ការសិក្សា៖ការបញ្ចេញឧស្ម័នកាបូនិកនៅចិនបានធ្លាក់ចុះនៅត្រីមាសទី៣ ឆ្នាំ ២០២១
នៅថ្ងៃព្រហស្បតិ៍ ទី២៤ វិច្ឆិកា មជ្ឈមណ្ឌលស្រាវជ្រាវថាមពល និងខ្យល់ស្អាតហៅកាត់ CREA ដែលមានមូលដ្ឋានក្នុងប្រទេសហ្វាំងឡង់បានចេញផ្សាយរបាយការណ៍មួយស្តីពីការបញ្ចេញឧស្ម័នកាបូនិកនៅក្នុងប្រទេសចិន។ តាមរបាយការណ៍ ការបញ្ចេញឧស្ម័នកាបូនិកនៅចិនសម្រាប់ត្រីមាសទី៣ មានការធ្លាក់ចុះគួរឲ្យកត់សម្គាល់។ គួរបញ្ជាក់ថា ចិនបានសន្យាពីការឈានដល់ចំណុចកំពូលនៃការបញ្ចេញឧស្ម័នកាបូនិកនៅឆ្នាំ ២០៣០ មុននឹងឈានដល់អព្យាក្រឹត្យកាបោននៅឆ្នាំ ២០៦០។
ចុះផ្សាយនៅថ្ងៃ៖
ស្តាប់ - ០២:០០
តាំងពីចិនបានស្គាល់សន្ទុះសេដ្ឋកិច្ចឡើងវិញចាប់ពីត្រីមាសទី២ ឆ្នាំ ២០២០ មក នេះជាលើកទី១ ដែលការបញ្ចេញឧស្ម័នកាបូនិកនៅចិនមានការធ្លាក់ចុះសម្រាប់ត្រីមាសទី៣ ឆ្នាំ ២០២១។ តាមរបាយការណ៍របស់មជ្ឈមណ្ឌលស្រាវជ្រាវថាមពល និងខ្យល់ស្អាតដែលមានទីស្នាក់ការក្នុងប្រទេសហ្វាំងឡង់ មានហេតុផលចំនួនពីរដែលពន្យល់ពីការធ្លាក់ចុះការបញ្ចេញឧស្ម័នកាបូនិកនៅចិនសម្រាប់ត្រីមាសទី៣ ឆ្នាំ ២០២១ ទី១ ការអនុវត្តន៍វិធានការតឹងតែងរបស់រដ្ឋាភិបាលចិននៅក្នុងវិស័យអចលនទ្រព្យ។ វិធានការមួយនេះបានកម្រិតចំនួនការសាងសង់អាគារ និងផ្ទះសម្បែង។
ហេតុផលទី២ ដែលបញ្ជាក់ពីការធ្លាក់ចុះនូវការបញ្ចេញឧស្ម័នកាបូនិកនៅចិនសម្រាប់ត្រីមាសទី៣ ឆ្នាំ ២០២១ គឺកង្វះធ្យូងថ្មប្រើប្រាស់ដែលកំពុងបង្កឲ្យមានកង្វះភ្លើងអគ្គិសនីប្រើប្រាស់នៅទូទាំងប្រទេសចិន។ គួរបញ្ជាក់ថា ចិនបានបោះទុនវិនិយោគច្រើនណាស់សម្រាប់ថាមពលកកើតឡើងវិញ និងថាមពលនុយក្លេអ៊ែរ។ តែនៅចំពោះមុខពេលនេះ ចិនកំពុងពឹងខ្លាំងលើធ្យូងថ្មសម្រាប់ផលិតភ្លើងអគ្គិសនី។ គឺការប្រើធ្យូងថ្មដែលជាប្រភពនៃការបញ្ចេញឧស្ម័នកាបូនិក។ តែចិនធ្លាប់បានសន្យាថា ការបញ្ចេញឧស្ម័នកាបោននឹងឡើងដល់កំពូលនៅឆ្នាំ ២០៣០ មុននឹងឈានដល់អព្យាក្រឹត្យកាបោននៅឆ្នាំ ២០៦០។
លោកស្រីឡូរី មីលីវាតា អ្នកវិភាគនៅមជ្ឈមណ្ឌលស្រាវជ្រាវថាមពល និងខ្យល់ស្អាតបានមើលឃើញថា វិធានការរបស់ចិននៅក្នុងវិស័យអចលនទ្រព្យពេលនេះអាចធ្វើឲ្យចិនសម្រេចបានគោលដៅមុនការកំណត់។ តែរបាយការណ៍របស់មជ្ឈមណ្ឌលស្រាវជ្រាវថាមពល និងខ្យល់ស្អាតបានព្រមានទុកជាមុនថា បើរដ្ឋាភិបាលចិនចាត់វិធានការថ្មីៗបន្ថែមទៀតដើម្បីផ្តល់សន្ទុះសេដ្ឋកិច្ច ការបញ្ចេញឧស្ម័នការបូនិកក៏នឹងអាចកើនឡើងជាថ្មីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ