អគ្គមេបញ្ជាការកងទ័ពអាមេរិក អះអាងថា ចិនពិតជាបានសាកល្បងមីស៊ីលអ៊ីពែរសូនិកមែន
លោកអគ្គមេបញ្ជាការកងទ័ពអាមេរិក Mark Milley បានអះអាង ទទួលស្គាល់ជាសាធារណៈ កាលពីថ្ងៃពុធទី ២៧តុលា ថាចិនពិតជាបានធ្វើការសាកល្បង អាវុធអ៊ីពែរសូនិក ពិតមែន កាលពីខែសីហា។ ការសាកល្បងដែលត្រូវបានកាសែត Financial Times ចុះផ្សាយកាលពីពាក់កណ្តាលខែតុលានេះ។ លោកអគ្គមេបញ្ជាការកងទ័ពអាមេរិក ក៏បានបញ្ជាក់ផងដែរ ពីការភ្ញាក់ផ្អើលខ្លាំង នៅក្រោយពេលដឹងដំណឹង ថាចិនបានសាកមីស៊ីលអ៊ីពែរសូនិក។
ចុះផ្សាយនៅថ្ងៃ៖
ស្តាប់ - ០២:៥៧
នៅក្នុងបទសម្ភាសន៍មួយ ផ្តល់ឲ្យទូរទស្សន៍ Bloomberg TV លោកអគ្គមេបញ្ជាការកងទ័ពអាមេរិក Mark Milley បានទទួលស្គាល់ថា អាមេរិកកំពុងយកចិត្តទុកដាក់បំផុត ក្រោយការសាក ល្បងប្រព័ន្ធអាវុធអ៊ីពែរសូនិក របស់ចិន។ លោកបានប្រៀបធៀប ការសាកល្បង អាវុុធអ៊ីពែរសូនិករបស់ចិននេះ ទៅនឹងការសាកល្បងផ្កាយរណបសិប្បនិម្មិត Spoutnik របស់រុស្ស៊ី កាលពីខែតុលាឆ្នាំ១៩៥៧ ដែលបានធ្វើឲ្យសហរដ្ឋអាមេរិក ផ្ញាក់ផ្អើលជាខ្លាំង ហើយវាបានជំរុញឲ្យមានការប្រកួតប្រជែងគ្នា ក្នុងវិស័យអវកាស។
គួរបញ្ជាក់ថា លោក Mark Milley គឺជាមន្ត្រីជាន់ខ្ពស់អាេមរិកដំបូងគេហើយ ដែលបានប្រកាសទទួលស្គាល់ថា ចិនពិតជាបានសាកល្បងប្រព័ន្ធអាវុធមីស៊ីលដ៏ទំនើប ល្បឿនលឿនជាងសំឡេងនេះ។ កាលពីពាក់កណ្តាលខែតុលា កាសែត Financial Times បានចុះផ្សាយ ថាចិនបានសាកល្បងមីស៊ីលប្រភេទថ្មីនេះ ដែលមានសមត្ថភាពបំពាក់ក្បាលគ្រាប់នុយក្លេអ៊ែរ ហើយបានហោះជុំវិញខ្សែគន្លងផែនដី ក្នុងរយៈកំពស់ទាប។ ដោយស្រង់ប្រភពពីមនុស្សដែលបានតាមដានការសាកល្បងនេះ កាសែតអង់គ្លេសនេះ បានបញ្ជាក់ថា មីស៊ីលនេះបានធ្លាក់ខុសគោលដៅ ប្រមាណជាង៣០គីឡូម៉ែត្រ។
ដោយឡែក ចិនបានបដិសេធដំណឹងនេះ ដោយបានលើកឡើងថា គេបានធ្វើតេស្តសាកល្បងធម្មតា ទៅលើយានដឹកជញ្ជូនអាវកាស ដែលអាចយកមកប្រើប្រាស់ឡើងវិញបាន តែប៉ុណ្ណោះ។
ក្រោយការលើកឡើង របស់លោកអគ្គមេបញ្ជាការកងទ័ពអាមេរិក លោក John Kirby អ្នកនាំពាក្យក្រសួងការពារជាតិអាមេរិក បានឆ្លើយថា វាមិនមានប្រយោជន៍ទេ ដែលបិទផ្លាក ឬចាត់ចំណាត់ថ្នាក់ថា ចិនបានដើរជឿនលឿនខ្លាំង ក្នុងបច្ចេកវិទ្យាអាវុធ ព្រោះថាសមត្ថភាពខ្ពស់នៃវិស័យនេះ គឺវាជាការបូកផ្សំជាមួយនយោបាយការបរទេស និងការការពារជាតិ ដែលប្រើប្រាស់យុទ្ធសាស្ត្រគំរាម និងសហការជាមួយប្រទេសក្បែរខាង។
សូមរំលឹកថា កាលពីឆ្នាំ២០១៩ ចិនបានបង្ហាញ មីស៊ីលអ៊ីពែរសូនិក មួយរួចហើយ ឈ្មោះ DF-17។ ជាអាវុធ មានសមត្ថភាពមធ្យម រយៈចំងាយប្រមាណ ២០០០គីឡូម៉ែត្រ ហោះត្រង់សំដៅគោលដៅ តែអាចបំពាក់ដោយក្បាលគ្រាប់នុយក្លេអ៊ែរ។ ដោយឡែក មីស៊ីលចិនដែលកាសែត Financial Times បានចុះផ្សាយកាលពីពាក់កណ្តាលខែតុលា គឺជាមីស៊ីលអាចហោះឡើងទៅលើអវកាស ចូលក្នុងសុញ្ញកាស មុននឹងបត់ចុះ ឆ្ពោះទៅកាន់គោលដៅ។ ដូច្នេះកម្រិតសមត្ថភាពនៃមីស៊ីលថ្មីនេះ គឺខ្ពស់ខ្លាំងណាស់។
គួរបញ្ជាក់ដែរថា សហរដ្ឋអាេមរិក មិនទាន់មានអាវុធអ៊ីពែរសូនិកទេ តែគេកំពុងតែធ្វើការស្រាវជ្រាវផលិត។ ក្រុមការងាវិទ្យាសាស្ត្រនៃកងទ័ពអាមេរិក Darpa ធ្លាប់បានប្រកាសកាលពីពេលថ្មីៗនេះ ថា គេបានសាកល្បងប្រកបដោយជោគជ័យ មីស៊ីលអ៊ីពែរសូនិក HAWC (Hypersonic Air-Breathing Weapon Concept) ដែលប្រើអុកស៊ីសែនក្នុងបរិយាកាស ជាប្រភពថាមពលជំរុញល្បឿន។ ដោយឡែក ការសាកល្បងមីស៊ីលអ៊ីពែរសូនិកហោះត្រង់ ARRW បានបរាជ័យ កាលពីខែមេសាកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ