អង្គការឧតុនិយមពិភពលោក៖ ឆ្នាំ២០២០ តំបន់អាស៊ីមានសីតុណ្ហភាព ឡើងក្តៅបំផុតមិនធ្លាប់មាន
យោងតាមរបាយការណ៍របស់អង្គការឧតុនិយមពិភពលោក នៅឆ្នាំ២០២០កន្លងទៅ សីតុណ្ហភាពនៅតំបន់អាស៊ី បានឡើងក្តៅបំផុត មិនធ្លាប់មាន។ សីតុណ្ហភាពឡើងក្តៅ បានបង្កជាគ្រោះមហន្តរាយយ៉ាងធ្ងន់ធ្ងរ ដល់តំបន់នេះ ដូចជាគ្រោះទឹកជំនន់ គ្រោះរាំងស្ងួត និងខ្យល់ព្យុះជាដើម។ ក្រៅពីខាតបង់ប្រាក់រាប់ពាន់លានដុល្លារ វិបត្តិបម្រែបម្រួលអាកាសធាតុនេះ បានសម្លាប់ជីវិតមនុស្ស ជាច្រើនពាន់នាក់នៅអាស៊ី។
ចុះផ្សាយនៅថ្ងៃ៖
ស្តាប់ - ០២:៥៣
ឆ្នាំ២០២០ គឺជាឆ្នាំដែលមានសីតុណ្ហភាពក្តៅបំផុត នៅតំបន់អាស៊ី ដែលអ្នកជំនាញឧតុនិយម មិនដែលជួបប្រទះទេ ពីមុនមក។ យោងតាមរបាយការណ៍ នៃអង្គការឧតុនិយមពិភពលោក សីតុណ្ហភាពក្តៅកាន់តែខ្លាំងបែបនេះ បានបង្កឲ្យបម្រែបម្រួលអាកាសធាតុ មានកម្រិតធ្ងន់ធ្ងរ នៅអាស៊ី។ ការអភិវឌ្ឍន៍ប្រកបដោយចីរភាព ត្រូវគំរាមកំហែង។ អសន្តិសុខស្បៀងអាហារ កង្វះទឹកស្អាត ហានិភ័យផ្នែកសុខភាព និងការសិករិចរិលនៃធម្មជាតិ បញ្ហាទាំងអស់នេះ បានឈានទៅកាន់តែធ្ងន់ធ្ងរ ដោយសារតែសីតុណ្ហភាពក្តៅខ្លាំង។
ឆ្នាំ២០២០ វិបត្តិសីតុណ្ហភាពក្តៅខ្លាំងនេះ បានធ្វើឲ្យចិន ខាតបង់ប្រាក់សរុប ប្រមាណជា ២៣៨ពាន់លានដុល្លារ ឥណ្ឌា ៨៧ពាន់លានដុល្លារ ជប៉ុន ៨៣ពាន់លានដុល្លារ និង កូរ៉េខាងត្បូង ២៤ពាន់លានដុល្លារ។
លោក Petteri Taalas អគ្គលេខាធិការអង្គការឧតុនិយមពិភពលោក បានលើកឡើងថា បម្រែបម្រួលអាកាសធាតុខ្លាំងនៅអាស៊ី បានបណ្តាលឲ្យមានគ្រោះទឹកជំនន់ ខ្យល់ព្យុះ និង គ្រោះរាំងស្ងួត និងបញ្ហាផ្សេងៗទៀត នៅតាមប្រទេសនានាក្នុងតំបន់អាស៊ី។ មនុស្សយ៉ាងហោច ៥០លាននាក់ បានរងគ្រោះ ដោយសារគ្រោះមហន្តរាយទាំងនេះ ហើយក្នុងនោះមានស្លាប់ ៥ពាន់នាក់ ក្នុងឆ្នាំ២០២០កន្លងទៅ។
យោងតាមការតាមដានរបស់អ្នកជំនាញ នៃអង្គការឧតុនិយមពិភពលោក សីតុណ្ហភាពនៅអាស៊ី បានឡើងកំដៅ ប្រមាណ ១.៣៩°c បើប្រៀបធៀបទៅនឹងកម្រិតមធ្យម ក្នុងរវាងពីឆ្នាំ ១៩៨១-២០១០។ ឆ្នាំ២០២០ សីតុណ្ហភាពទឹកសមុទ្រនៅផ្ទៃខាងលើ នៃមហាសមុទ្រឥណ្ឌា មហាសមុទ្រប៉ាស៊ីហ្វិក និងមហាសមុទ្រទឹកកកអាកទិក បានឡើងក្តៅខ្លាំងបំផុត។ ជាងនេះទៀត សីតុណ្ហភាពទឹកសមុទ្រនៅតំបន់អាស៊ី បានឡើងកំដៅខ្លាំង និងយ៉ាងលឿនបំផុត លើសកម្រិតមធ្យមជាទូទៅ នៅតំបន់ផ្សេងទៀត។ យោងតាមការព្យាករណ៍ បញ្ហានេះ អាចនឹងធ្វើឲ្យផ្ទាំងទឹកកកនៅតំបន់អាស៊ី ចុះថយទំហំ ពី២០ ទៅ ៤០% នៅរវាងឆ្នាំ២០៥០ ហើយវានឹងធ្វើឲ្យប៉ះពាល់ខ្លាំងដល់ជីវភាព និងជីវិតរស់នៅ របស់មនុស្សប្រមាណ៧៥០លាននាក់។
សូមបញ្ជាក់ថា ឧស្ម័នផ្ទះកញ្ចក់នៅក្នុងបរិយាកាស ដែលកើតចេញពីសកម្មភាពមនុស្ស គឺជាប្រភពចំបង ធ្វើឲ្យសីតុណ្ហភាពផែនដីឡើងក្តៅ។ ខណៈដែលសន្និសីទអន្តរជាតិស្តីពីអាកាសធាតុ COP26 នឹងឈានមកដល់ នៅរវាង៥ថ្ងៃទៀត ប្រទេសអូស្ត្រាលី ដែលជាប្រទេសនាំធ្យូងថ្មចេញ ច្រើនជាងគេនោះ បានប្រកាសពីកម្មវត្ថុអព្យាក្រិត្យភាពកាបូន នៅឆ្នាំ២០៥០។ តែយ៉ាងណា មានមតិព្រួយបារម្ភកាន់តែខ្លាំង ថាសន្និសីទ COP26 និងបរាជ័យ ព្រោះប្រទេសធំៗ ប្រហែលជានឹងមិនបន្ថែមការប្រឹងប្រែង ក្នុងការកាត់បន្ថយការបញ្ចេញឧស្ម័នកាបូនិកទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ