អាហ្វហ្កានីស្ថាន ៖ អាមេរិកនិងអង់គ្លេសព្រមានអំពីគ្រោះភេរវកម្មនៅតាមសណ្ឋាគារ នៅក្រុងកាប៊ុល
មួយថ្ងៃក្រោយជំនួបជាលើកដំបូងរវាងតំណាងអាមេរិកនិងតាលីបង់ ដើម្បីជជែកអំពីបញ្ហាសុវត្ថិភាពនៅអាហ្វហ្កានីស្ថាន ក្តីព្រួយបារម្ភ ខ្លាចមានភេរវកម្ម បានផុសឡើងជាថ្មី។ អាមេរិកនិងអង់គ្លេស បានព្រមាននៅថ្ងៃចន្ទទី ១១តុលា អំពីការគំរាមកំហែងភេវកម្ម នៅក្នុងរដ្ឋធានីកាប៊ុល។ បើតាមប្រភពការទូតប្រទេសទាំងពីរសណ្ឋាគារធំៗប្រណិតៗ ប្រឈមនឹងហានិភ័យភេរវកម្មមានខ្ពស់ខ្លាំងជាងគេ។
ចុះផ្សាយនៅថ្ងៃ៖
ស្តាប់ - ០១:៥៨
នៅក្នុងវេបសាយ ក្រសួងការបរទេសអាមេរិកនិងអង់គ្លេស បានប្រកាស ប្រាប់ប្រជាពលរដ្ឋរបស់ខ្លួន ឱ្យចៀសវាងកុំស្នាក់នៅនិងទៅតំបន់ដែលមានសណ្ឋាគារធំៗប្រណិត ព្រោះមានការគំរាមកំហែងសន្តិសុខខ្លាំងនៅទីនោះ។ សណ្ឋាគារធំៗប្រណិតៗ កណ្តាលទីក្រុងកាប៊ុល ដូចយ៉ាងសណ្ឋាគារ Serena កំពុងប្រឈមខ្លាំងនឹងគ្រោះភេរវកម្ម។ នេះបើការព្រមានរបស់ប្រទេសទាំងពីរ ដោយបញ្ជាក់ថាសណ្ឋាគារSenera ជាអាទិ៍នេះ ធ្លាប់រងការវាយប្រហារភេរវកម្មជាច្រើនលើកច្រើនសារួចមកហើយ។
កាលពីថ្ងៃទី ២០មីនា២០១៤ កងកម្មង់ដូតាលីបង់មួយក្រុមបានវាយប្រហារចូលក្នុងសណ្ឋាគារSerena ស្លាប់មនុស្សអស់៩នាក់ ក្នុងនោះម្នាក់ជាអ្នកកាសែតនិងក្រុមគ្រួសារ។ នៅខែមករាឆ្នាំ២០០៨ សណ្ឋាគារដដែលនេះ បានរងភេរវកម្មអត្តឃាត ក្នុងពេលដែលរដ្ឋមន្ត្រីការបរទេសន័រវេសកំពុងស្ថិតនៅខាងក្នុង បណ្តាលឱ្យស្លាប់៦នាក់ ក្នុងនោះម្នាក់ជាជនជាតិអាមេរិក និងម្នាក់ជាអ្នកកាសែតជាតិន័រវេស។
នៅកាប៊ុល សណ្ឋាគារធំៗ ប្រណិតៗ ជាទីកន្លែងប្រមូលផ្តុំជនបរទេស អ្នកសារព័ត៌មាន មន្ត្រីបុគ្គលិកអង្គការមនុស្សធម៌ ហើយសូម្បីតែអ្នកទទួលខុសត្រូវតាលីបង់ក៏មកជួបប្រជុំការងារក្នុងសណ្ឋាគារល្អៗទាំងអស់នោះដែរ។
ការដាស់អាសន្នស្តីពីការគំរាមកំហែងភេរវកម្មបានធ្លាក់មក តែប៉ុន្មានម៉ោងក្រោយការបិទបញ្ចប់ជំនួបប្រជុំ ជាផ្លូវការ ជាលើកទីមួយ រវាងតំណាងអាមេរិកនិងតាលីបង់ នៅកាតា។ ជាជំនួបប្រជុំស្តីអំពីបញ្ហាសន្តិសុខ ភេរវកម្ម និងសុវត្ថិភាពរបស់អ្នកដំណើរអាមេរិកនិងបរទេស ព្រមទាំងដៃគូអាហ្វហ្កានីស្ថាន។ អាមេរិកក៏បានឆ្លៀតទទូចឱ្យពួកតាលីបង់ ធានាការគោរពសិទ្ធិមនុស្ស គោរពសិទ្ធិស្ត្រីនិងក្មេងស្រី។
ដណ្តើមកាន់អំណាចនៅអាហ្វហ្កានីស្ថានបាន តាំងពីថ្ងៃទី១៥សីហា២០២១មក តាលីបង់បានចាត់ទុកការស្តារសន្តិសុខសុវត្ថិភាពប្រទេសក្រោយសង្គ្រាម២០ឆ្នាំ ជាអាទិភាព ប៉ុន្តែរលកភេរវកម្ម បង្កឡើងដោយពួកអង្គការរដ្ឋអ៊ីស្លាម ចាប់វាយឆក់យកជីវិតពលរដ្ឋអាហ្វហ្កានីស្ថានជាបន្តបន្ទាប់។ កាលពីថ្ងៃសុក្រទី ៨តុលា ២០២១ ភេរវកម្មបានផ្តាច់ជីវិតមនុស្សអស់យ៉ាងហោច៦០នាក់ និងជាភេរវកម្មដ៏កំណាចបំផុតតាំងពី អាមេរិកដកទ័ពចេញអស់ពីអាហ្វហ្កានីស្ថាននៅថ្ងៃទី ៣០សីហា២០២១មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ