ថៃសម្រេចដាក់កំហិត ការធ្វើចត្តាឡីស័ក១០ថ្ងៃ លើអ្នកដំណើរបរទេស ដើម្បីទប់ស្កាត់កូវីដអូមីក្រុង
រដ្ឋាភិបាលថៃ បានសម្រេចដាក់កំហិតការធ្វើចត្តាឡីស័កឡើងវិញ ទៅលើអ្នកធ្វើដំណើរចូលប្រទេសថៃ។ នេះគឺជាការសម្រេច កាលពីថ្ងៃអង្គារទី២១ធ្នូ ដើម្បីទប់ស្កាត់ការឆ្លងរាលដាលកូវីដបំប្លែងខ្លួនអូមីក្រុង តាមរយៈភ្ញៀវទេសចរណ៍បរទេស ចូលទៅក្នុងប្រទេសថៃ។ វិធានការរិតបន្តឹងជាថ្មីនេះ នឹងមកបង្ហារការស្ទុះឡើងវិញ នៃវិស័យទេសចរណ៍ ខណៈដែលពេលនេះ គឺជារដូវវិស្សមកាល ដ៏សំខាន់។
ចុះផ្សាយនៅថ្ងៃ៖
ស្តាប់ - ០១:៥៦
អ្នកដំណើរបរទេស ដែលបានចាក់វ៉ាក់សាំងរួចរាល់ហើយ ពេលធ្វើដំណើរទៅដល់ប្រទេសថៃ គឺត្រូវមានកាតព្វកិច្ច ធ្វើចត្តាឡីស័កចំនួន១០ថ្ងៃ នៅក្នុងសណ្ឋាគារ ឬមួយក៏អាចទៅស្នាក់នៅលើកោះភូកេត រយៈពេល៧ថ្ងៃ មុននឹងអាចចេញមកក្រៅ ធ្វើដំណើរទៅទីកន្លែងផ្សេងទៀតបាន។
ដើម្បីទប់ស្កាត់ការឆ្លងរាលដាល កូវីដអូមីក្រុង វិធានការថ្មីសម្រេចដោយរដ្ឋាភិបាលថៃនេះ នឹងចូលជាធរមាន ចាប់ពីថ្ងៃទី២១ធ្នូ រហូតដល់ថ្ងៃទី ៤ មករាយ៉ាងហោច។ តែយ៉ាងណាវិធានការនេះ នឹងមិនអនុវត្តទៅលើអ្នកដំណើរប្រមាណ ២សែននាក់ ដែលបានដាក់ពាក្យ បំពេញបែបបទចូលប្រទេសថៃរួចរាល់ សម្រាប់សប្តាហ៍ខាងមុខទេ។ នេះបើផ្អែកតាមការបញ្ជាក់ពីលោក Tanakorn Wangboonkongchana អ្នកនាំពាក្យរដ្ឋាភិបាលថៃ។
លោកបានបន្ថែមថា មនុស្សទាំងនេះ អាចចូលប្រទេសថៃបាន ក៏ប៉ុន្តែនឹងត្រូវគោរពវិធានការរិតបន្តឹងខ្លះ តួួយ៉ាងដូចជា ការធ្វើតេស្ត PCR ជាលើកទី២។ តែការធ្វើតេស្តនេះ គឺរដ្ឋាភិបាលថៃ ជាអ្នកចំណាយប្រាក់។
គួរបញ្ជាក់ថា ក្រោយការបិទខ្ទប់សឹងទាំងស្រុង អស់រយៈពេល១៨ខែ វិស័យទេសចរណ៍ថៃ បានរងនូវផលប៉ះពាលជាខ្លាំង។ នៅដើមខែវិច្ឆិកា អាជ្ញាធរថៃ បានចាប់បើកទ្វារ ទទួលទេសចរណ៍ដែលចាក់វ៉ាក់សាំងហើយ មកពីបណ្តាប្រទេសជាង៦០ប្រទេស ដោយត្រូវបង្ហាញលទ្ធផលតេស្តអវិជ្ជមាន។ គិតត្រឹមថ្ងៃទី ២១ធ្នូ យោងតាមតួលេខផ្លូវការ របស់អាជ្ញាធរសុខាភិបាលថៃ នៅថៃគេបានរកឃើញករណីវិជ្ជមានកូវីដអូមីក្រុង ចំនួន៦៤ករណី ដោយក្នុងនោះមាន ១ករណី ជាករណីឆ្លងក្នុងស្រុក។
ឆ្នាំ២០២០ សេដ្ឋកិច្ចបានធ្លាក់ចុះខ្លាំងបំផុត គិតចាប់ពីឆ្នាំ១៩៩៧មក សោយសារតែគ្មានចំណូលពីវិស័យទេសចរណ៍ ដែលជាសរសរទ្រូងដ៏សំខាន់។ ឆ្នាំ២០១៩ ថៃបានទទួលទេសចរណ៍បរទេស ចំនួនជិត៤០លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ