម្រាប់មនុស្សជាតិលើផែនដី។ របាយការណ៍ ចេញផ្សាយកាលពីថ្ងៃចន្ទ បានព្រមានពីគ្រោះមហន្តរាយអាកាសធាតុធ្ងន់ធ្ងរ សម្រាប់មនុស្សជាតិដែលកំពុងរងគ្រោះរួចហើយ ដោយសារអាកាសធាតុក្តៅខ្លាំង ភ្លើងឆេះព្រៃ និងខ្យល់ព្យុះ ទឹកជំនន់។
ចុះផ្សាយនៅថ្ងៃ៖
ការឡើងកម្តៅផែនដី ១,៥អង្សានឹងអាចកើតមាននៅអំឡុង ឆ្នាំ២០៣០ គឺនៅ៩ឆ្នាំខាងមុខ ប៉ុន្តែ មិនមែននៅឆ្នាំ ២០៤០ ដូចដែលអ្នកវិទ្យាសាស្រ្តធ្លាប់បានព្យាករទុក កាលពី៣ឆ្នាំមុននោះទេ។ នេះជាដំណឹងដ៏គួរឲ្យរន្ធត់ តក់ស្លុត។
តាមរបាយការណ៍របស់ក្រុមជំនាញអន្តរដ្ឋាភិបាលស្តីពីអាកាសធាតុ ការកើនឡើងកម្តៅផែនដី ១,៥អង្សានឹងធ្វើឲ្យជីវិតនៅផែនដី កាន់តែប្រឈមនឹងគ្រោះមហន្តរាយធម្មជាតិ ធ្ងន់ធ្ង ញឹកញាប់ ដែលមិនធ្លាប់មាន ពីមុនមក។
សម្រាប់រដ្ឋមន្រ្តីការបរទេសអាមេរិក លោកអង់តូនី ប្លីងកិន ពិភពលោកមិនអាចពន្យារតទៅទៀត ដើម្បី ចាត់វិធានការអាកាសធាតុ ដ៏មានមហិច្ឆតានោះទេ។ ប្រតិកម្មទៅនឹងរបាយការណ៍របស់ក្រុមអ្នកជំនាញអាកាសធាតុរបស់អង្គការសហប្រជាជាតិ ប្រមុខការបរទេសអាមេរិក បានអំពាវនាវឲ្យថ្នាក់ដឹកនាំក្នុងពិភពលោក ក្រុមឯកជន និងគ្រប់បុគ្គល ចាត់វិធានការ ធ្វើការរួមគ្នាជាបន្ទាន់ និងធ្វើគ្រប់បែបយ៉ាង ដើម្បីការពារផែនដី អនាគតមនុស្សជាតិ នៅទសវត្សរ៍នេះ និងនៅថ្ងៃអនាគត។
សម្រាប់អតីតប្រធានាធិបតីប្រទេសកោះម៉ាល់ឌីវ ជាមួយការលើកឡើង ពីការកើនឡើងកំពស់ទឹកសមុទ្រ របាយការណ៍របស់អ្នកជំនាញអាកាសធាតុ បានបញ្ជាក់ជាថ្មីម្តងទៀតថា ប្រទេសជាតិ ដែលប្រឈមរងគ្រោះដោយសារការប្រែប្រួលអាកាសធាតុ កំពុងឈានទៅរលាយ បាត់មុខពីលើផែនដី។
របាយការណ៍របស់ក្រុមជំនាញអន្តរដ្ឋាភិបាលស្តីពីអាកាសធាតុបានបង្ហាញហើយថា ដោយគ្មានសង្ស័យ ការប្រែប្រួលអាកាសធាតុជាស្នាដៃ កើតចេញ ពីសកម្មភាពរបស់មនុស្សទាំងស្រុង។ សម្រាប់រដ្ឋមន្រ្តីបារាំងទទួលបន្ទុកអន្តរបរិស្ថាន កាត់បន្ថយឧស្ម័នផ្ទះកញ្ចក់ គឺជាការងារដ៏ធំសម្បើម ពិបាកនឹងសម្រេចបាន ព្រោះវាតម្រូវឲ្យអរិយធម៌មួយដែលពឹងផ្អែកទៅលើថាមពលហ្វូស៊ីល (ប្រេង ធ្យូងថ្ម) អស់ជាច្រើនសតវត្សរ៍មកហើយ ត្រូវដើរចេញ ឈប់ប្រើវាក្នុងរយៈពេល តែ១០ឆ្នាំខាងមុខ។
សម្រាប់នាយករដ្ឋមន្រ្តីអង់គ្លេស ដែលត្រូវធ្វើជាម្ចាស់ផ្ទះ រៀបចំសន្នីសិទ អន្តរជាតិស្តីពីអាកាសធាតុ របាយការណ៍របស់ក្រុមជំនាញអន្តរដ្ឋាភិបាលស្តីពីអាកាសធាតុ គឺជាសំឡេងស្រែក ដាស់ឲ្យពិភពលោកដឹងខ្លួន និងចាត់វិធានការភ្លាម នៅពេលនេះ ឲ្យបានមុនជំនួបប្រជុំ នៅខែវិច្ឆិកាខាងមុខ។
តើរបាយការណ៍ទាញសញ្ញាអាសន្នពីគ្រោះមហន្តរាយអាកាសធាតុ ពិតជាអាចដាស់រំលឹក មេដឹកនាំពិភពលោក ឲ្យចាត់វិធានការ បន្ទាន់ ដូចជា ការអំពាវនាវឲ្យលះបង់ចោលថាមពលហ្វូស៊ីល ដែលជាប្រភពបញ្ចេញឧស្ម័នកាបូនិក ដូចការលើកឡើងរបស់នាយករដ្ឋមន្រ្តីអង់គ្លេសដែរឬទេ? នៅក្នុងអង់គ្លេសផ្ទាល់ រដ្ឋាភិបាលអង់គ្លេសកំពុងរងការរិះគន់ ក្នុងរឿងដែលអនុញ្ញាតឲ្យគេបន្តជីករកឧស្ម័ន ប្រេង ក្នុងពេលដែលទីភ្នាក់ងារថាមពលអន្តរជាតិបានអំពាវនាវឲ្យគេឈប់ ជីក រុករក ប្រេង និងឧស្ម័នតទៅទៀត បើសិនគេមិនចង់ទប់ឲ្យ ការកើនឡើងកម្តៅផែនដី មានត្រឹម១,៥អង្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ