ថៃបន្ថយរយៈពេលធ្វើចត្តាឡីស័ក មកត្រឹម៧ថ្ងៃ សម្រាប់ភ្ញៀវទេសចរណ៍បរទេស ដែលចាក់វ៉ាក់សាំងហើយ
រដ្ឋាភិបាលថៃ បានសម្រេចកាត់បន្ថយរយៈពេល ធ្វើចត្តាឡីស័ក មកនៅត្រឹម៧ថ្ងៃ សម្រាប់ភ្ញៀវទេសចរណ៍បរទេស ដែលបានចាក់វ៉ាក់សាំងរួច។ នេះគឺជាវិធានការថ្មី មួយទៀត ដើម្បីស្រោចស្រង់វិស័យទេសចរណ៍ ដែលជាប្រភពដ៏ចាំបាច់ នៃដង្ហើមសេដ្ឋកិច្ចថៃ។ ប្រមាណ២ឆ្នាំមកនេះ វិស័យសេដ្ឋកិច្ចថៃ បានធ្លាក់ចុះខ្លាំងណាស់ ដោយសារគ្មានទេសចរណ៍បរទេស។
ចុះផ្សាយនៅថ្ងៃ៖
ស្តាប់ - ០២:៣៦
ចាប់ពីថ្ងៃទី១តុលាទៅ ភ្ញៀវទេសចរណ៍បរទេស ដែលបានចាក់វ៉ាក់សាំងហើយ គឺត្រូវធ្វើចត្តាឡីស័ក រយៈពេល៧ថ្ងៃ ពេលទៅដល់ទឹកដីថៃ។ ពោលគឺមិនមែន១៤ថ្ងៃ ដូចបច្ចុប្បន្ននេះទេ។ ដោយឡែក សម្រាប់ភ្ញៀវទេសចរណ៍ដែលមិនទាន់បានចាក់វ៉ាក់សាំង ហើយចូលមកដល់ថៃតាមផ្លូវអាកាស គឺត្រូវធ្វើចត្តាឡីស័ក ១០ថ្ងៃ។ រីឯអ្នកចូលមកថៃ តាមព្រំដែនដីគោកវិញ គឺត្រូវធ្វើចត្តាឡីស័ក ១៤ថ្ងៃ។ ហើយភ្ញៀវទេសចរណ៍ទាំងអស់ ត្រូវតែបានធ្វើតេស្ត រកកូវីដ ឲ្យបានយ៉ាងហោច២ដង មុននឹងចេញពីការបង្ឃាំងខ្លួននៅដាច់ដោយឡែក។
ឆ្លើយតបចំពោះការព្រួយបារម្ភ ទាក់ទិននឹងការបើកព្រំដែនទទួលទេសចរណ៍បរទេស ដែលមិនទាន់បានចាក់វ៉ាក់សាំង លោក Rachada Dhanadirek អ្នកនាំពាក្យរដ្ឋាភិបាលថៃ បានអះអាងថា វិធានការថ្មី ដែលរដ្ឋាភិបាលបានដាក់កំហិត គឺវាគ្រប់គ្រាន់ហើយ សម្រាប់តាមដាន និងទប់ស្កាត់ ស្វែងរកទេសចរណ៍ណាដែលមានផ្ទុកកូវីដ១៩។
គួរបញ្ជាក់ថា ប្រមាណ២ឆ្នាំមកនេះ សេដ្ឋកិច្ចថៃបានធ្លាក់ចុះខ្លាំងណាស់ ក្នុងរវាង២០ឆ្នាំចុងក្រោយ។ ដើម្បីបង្ការកាឆ្លងរាលដាលកូវីដ ថៃបានដាក់កំហិតយ៉ាងតឹងតែង ចំពោះទេសចរណ៍បរទេស ដែលប្រការនេះ បានធ្វើឲ្យវិស័យទេសចរណ៍ធ្លាក់ចុះជាខ្លាំង។ វិស័យទេសចរណ៍ គឺជាប្រភពចំណូល ១ភាគ៥ នៃសេដ្ឋកិច្ចថៃ។
គួរកត់សំគាល់ថា បើទោះបីកំពុងប្រឈម ជាមួយការឆ្លងរាលដាល កូវីដ១៩ទម្រង់បំប្លែងខ្លួនដែលតា ថៃបានសម្រេចចិត្ត បន្ធូរបន្ថយខ្លះ ដើម្បីបើកប្រទេស ទទួលទេសចរណ៍ឡើងវិញ។ កាលពីខែកក្កដា អាជ្ញាធរថៃ បានធ្វើការសាកល្បង បើកកោះភូកេត ទទួលទេសចរណ៍ដែលចាក់វ៉ាក់សាំងហើយ។ ទេសចរណ៍ដែលទៅដល់ ត្រូវនៅលើកោះនេះ រយៈពេល១៤ថ្ងៃ មុននឹងអាចធ្វើដំណើរទៅទីកន្លែងផ្សេងទៀត ក្នុងប្រទេសថៃ។
យ៉ាងណាក៏ដោយ គេមិនរំពឹងថា ការបន្ធូរបន្ថយបន្តិចបន្តួច ចាប់ពីខែតុលាទៅនេះ អាចនឹងនាំទេសចរណ៍បរទេស ឲ្យត្រលប់មកថៃនោះទេ។ ប្រទេសមួយចំនួន ដូចជាសហរដ្ឋអាមេរិក និងអង់គ្លេសជាដើម រដ្ឋាភិបាលគេ បានប្រាប់ទៅប្រជាជនថាត្រូវចៀស កុំទៅប្រទេសឲ្យសោះ បើពុំចាំបាច់។ បច្ចុប្បន្ននេះ ថៃមានអ្នកឆ្លងកូវីដថ្មី ប្រមាណ១ម៉ឺននាក់ ជាមធ្យម ជារៀងរាល់ថ្ងៃ។ ហើយគិតត្រឹមពេលនេះ ថៃមានករណីឆ្លងសរុប ចំនួន១.៥៧លាននាក់ ក្នុងនោះមានស្លាប់ ១៦៣៦៩នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ