ក្រុមហ៊ុនអចលនទ្រព្យចិនមួយទៀត ឈ្មោះ Fantasia មិនមានលទ្ធភាពសងបំណុល
បន្ទាប់ពីក្រុមហ៊ុនអលចនទ្រព្យចិនដ៏ធំ ឈ្មោះ Evergrande ដែលកំពុងប្រឈមនឹងការក្ស័យធននោះ នៅថ្ងៃអង្គារនេះ គេបានដឹងថា មានក្រុមហ៊ុនអចលនទ្រព្យចិនមួយទៀត ឈ្មោះ Fantasia ដែលកំពុងតែជួបការលំបាកដែរ ក្នុងការសងបំណុល។ ដំណឹងនេះ បានធ្វើឲ្យមានការភ័យបារម្ភ ពីការដួលរលំតតគ្នា នៅក្នុងវិស័យអចលនទ្រព្យចិន ដែលអាចធ្វើឲ្យប៉ះពាល់ដល់អ្នកទិញផ្ទះបង់រំលោះ និងអាចរង្គោះរង្គើដល់សេដ្ឋកិច្ចចិនទាំងមូល។
ចុះផ្សាយនៅថ្ងៃ៖
ស្តាប់ - ០២:៤៤
គិតត្រឹមថ្ងៃចន្ទ ទី៤តុលា ក្រុមហ៊ុន Fantasia Holdings ដែលមានទីតាំងធំនៅក្រុងឈិនចិន មិនបានសងប្រាក់បំណុល ចំនួន ២០៥.៧លានដុល្លារ ទៅឲ្យម្ចាស់បំណុល។ នេះបើផ្អែកតាមការបញ្ជាក់ឲ្យដឹង ពីសំណាក់ក្រុមហ៊ុន Fantasia Holdings ផ្ទាល់តែម្តង។
ដំណឹងនេះ បានលេចឮ ស្របពេលជាមួយគ្នា ដែលក្រុមហ៊ុន Country Garden Services Holdings បានប្រកាសថា សាខាមួយរបស់ក្រុមហ៊ុន Fantasia មិនបានសងបំណុលមកខ្លួន ចំនួនប្រមាណ ៧០០លានយាន់ ស្មើនឹងប្រមាណ១០០លានដុល្លារ។ ក្រុមហ៊ុនម្ចាស់បំណុល កំពុងបារម្ភថា ក្រុមហ៊ុន Fantasia Holdings អាចប្រហែលជាលែងមានលទ្ធភាពសងបំណុល។
យ៉ាងណាមិញ កាលពីថ្ងៃចន្ទ ការិយាល័យកំណត់សមត្ថភាពហិរញ្ញវត្ថុ Fitch បានទំលាក់ពិន្ទុក្រុមហ៊ុនFantasia ពី B មកនៅត្រឹម CCC ។ ជាសេចក្តីសម្រេច ដែលអាចមានន័យថា ក្រុមហ៊ុននេះកំពុងប្រឈមនឹងការគ្មានលទ្ធភាពសងបំណុលគេ។ ការិយាល័យ Fitch បានបញ្ជាក់ នៅក្នុងលិខិតប្រកាសរបស់ខ្លួនថា រឿងក្រុមហ៊ុន Fantasia មានបញ្ហា មិនបានសងប្រាក់បំណុលទៅម្ចាស់បំណុលនេះ គឺមិនត្រូវបានក្រុមហ៊ុននេះ សរសេរដាក់នៅក្នុងរបាយការណ៍ហិរញ្ញវត្ថុរបស់ខ្លួនទេ។
សូមរំលឹកថា ថ្មីៗនេះ មានក្រុមហ៊ុនអលចនទ្រព្យចិនមួយ ឈ្មោះ Evergrande ដែលកំពុងតែប្រឈមនឹងការក្ស័យធន ជាមួយនឹងបំណុលរុំជិត ប្រមាណ៣០ម៉ឺនលានដុល្លារ។ ដោយសារវិបត្តិនេះ Evergrande បានសម្រេចព្យួរ ការលក់ភាគហ៊ុននៅផ្សារហុងកុង។ ដោយឡែក ថ្វីបើក្រុមហ៊ុន Fantasia គឺជាក្រុមហ៊ុនតូច មិនអាចប្រៀបស្មើនឹង Evergrande មែន ក៏ប៉ុន្តែបញ្ហាហិរញ្ញវត្ថុខ្វះប្រាក់សងបំណុលរបស់ក្រុមហ៊ុននេះ កំពុងតែធ្វើឲ្យគេបារម្ភកាន់តែខ្លាំង អំពីភាពរង្គោះរង្គើ រលំតតគ្នា នៃវិស័យអចលនទ្រព្យនៅចិន។ ការិយាល័យ Fitch បានលើកឡើងថា បញ្ហានេះវាបានរំលេចឲ្យឃើញ ពីភាពគ្មានតម្លាភាព ការលាក់លាម ប៉ោងតែខាងក្រៅ ប្រហោងក្នុង នៃសមត្ថភាពហិរញ្ញវត្ថុ របស់ក្រុមហ៊ុនអចលនទ្រព្យចិន។
យ៉ាងណាមិញ ក្រុមហ៊ុនអលចនទ្រព្យចិនមួយទៀត Sinic Holdings ក៏បានទទួលស្គាល់ដែរ ថាខ្លួនកំពុងជួបការលំបាក ក្នុងការសងការប្រាក់។ ថៅកែរបស់ Sinic Holdings បានខាតប្រាក់ជាង១ពាន់លានដុល្លារ កាលពីខែមុន នៅក្រោយពេលទីផ្សារភាគហ៊ុនបានធ្លាក់ចុះយ៉ាងគំហុក បន្ទាប់ពីលេចឮដំណឹងនៃការក្ស័យធនរបស់ ក្រុមហ៊ុន Evergrande។ អាជ្ញាធរចិន កំពុងតាមដានយ៉ាងប្រុងប្រយ័ត្ន នៅក្នុងវិស័យកម្ចីវិនិយោគអចលនទ្រព្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ