រដ្ឋមន្ត្រីការពារជាតិអាល្លឺម៉ង់ ថារុស្ស៊ីមិនអាចមកដាក់កំហិត ឲ្យអូតង់ធ្វើតាមការចង់បានរបស់ខ្លួននោះទេ
លោកស្រី Christine Lambrecht រដ្ឋមន្ត្រីក្រសួងការពារជាតិថ្មី របស់អាល្លឺម៉ង់ បានទៅធ្វើទស្សនកិច្ចក្រៅប្រទេស ជាលើកទីមួយ នៅប្រទេសលីទុយអានី។ ទស្សនកិច្ចរបស់លោករដ្ឋមន្ត្រីការពារជាតិអាល្លឺម៉ង់ នៅពេលនេះ គឺស្ថិតក្នុងកាលៈទេសៈ ដែលមានភាពតានតឹង បន្ទាប់ពីរុស្ស៊ីបានចល័តទ័ពយ៉ាងសកម្ម នៅក្បែរព្រំដែនអ៊ុយក្រែន។ លោកស្រីរដ្ឋមន្ត្រីការពារជាតិអាល្លឺម៉ង់ បានលើកឡើងថា សមាជិកអូតង់ត្រូវពិចារណាចំពោះសំណើររបស់រុស្ស៊ី តែរុស្ស៊ីមិនអាចដាក់កំហិត ឲ្យអូតង់ធ្វើតាមការយល់ឃើញរបស់ខ្លួននោះដែរ។
ចុះផ្សាយនៅថ្ងៃ៖
ស្តាប់ - ០២:២៧
ការចល័តទ័ពរបស់រុស្ស៊ី ប្រមាណ១សែននាក់ នៅក្បែរព្រំដែនអ៊ុយក្រែន កំពុងធ្វើឲ្យប្រទេសតំបន់បាល់ទិក អេស្តូនី ឡេតូនី និងលីទុយអានី មានការព្រួយបារម្ភជាខ្លាំង។ លោកស្រី Christine Lambrecht រដ្ឋមន្ត្រីការពារជាតិថ្មី របស់អាល្លឺម៉ង់ បានទៅដល់មូលដ្ឋានទ័ព Rukla របស់អូតង់ នៅលីទុយអានី នៅថ្ងៃអាទិត្យទី១៩ធ្នូ ដើម្បីពិនិត្យ និងលើកទឹកចិត្តកម្លាំងទាហានអាល្លឺម៉ង់ ប្រមាណ៥៥០នាក់ ដែលដឹកនាំប្រតិបត្តិការនៅទីនោះ។
ថ្លែងទៅកាន់អ្នកកាសែត លោកស្រីរដ្ឋមន្ត្រីការពារជាតិអាល្លឺម៉ង់ បានលើកឡើងថា « យើងត្រូវតែ រកដំណោះស្រាយ ដើម្បីបន្ធូរបន្ថយភាពតានតឹងឲ្យបាន ដោយត្រូវប្រើទាំងផ្លូវការទូត និង ការត្រៀមកម្លាំងសំឡុតបកទៅវិញ »។ លោកស្រីបានបញ្ជាក់ថា « យើងត្រូវតែជជែក ពិភាក្សាគ្នា ទាក់ទិននឹងសំណើ ដែលរុស្ស៊ីស្នើមក ព្រោះវាជារឿងចាំបាច់។ ក៏ប៉ុន្តែ វាជារឿងដែលមិនអាចទទួលយកបានទេ បើរុស្ស៊ីចង់ដាក់កំហិត ចាប់បង្ខំឲ្យអូតង់ និងប្រទេសសម្ព័ន្ធមិត្ត ត្រូវធ្វើតាមគំនិតយល់ឃើញរបស់រុស្ស៊ីតែម្នាក់នោះ។
ដោយឡែក លោក Arvydas Anusauskas រដ្ឋមន្ត្រីការពារជាតិលីទុយអានី បានប្រាប់ទៅលោកស្រីរដ្ឋមន្ត្រីការពារអាល្លឺម៉ង់ថា បច្ចុប្បន្ននេះរុស្ស៊ីបានបញ្ជូនទ័ព មកក្បែរព្រំដែនខាងកើតរបស់អឺរ៉ុប មានចំនួនលើសកម្លាំងទ័ពរបស់អូតង់ ចំនួនដល់ទៅ១០ដង។ លោកបានបន្ថែមទៀតថា អូតង់ និងអឺរ៉ុប ត្រូវតែច្រានចោលទាំងស្រុង នូវសំណើរបស់រុស្ស៊ី ព្រោះវាជាសំណើដែលនឹងធ្វើឲ្យសន្តិសុខរបស់អឺរ៉ុប ចុះទន់ខ្សោយ។
សូមរំលឹកថា កាលពីសប្តាហ៍មុន ភាគីរុស្ស៊ីបានស្នើមកកាន់អឺរ៉ុបថា ត្រូវតែរៀបចំយន្តការកាត់បន្ថយតួនាទីរបស់អាមេរិក និងអង្គការអូតង់ នៅក្នុងតំបន់អឺរ៉ុបខាងកើត និងនៅតាមប្រទេសអតីតសហភាពសូវៀត។ បន្ថែមពីនេះទៀត រុស្ស៊ីបានទាមទារថា អូតង់មិនត្រូវទទួលសមាជិកថ្មីបន្ថែមទៀតទេ ហើយក៏មិនត្រូវទៅតាំងមូលដ្ឋានទ័ព នៅតាមប្រទេសអតីតសហភាពសូវៀតដែរ។ ជាសំណើដែលរុស្ស៊ីចង់ហាម មិនឲ្យអូតង់ទទួលអ៊ុយក្រែន ចូលជាសមាជិក។
គួរកត់សំគាល់ថា លោកស្រី Christine Lambrecht រដ្ឋមន្ត្រីក្រសួងការពារជាតិអាល្លឺម៉ង់ថ្មី ត្រូវគេមើលឃើញថា មានគោលជំហររឹង និងហានតទល់ខ្លាំងជាមួយរុស្ស៊ី។ មុននឹងចេញទៅលីទុយអានី លោកស្រីបានថ្លែងនៅក្នុងបទសម្ភាសន៍តាមកាសែតអាល្លឺម៉ង់ ថា អឺរ៉ុបត្រូវតែពិចារណាបន្ថែមទណ្ឌកម្ម ទាំងសេដ្ឋកិច្ច ទាំងការទូតទៅលើរុស្ស៊ី និងជាពិសេស គឺទៅលើលោកពូទីន ព្រមទាំងក្រុមបក្សពួកស្និទ្ធស្នាលតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ