តុលាការធម្មនុញ្ញថៃ៖ បាតុកម្មទាមទារកែទម្រង់ស្ថាប័នព្រះមហាក្សត្រគឺស្មើនឹងប៉ុនប៉ងផ្តួលរំលំរាជានិយម
តុលាការធម្មនុញ្ញថៃបានចេញសេចក្តីសម្រេចកាលពីថ្ងៃពុធថា ការទាមទារឲ្យធ្វើកំណែទម្រង់ស្ថាប័នព្រះមហាក្សត្រធ្វើឡើងដោយមេដឹកនាំបាតុករចំនួន ៣រូប កាលពីខែសីហាឆ្នាំ២០២០ គឺស្មើនឹងការប៉ុនប៉ងផ្តួលរំលំរបបរាជានិយម។ សេចក្តីសម្រេចដែលអាចជាការបើកផ្លូវឲ្យមានការចោទប្រកាន់មេដឹកនាំបាតុករពីបទក្បត់ជាតិ។
ចុះផ្សាយនៅថ្ងៃ៖
សេចក្តីសម្រេចរបស់តុលាការធម្មនុញ្ញថៃកាលពីថ្ងៃពុធ ដែលត្រូវបានធ្វើឡើងទៅតាមបណ្តឹងរបស់មេធាវីជាអ្នកគាំទ្ររាជានិយមម្នាក់ បានកំណត់ថា ការទាមទារកំណែទម្រង់ ធ្វើឡើងដោយមេដឹកនាំបាតុកម្មប្រឆាំងរដ្ឋាភិបាលទាំង ៣រូប គឺជាការប្រើប្រាស់រូបភាពសិទ្ធិសេរីភាពបញ្ចេញមតិ ក៏ប៉ុន្តែ បង្កប់ដោយចេតនាចង់ផ្តួលរំលំរបបរាជានិយមអាស្រ័យធម្មនុញ្ញ ហើយថា នេះគឺជាទង្វើផ្ទុយនឹងរដ្ឋធម្មនុញ្ញ និងធ្វើឲ្យប៉ះពាល់ទៅដល់សន្តិសុខជាតិ។
គួររំឭកឡើងវិញថា នៅក្នុងអំឡុងបាតុកម្មនៅឯសកលវិទ្យាល័យធម្មសាត កាលពីខែសីហាឆ្នាំទៅមិញ មេដឹកនាំបាតុករនិស្សិតបានថ្លែងសារទាមទារឲ្យមានកំណែទម្រង់១០ចំណុច ដោយនៅក្នុងចំណោមនោះក៏មានដែរ ការទាមទារឲ្យធ្វើកំណែទម្រង់ស្ថាប័នព្រះមហាក្សត្រ ជាពិសេស ទាមទារឲ្យមានតម្លាភាពផ្នែកហិរញ្ញវត្ថុព្រះបរមរាជវាំង និងទាមទារលុបចោលច្បាប់ដាក់ទោសបទប្រមាថព្រះមហាក្សត្រ។
តុលាការធម្មនុញ្ញថៃ ដែលមានសមត្ថកិច្ចជំនុំជម្រះតែទៅលើធម្មនុញ្ញភាពនោះ មិនបានកាត់សេចក្តី អំពីទោសទណ្ឌទៅលើមេដឹកនាំបាតុករទាំង ៣រូបនេះទេ ក៏ប៉ុន្តែ មានការបារម្ភថា សេចក្តីសម្រេចរបស់តុលាការធម្មនុញ្ញនេះអាចនឹងត្រូវតុលាការព្រហ្មទណ្ឌយកទៅប្រើជាមូលដ្ឋានច្បាប់ ចោទប្រកាន់មេដឹកនាំបាតុករពីបទក្បត់ជាតិ។
បច្ចុប្បន្ននេះ ក្នុងចំណោមមេដឹកនាំបាតុករទាំង ៣រូប មានពីររូបកំពុងជាប់ក្នុងមន្ទីរឃុំឃាំងរួចទៅហើយ ដោយជាប់ចោទពីបទប្រមាថព្រះមហាក្សត្រ។ បទប្រមាថព្រះមហាក្សត្រ ដែលតាមច្បាប់ព្រហ្មទណ្ឌថៃ អាចត្រូវជាប់ទោសពន្ធនាគាររយៈពេល ១៥ឆ្នាំ ចំណែកបទល្មើសប៉ុនប៉ងផ្តួលរំលំរបបរាជានិយមវិញ ដែលជាទោសក្បត់ជាតិ អាចនឹងត្រូវជាប់ទោសពន្ធនាគារមួយជីវិត ឬអាចរហូតដល់ត្រូវប្រហារជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ