ម៉ាឡេស៊ីបារម្ភពីការប្រកួតប្រជែងអាវុធនុយក្លេអ៊ែរក្នុងតំបន់ ក្រោយអូស្ត្រាលីប្រកាសទិញនាវាបាតសមុទ្រអាមេរិក ដើរដោយប្រព័ន្ធនុយក្លេអ៊ែរ
ក្រៅពីបារាំងដែលខឹងសម្បារខ្លាំង ចំពោះអូស្ត្រាលីដែលនបានងាកទៅទិញនាវាបាតសមុទ្រ ដើរដោយប្រព័ន្ធនុយក្លេអ៊ែររបស់អាមេរិក ប្រទេសម៉ាឡេស៊ីឯណេះ បានថ្លែងនៅថ្ងៃសៅរ៍ទី១៨កញ្ញាថាខ្លួនបារម្ភ ខ្លាចទៅថ្ងៃអនាគត នឹងមានការប្រកួតប្រជែងគ្នា ផ្នែកអាវុធនុយក្លេអ៊ែរ នៅក្នុងតំបន់ឥណ្ឌូប៉ាស៊ីហ្វិក។ ជាការព្រួយបារម្ភ ដែលអ្នកជំនាញមួយចំនួនថ្លែងយល់ស្របផងដែរ ព្រោះថាមហាអំណាចខ្លះដូចជាចិន អាចនឹងពង្រឹងសមត្ថភាពនុយក្លេអ៊ែររបស់ខ្លួនកាន់តែធំ នៅពេលណាឃើញអូស្ត្រាលី មាននាវាបាតសមុទ្រដើរដោយថាមពលនុយក្លេអ៊ែរ។
ចុះផ្សាយនៅថ្ងៃ៖
ស្តាប់ - ០២:៣១
នៅក្នុងក្របខណ្ឌនៃចំណងសម្ព័ន្ធមិត្តយុទ្ធសាស្ត្រ AUKUS (Australia-UK-US) គឺ អាមេរិក និងអង់គ្លេស ជួយជ្រោមជ្រែងអូស្ត្រាលី ឲ្យមាននាវាមុជទឹកបាតសមុទ្រ ដើរដោយប្រព័ន្ធនុយក្លេអ៊ែរ។ គឺក្នុងន័យនេះហើយ ទើបអូស្ត្រាលី បានសម្រេចចិត្តបោះបង់ចោលកិច្ចសន្យាទិញនាវាបាតសមុទ្របារាំង ចំនួន១២គ្រឿង ដែលជានាវាមុជទឹកបាតសមុទ្រសាមញ្ញ។
ខុទ្ទការល័យនាយករដ្ឋមន្ត្រីម៉ាឡេស៊ី បានចេញលិខិតប្រកាសមួយ នៅថ្ងៃសៅរ៍ទៅ១៨កញ្ញា ដោយបានលើកឡើងថា សម្ព័ន្ធមិត្តយុទ្ធសាស្ត្រ AUKUS រវាងអាមេរិក អង់គ្លេស អូស្ត្រាលី អាចនឹងបង្កឲ្យមានការប្រកួតប្រជែងគ្នា ផ្នែកអាវុធនុយក្លេអ៊ែរ នៅក្នុងតំបន់ឥណ្ឌូប៉ាស៊ីហ្វិក ជាក់ជាមិនខាន។
ដោយមិនបញ្ចេញឈ្មោះចិនឲ្យចំៗ លិខិតរបស់នាយករដ្ឋមន្ត្រីម៉ាឡេស៊ីបានលើកឡើង នៅពេលដែលអូស្ត្រាលី ចាប់ផ្តើមមានគ្រឿងសព្វាវុធនុយក្លេអ៊ែរ នោះវានឹងរុញច្រានប្រទេសផ្សេងក្នុងតំបន់ ឲ្យពង្រឹងសមត្ថភាពនុយក្លេអ៊ែរដែរ។ លិខិតនេះ បន្ថែមថា ក្នុងនាមជាប្រទេសសមាជិកអាស៊ាន ម៉ាឡេស៊ី សូមការពារជានិច្ច ឲ្យអាស៊ានស្ថិតជាតំបន់សន្តិភាព សេរីភាព និងអព្យាក្រិត្យ ហើយម៉ាឡេស៊ីសូមអំពាវនាវ ឲ្យភាគីទាំងអស់កុំបង្កររឿង គំរាមសំឡុតគ្នា ដែលធ្វើឲ្យកើតទៅជាការប្រកួតប្រជែងសំញ៉ែងអាវុធ។
គួរបញ្ជាក់ថា សម្ព័ន្ធយុទ្ធសាស្ត្រ AUKUS ដែលអាមេរិកបានរៀបចំ សហការជាមួយ អូស្ត្រាលី និង អង់គ្លេស គឺមានកម្មវត្ថុទប់ទល់កម្លាំងមហិច្ឆិតាយោធារបស់ចិន នៅតំបន់អាស៊ីប៉ាស៊ីហ្វិក។ តាមរយៈសម្ព័ន្ធយុទ្ធសាស្ត្រនេះ អូស្ត្រាលីនឹងទិញនាវាមុជទឹកបាតសមុទ្រដើរដោយប្រព័ន្ធនុយក្លេអ៊ែរ របស់អាេមរិក ជំនួសឲ្យនាវាមុជទឹកបាតសមុទ្រប្រភេទសាមញ្ញរបស់បារាំង។ ការក្រឡាស់សំដីបាតដៃខ្នងដៃ របស់អូស្ត្រាលី បានធ្វើឲ្យបារាំងខឹងសម្បារ និងបាត់បង់ទំនុកចិត្តជាខ្លាំង។
ដំណឹងនេះ បានធ្វើឲ្យមានការព្រួយបារម្ភផងដែរ ពីសំណាក់អ្នកវិភាគកិច្ចការអន្តរជាតិ ដោយសារតែអូស្ត្រាលី ជាប្រទេសគ្មានបទពិសោធន៍ទាល់តែសោះ ជាមួយនឹងថាមពលនុយក្លេអ៊ែរ។ នាវាមុជទឹកបាតសមុទ្រ ដើរដោយថាមពលនុយក្លេអ៊ែរ មិនត្រឹមតែមានភាពស្មុគស្មាញ ទាមទារឲ្យមានសមត្ថភាពខ្ពស់ ដើម្បីចៀសវាងគ្រោះថ្នាក់ជាយថាហេតុណាមួយប៉ុណ្ណោះទេ តែវាក៏អាចជាច្រកបើកផ្លូវផងដែរ ថាទៅថ្ងៃខាងមុខ អូស្ត្រាលីក៏អាចស្វែងរកទិញ អាវុធនុយក្លេអ៊ែរផ្សេងទៀតជាក់ជាមិនខាន។ ចិនដែលមានទំនាស់ជាមួយអូស្ត្រាលី ប្រាកដជាមិននៅស្ងៀមនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ