ចិនដកតំណែងមេដឹកនាំនៅស៊ីអាន ក្រោយមានផ្ទុះករណីឆ្លងកូវីដច្រើន
បន្ទាប់ពីបានបិទខ្ទប់តំបន់ដែលមានប្រជាជនរស់នៅសរុបជាង១៣លាននាក់ អស់រយៈពេល១២ថ្ងៃ ចំនួនអ្នកឆ្លងកូវីដថ្មីបានចាប់ផ្តើមធ្លាក់ចុះវិញហើយ នៅខេត្តស៊ីអាន។ ប៉ុន្តែអ្នកទទួលខុសត្រូវខេត្តពីររូប ត្រូវបានដកចេញពីតំណែងនៅថ្ងៃអាទិត្យទី ២មករាម្សិលមិញ។ នេះបើតាមប្រព័ន្ធផ្សព្វផ្សាយព័ត៌មានផ្លូវការចិន។
ចុះផ្សាយនៅថ្ងៃ៖
ស្តាប់ - ០២:០០
កាលពីខែមុន មានមន្ត្រីជាច្រើនសិបរូបហើយ បានបាត់បង់តួនាទី ពីបទធ្វេសប្រហែសក្នុងចំណាត់ការគ្រប់គ្រងនិងការពារជំងឺរាតត្បាត។ ពេលនេះ គឺដល់វេនមន្ត្រីនៅ ស៊ីអានម្តង។ នៅល្ងាចថ្ងៃអាទិត្យទី ២មករា២០២២ ម្សិលមិញ អាជ្ញាធរតំបន់បានប្រកាសដកចេញពីតំណែង នូវអ្នកទទួលខុសត្រូវនៃបក្សកុម្មុយនិស្តចិននៅស្រុក Yanta ចំនួនពីររូប។ មូលហេតុគឺ ដើម្បីពង្រឹងកិច្ចការពារនិងគ្រប់គ្រងជំងឺរាតត្បាតកូវីដ១៩ នៅក្នុងតំបន់។ វាជាការចាំបាច់បំផុត ដែលចិនត្រូវជម្រះនិងបំបាត់ករណីកូវីដឱ្យបាត់អស់ពីសង្គម។ នេះបើតាមប្រព័ន្ធផ្សព្វផ្សាយព័ត៌មានផ្លូវការ ប្រចាំតំបន់។
រងការគំរាមកំហែងកូវីដយ៉ាងខ្លាំង អាជ្ញាធរចិនបានសម្រេចបិទខ្ទប់តំបន់ស៊ីអាន តាំងពីដើមខែធ្នូ មក និងបានបើកប្រតិបត្តិការធ្វើតេស្តកូវីដទូទាំងតំបន់ ស្របតាមយុទ្ធសាស្ត្រហ្សេរ៉ូ “សូន្យ”កូវីដ កំណត់ដោយរដ្ឋាភិបាល។ ជាមួយនឹងវិធានការបិទខ្ទប់ដ៏តឹងរឹងពេក និងទោះបីជាអាជ្ញាធរប្រឹងធានាផ្គត់ផ្គង់សេចក្តីត្រូវការប្រចាំថ្ងៃរបស់ប្រជាពលរដ្ឋក្តី ក៏វិបត្តិខ្វះស្បៀងអាហារបរិភោគ នៅតែកើតឡើងបាន។ តាំងពីប៉ុន្មានថ្ងៃចុងក្រោយមកនេះ ពលរដ្ឋស៊ីអាន បាននាំគ្នាស្រែកតាមប្រព័ន្ធសង្គមថ្ងូចថ្ងូរភាពលំបាកនិងការស្រែកឃ្លានរបស់ពួកគេ។
សេចក្តីសម្រេចដកតំណែងនេះ ប្រព្រឹត្តទៅក្នុងខណៈដែល ចំនួនអ្នកឆ្លងចាប់ផ្តើមធ្លាក់ចុះមកវិញ។ ៩២ករណីថ្មី សម្រាប់ថ្ងៃចន្ទទី ៣មករា ទល់នឹង១២២ករណីកាលពីម្សិល។ ជាសរុប ខេត្តស៊ីអានរាប់មានអ្នកឆ្លងកូវីដ ចំនួន ១៦០០នាក់ គិតចាប់ពីត្រឹមថ្ងៃទី ៩ធ្នូមក។ ជាចំនួនដ៏តិចតួចណាស់បើប្រៀបទៅនឹងចំនួនអ្នកឆ្លងនៅក្នុងបណ្តាប្រទេសផ្សេងនៅលើពិភពលោក តែជាចំនួនដ៏ច្រើនខ្លាំងបំផុតមិនធ្លាប់មានទេ តាំងពីកូវីដបានផ្ទុះឡើង សម្រាប់ប្រទេសចិន ដែលនៅសល់តែមួយខែទៀត ដល់ថ្ងៃបើកកម្មវិធីប្រកួតកីឡាអូឡាំពិករដូវរងារ នៅប៉េកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ