លោកចូ បៃដិន បានអះអាងថា លោកមិនបានចង់ជំរុញ ឲ្យតៃវ៉ាន់ប្រកាសឯករាជ្យនោះទេ
កាលពីថ្ងៃចន្ទ លោក ចូ បៃដិន បានជួបសន្ទនាគ្នាពីចំងាយ ជាមួយលោក ស៊ី ជីនពីង ខណៈដែលប្រទេសមហាអំណាចទាំង២នេះ កំពុងតែមានរឿងប្រឈមមុខដាក់គ្នា ជាច្រើនសំណុំរឿង ជាក់ស្តែងគឺសំណុំរឿងកោះតៃវ៉ាន់។ ឆ្លើយតបទៅកាន់អ្នកកាសែត ដែលសួរលោកកាលពីថ្ងៃអង្គារទី១៦វិច្ឆិកា ស្តីពីបញ្ហាតៃវ៉ាន់នេះ លោក ចូ បៃដិន បានឆ្លើយបញ្ជាក់ថា លោកមិនមានចេតនាណាមួយ ទៅជំរុញតៃវ៉ាន់ ឲ្យប្រកាសឯករាជ្យនោះទេ។
ចុះផ្សាយនៅថ្ងៃ៖
ស្តាប់ - ០២:៣៣
ក្នុងពេលលោក ចូ បៃដិន កំពុងធ្វើទស្សនកិច្ចនៅរដ្ឋ New Hampshire កាលពីថ្ងៃអង្គការទី ១៦វិច្ឆិកា អ្នកកាសែត បានជជីកសួរលោក អំពីជំនួបប្រជុំពីចំងាយជាមួយលោក ស៊ី ជីនពីង កាលពីថ្ងៃចន្ទ ហើយថាតើមានអ្វីប្រែប្រួលខ្លះ ទាក់ទិននឹងបញ្ហាកោះតៃវ៉ាន់។
លោក ចូ បៃដិន បានឆ្លើយថា អ្វីដែលលោកបាននិយាយយ៉ាងច្បាស់ ទៅកាន់លោកប្រធានាធិបតីចិន គឺថា អាមេរិកនឹងបន្តគោរព អនុវត្ត ច្បាប់ស្តីពីតៃវ៉ាន់ Taiwan Act។ ពោលគឺវាជាច្បាប់ អនុម័តដោយសភាខុនហ្ក្រេស នៅឆ្នាំ១៩៧៩ តម្រូវឲ្យអាមេរិកសន្យាទទួលស្គាល់ប្រទេសចិនតែមួយ តែអាមេរិកត្រូវជួយជំនុកបម្រុងគ្រឿងសព្វាវុធ ដល់តៃវ៉ាន់ ដើម្បីការពារខ្លួន។ លោក ចូ បៃដិន បានប្រាប់កាសែតទៀតថា បើនិយាយទៅ តៃវ៉ាន់ហាក់បីដូចជាមានភាពឯករាជ្យទៅហើយបច្ចុប្បន្ននេះ ព្រោះតៃវ៉ាន់សម្រេចអ្វីដោយខ្លួនឯងទាំងអស់។
ឃ្លាចុងក្រោយនេះ ត្រូវបានអ្នកកាសែតចាប់ជាប់ នឹងបានជជីកសួរបន្ត ព្រោះថា វាអាចមានខ្លឹមសារ ធ្វើឲ្យចិនខឹងក្រេវក្រោធ។ លោក ចូ បៃដិន បានបញ្ជាក់បន្ថែមទេ « យើងមិនជំរុញ លើកទឹកចិត្ត ឲ្យតៃវ៉ាន់ប្រកាសឯករាជ្យនោះទេ។ យើងជំរុញតៃវ៉ាន់ ឲ្យធ្វើតែរឿង ដូចដែលមានកំណត់ក្នុង Taiwan Act តែប៉ុណ្ណោះ។ ការសម្រេចចិត្តទាំងឡាយ វាគឺជារបស់តៃវ៉ាន់ មិនមែនរបស់សហរដ្ឋអាមេរិកទេ »។ លោកចូ បៃដិន ក៏បានបញ្ជាក់ជាថ្មីផងដែរ ថាសហរដ្ឋអាេមរិក មិនបានផ្លាស់ប្តូរគោលជំហរនយោបាយទេ ទាក់ទិននឹងសំណុំរឿងតៃវ៉ាន់នេះ។
សូមរំលឹកថា កាលពីថ្ងៃចន្ទ ក្នុងពេលនិយាយគ្នាជាមួយលោក ស៊ី ជីនពីង លោកចូ បៃដិនបានលើកឡើងថា សហរដ្ឋអាមេរិក ប្រឆាំងដាច់ខាត នូវចេតនាជាឯកត្តោភាគីណាមួយ ដែលមកចង់ផ្លាស់ប្តូរស្ថានការណ៍ ធ្វើឲ្យមានបញ្ហាអស្ថិរភាព អសន្តិសុខក្នុងតំបន់ច្រកសមុទ្រតៃវ៉ាន់។ គួរកត់សំគាល់ថា ឃ្លានេះ លោក ចូ បៃដិន ក៏ហាក់ចង់ផ្ញើសារទៅកាន់ថ្នាក់ដឹកនាំកោះតៃវ៉ាន់ដែរ ថាមិនត្រូវធ្វើអ្វីមួយ ឲ្យជ្រុលជ្រួសនោះទេ។
គួររំលឹកដែរថា កាលពីពេលថ្មីៗនេះ លោកចូ បៃដិន ក៏បាននិយាយជ្រុលមាត់ម្តងដែរ ទាក់ទិននឹងបញ្ហាតៃវ៉ាន់នេះ ដោយលោកអះអាងថា ក្នុងករណី មានការវាយប្រហារណាមួយពីសំណាក់ចិន នោះអាមេរិកត្រៀមខ្លួននឹងលើកកម្លាំងទៅជួយតៃវ៉ាន់។ ជាសំដីដែលមានខ្លឹមសារ ផ្ទុយស្រឡះពីគោលនយោបាយយុទ្ធសាស្ត្ររបស់អាមេរិកនាពេលកន្លងមក ដែលមិនដែលបញ្ជាក់ឲ្យច្បាស់ថា អាេមរិកនឹងលើកទ័ពទៅជួយតៃវ៉ាន់នោះទេ។ ក្រោយការលើកឡើងដោយជ្រុលមាត់ របស់លោកចូ បៃដិននេះ សេតវិមានបានចេញសេចក្តីប្រកាសថា គោលនយោបាយរដ្ឋាភិបាលអាមេរិក គឺនៅដដែល មិនបានប្រែប្រួលទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ