ឥណ្ឌូណេស៊ី ប្រទេសដំបូងគេ ដែលអនុញ្ញាតឲ្យប្រើវ៉ាក់សាំងបង្ការកូវីដ របស់មន្ទីរពិសោធន៍ Novavax
រដ្ឋាភិបាលឥណ្ឌូណេស៊ី បានសម្រេចកាលពីថ្ងៃចន្ទ ទី១វិច្ឆិកាម្សិលមិញ អនុញ្ញាតឲ្យប្រើប្រាស់ វ៉ាក់សាំងបង្ការកូវីដថ្មីមួយទៀត ស្រាវជ្រាវផលិតដោយ មន្ទីរសោធន៍អាមេរិក Novavax។ វ៉ាក់សាំងនេះ ជាប្រភេទវ៉ាក់សាំងប្រើប្រូតេអ៊ីន ដោយគ្មានមេរោគ ហើយដែលមានភាពងាយស្រួល ក្នុងការស្តុកទុក។ សម្រាប់ពេលនេះ ឥណ្ឌូណេស៊ី គឺជាប្រទេសទីមួយហើយ ដែលអនុញ្ញាតឲ្យប្រើវ៉ាក់សាំងនេះ។
ចុះផ្សាយនៅថ្ងៃ៖
ស្តាប់ - ០២:០៧
វ៉ាក់សាំងបង្ការកូវីដថ្មីមួយទៀត ដែលមានឈ្មោះថា Covovax ត្រូវបានស្រាវជ្រាវរកឃើញដោយ មន្ទីរពិសោធន៍ឱសថអាមេរិក Novavax។ រដ្ឋាភិបាលឥណ្ឌូណេស៊ី បានសម្រេច ផ្តល់អាជ្ញាបណ្ណឲ្យចរាចរណ៍ និងប្រើប្រាស់វ៉ាក់សាំងនេះ ដោយត្រូវផលិតដោយ Serum Institute of India (SII)។
យោងតាមការអះអាងរបស់មន្ទីរពិសោធន៍ Novavax វ៉ាក់សាំងរបស់ខ្លួន គឺត្រូវបានផលិតឡើង ដោយបច្ចេកវិទ្យាថ្មីមួយបែបទៀត ខុសពីវ៉ាក់សាំងទូទៅផ្សេងទៀត។ ពោលគឺវ៉ាក់សាំងបង្ការកូវីដ របស់ Novavax ជាប្រភេទវ៉ាក់សាំងប្រើប្រូតេអ៊ីន ដើម្បីទៅដាស់ឲ្យប្រព័ន្ធការពារខ្លួនកម្រើកឡើង ដោយមិនចាំបាច់ ចាក់បញ្ចូលមេរោគទៅជាមួយទេ។ វ៉ាក់សាំងនេះ អាចត្រូវស្តុកទុកក្នុងទូរទឹកកកធម្មតា សីតុណ្ហភាព ចន្លោះពី២ ទៅ៨°C ពោលគឺមានភាពងាយស្រួល សម្រាប់ប្រទេសក្រីក្រ។
កាលពីខែមិថុនា មន្ទីរពិសោធន៍ Novavax បានចេញផ្សាយលទ្ធផលធ្វើតេស្តសាកល្បងទ្រង់ទ្រាយធំ របស់វ៉ាក់សាំងខ្លួន ដោយបានធ្វើទៅលើមនុស្សចំនួន ៣ម៉ឺននាក់ នៅអាមេរិក និងមិចស៊ិក។ លទ្ធផលបង្ហាញថា វាមានប្រសិទ្ធភាពចំនួន ៩០.៤% ប្រឆាំងនឹងកូវីដ១៩ ហើយ១០០% ក្នុងការការពារមិនឲ្យអ្នកឆ្លង អាចធ្លាក់ខ្លួនឈឺធ្ងន់។
លោក Stanley Erck អគ្គនាយកមន្ទីរពិសោធន៍ Novavax បានបញ្ជាក់ថា ការអនុញ្ញាតរបស់រដ្ឋាភិបាលឥណ្ឌូណេស៊ី ដែលជាប្រទេសមានប្រជាជនច្រើនជាងគេ លំដាប់ទី៤ នៅក្នុងពិភពលោកនេះ គឺវាបានឆ្លុះបញ្ចាំង ឲ្យឃើញអំពីការចូលរួមប្រឹងប្រែង របស់សហគ្រាសឱសថ Novavax ក្នុងការចែកចាយដោយសមភាព នូវវ៉ាក់សាំងបង្ការកូវីដ ជាពិសេសនៅតាមប្រទេសក្រីក្រ។
សូមបញ្ជាក់ថា នៅថ្ងៃចន្ទ ទី១វិច្ឆិកា មន្ទីរពិសោធ៍ Novavax បានអះអាងថា ខ្លួនបានដាក់ពាក្យស្នើសុំអាជ្ញាបណ្ណចែកចាយ វ៉ាក់សាំងរបស់ខ្លួន នៅទីភ្នាក់ងារឱសថអឺរ៉ុប និងកាណាដា។ គេកំពុង រៀបចំឯកសារ ដាក់ពាក្យទៅកាន់អាជ្ញាធរឱសថអង់គ្លេស អូស្ត្រាលី និង អង្គការសុខភាពពិភពលោកផងដែរ។ ចំណែកនៅសហរដ្ឋអាមេរិក មន្ទីរពិសោធន៍ Novavax នឹងដាក់ពាក្យសុំនៅចុងឆ្នាំ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ