អាមេរិក និងតៃវ៉ាន់ពិភាក្សាគ្នា ដើម្បីរកវិធីឲ្យតៃវ៉ាន់ចូលរួមឲ្យបានពេញមុខក្នុងកិច្ចការអង្គការសហប្រជាជាតិ
អាមេរិក និង តៃវ៉ាន់ បានពិភាក្សាគ្នា ដើម្បីរកវិធី ឲ្យតៃវ៉ាន់ ចូលរួមឲ្យបានសកម្ម និងពេញមុខ នៅក្នុងកិច្ចការងារ នៃអង្គការសហប្រជាជាតិ ស្របពេលដែលចិនឯណោះ កំពុងត្រៀមអបអរខួប៥០ឆ្នាំ នៃការចូលជាសមាជិកអង្គការសហប្រជាជាតិ។ គួរកត់សំគាល់ថា នេះគឺជាបង្ហាញជំហរមួយទៀត របស់រដ្ឋាភិបាលលោក ចូ បៃដិន ក្នុងការជួយគាំទ្រតៃវ៉ាន់ បន្ទាប់ពីលោកចូ បៃដិន បានអះអាង ថាអាមេរិកសន្យាលើកទ័ពទៅជួយតៃវ៉ាន់។
ចុះផ្សាយនៅថ្ងៃ៖
ស្តាប់ - ០២:១៥
យោងតាមលិខិតប្រកាសមួយរបស់ ក្រសួងការបរទេសអាមេរិក ចុះថ្ងៃទី២៣តុលា មន្ត្រីការទូតសហរដ្ឋអាមេរិក និងតៃវ៉ាន់ បានជួបនិយាយគ្នាកាលពីថ្ងៃសុក្រ តាមប្រព័ន្ធវីស្យូខុនហ្វឺរិនស៍ ដើម្បីពិភាក្សាគ្នារកវិធី ជួយឲ្យតៃវ៉ាន់ អាចចូលរួមកាន់តែសកម្ម នៅក្នុងក្របខណ្ឌការងារ នៃអង្គការសហប្រជាជាតិ។
មន្ត្រីអាមេរិក បានបង្ហាញជំហរ ចង់ឲ្យតៃវ៉ាន់ ចូលរួមឲ្យបានច្រើន នៅក្នុងកិច្ចការងារ តាមស្ថាប័នអន្តរជាតិធំៗទាំងឡាយ មានដូចជាអង្គការសុខភាពពិភពលោក និងសន្ធិសញ្ញាអង្គការសហប្រជាជាតិ ស្តីពីអាកាសធាតុជាដើម។ មន្ត្រីអាមេរិក ក៏បានលើកយកមកនិយាយជាមួយតៃវ៉ាន់ នូវលទ្ធភាពនៃការចូលរួមរបស់តៃវ៉ាន់ នៅក្នុងក្របខណ្ឌការងារ ជាច្រើនផ្សេងទៀតដែរ។
គួររំលឹកថា តៃវ៉ាន់ ឬ ដែលមានឈ្មោះផ្លូវការថា សាធារណៈរដ្ឋចិន ធ្លាប់អង្គុយលើអាសនៈ ក្នុងអង្គការសហប្រជាជាតិ រហូតដល់ថ្ងៃទី២៥ តុលា ឆ្នាំ១៩៧១ មុននឹងអាសនៈនេះ ត្រូវបានប្រគល់ទៅឲ្យសាធារណៈរដ្ឋប្រជាមានិតចិនវិញ។ បើទោះបី តៃវ៉ាន់ មានរដ្ឋាភិបាលដាច់ដោយឡែក តាំងតែពីឆ្នាំ១៩៤៩មក តែសម្រាប់ចិន តៃវ៉ាន់ គឺជាខេត្តមួយរបស់ខ្លួន។
ថ្មីៗនេះ លោកប្រធានាធិបតីចិន បានបង្ហាញជំហរកាន់តែច្បាស់ អំពីការចង់បង្រួបបង្រួម យកតៃវ៉ាន់មកគ្រប់គ្រងវិញ។ កងទ័ពចិនបានបញ្ចេញកម្លាំងកាន់តែញឹកញាប់ ដើម្បីគំរាមដាក់សំពាធលើតៃវ៉ាន់ ខណៈរដ្ឋាភិបាលតៃវ៉ាន់ ខំប្រឹងបង្កើនសមត្ថភាពសព្វាវុធ បានមកពីអាមេរិក។ ហើយកាលពី ថ្ងៃព្រហស្បតិ៍ លោក ចូ បៃដិន បានបញ្ជាក់ថា ក្នុងករណីមានការវាយប្រហារណាមួយពីសំណាក់ចិន សហរដ្ឋអាមេរិក នឹងលើកទ័ពទៅជួយតៃវ៉ាន់។
ចេតនារបស់អាមេរិក ក្នុងការនាំតៃវ៉ាន់ ឲ្យចូលរួមសកម្មក្នុងក្របខណ្ឌអង្គការសហប្រជាជាតិនេះ អាចជាយុទ្ធសាស្ត្រការទូតថ្មីមួយទៀត ដើម្បីឲ្យតៃវ៉ាន់ បានទទួលការគាំទ្រ ពីសំណាក់ប្រទេសផ្សេងៗកាន់តែច្រើន មុននឹងឈានទៅក្លាយជាប្រទេសឯករាជ្យពេញមុខ។ តែយ៉ាងណា គេជឿថា ភាពមានៈ និងការជំទាស់របស់ចិន នឹងរារាំងមិនឲ្យដំណើរការនេះ អាចធ្វើទៅបានដោយងាយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ