ជប៉ុននិងអូស្រ្តាលីចុះសន្ធិសញ្ញាការពារជាតិក្រោមក្រសែភ្នែកសម្លឹងទៅចិន
ជប៉ុននិងអូស្ត្រាលី បានចុះហត្ថលេខាលើសន្ធិសញ្ញាការពារជាតិនិងសន្តិសុខនាថ្ងៃព្រហស្បតិ៍ ទី៦ មករា ឆ្នាំ២០២២។ មេដឹកនាំនៃប្រទេសទាំងពីរនិយាយថាកិច្ចព្រមព្រៀងនេះនឹងរួមចំណែកជួយដល់ស្ថិរភាពក្នុងតំបន់ នៅខណៈដែលចិនកំពុងតែពង្រីកទាំងឥទ្ធិពលយោធានិងសេដ្ឋកិច្ចនៅឥណ្ឌូប៉ាស៊ីហ្វិក។
ចុះផ្សាយនៅថ្ងៃ៖
ស្តាប់ - ០២:១២
សន្ធិសញ្ញាខាងលើត្រូវបានចុះហត្ថលេខាក្នុងកិច្ចប្រជុំកំពូលតាមអនឡាញរវាងលោកនាយករដ្ឋមន្ត្រីអូស្ត្រាលី ស្កុត ម៉ូរីសុន និងសមភាគីជប៉ុនលោក ហ្វូមីអូ គីស៊ីដា។ តើសន្ធិសញ្ញានេះជាអ្វី?
ឈ្មោះរបស់ចិនមិនត្រូវបានលើកឡើងដោយផ្ទាល់នោះទេនៅក្នុងសេចក្តីថ្លែងការណ៍ដែលបានចេញផ្សាយនៅមុនកិច្ចប្រជុំរវាងមេដឹកនាំអូស្ត្រាលី និងជប៉ុន។ ក៏ប៉ុន្តែសន្ធិសញ្ញានេះត្រូវបានគេមើលឃើញថាជាការបោះជំហានថ្មីមួយបន្ថែមទៀតរបស់ប្រទេសសម្ព័ន្ធមិត្តទាំងពីរដែលកំពុងព្រួយបារម្ភចំពោះការពង្រីកឥទ្ធិពលយោធារបស់ចិន។
នៅមុខកិច្ចប្រជុំ លោកនាយករដ្ឋមន្ត្រីអូស្ត្រាលីក៏និយាយដែរថាសន្ធិសញ្ញានេះនឹងក្លាយទៅការប្តេជ្ញាចិត្តរបស់ប្រទេសទាំងពីរដើម្បីធ្វើកិច្ចសហប្រតិបត្តិការជាមួយគ្នានិងដើម្បីរួមចំណែកជួយឲ្យតំបន់ឥណ្ឌូប៉ាស៊ីហ្វិកមានសុវត្ថិភាពនិងស្ថិរភាព។ បើតាមមេដឹកនាំអូស្ត្រាលីដដែល សន្ធិសញ្ញាខាងលើនឹងផ្តល់នូវក្របខ័ណ្ឌច្បាស់លាស់មួយសម្រាប់ការពង្រឹងកិច្ចសហប្រតិបត្តិការរវាងកងកម្លាំងជប៉ុន-អូស្ត្រាលី។
ក្រៅពីនេះ មេដឹកនាំនៃប្រទេសជប៉ុន-អូស្ត្រាលី ក៏បានជជែកពិភាក្សាគ្នាផងដែរពីឱកាសដើម្បីពង្រឹងភាពជាដៃគូលើថាមពលស្អាត បច្ចេកវិទ្យា និងការពង្រឹងចំណងបក្សសម្ព័ន្ធចតុភាគី។
ប្រទេសជប៉ុន អូស្ត្រាលី សហរដ្ឋអាមេរិក និងឥណ្ឌា គឺជាដៃគូយុទ្ធសាស្ត្រនៃបក្សសម្ព័ន្ធចតុភាគី ដែលត្រូវបានបង្កើតឡើងដើម្បីប្រឈមមុខទៅនឹងការកើនឡើងឥទ្ធិពលរបស់ចិននៅទូទាំងអាស៊ី រួមទាំងការគំរាមកំហែងរបស់ចិននៅច្រកផ្លូវសមុទ្រអន្តរជាតិសំខាន់ៗផ្សេងទៀត។
ក្រុមអ្នកវិភាគនិយាយថាសន្ធិសញ្ញាថ្មីរវាងជប៉ុននិងអូស្ត្រាលីបង្ហាញពីការទទួលស្គាល់នូវសារៈសំខាន់ក្នុងការបង្កើតភាពជាដៃគូការពារជាតិដ៏រឹងមាំ ដើម្បីរាំងខ្ទប់ឥទ្ធិពលរបស់ក្រុងប៉េកាំង។ បើតាមក្រុមអ្នកវិភាគដែរ កិច្ចព្រមព្រៀងនេះអាចជួយបង្កើនសមត្ថភាពរបស់ទីក្រុងតូក្យូនិងទីក្រុងកង់បេរ៉ាក្នុងការអនុវត្តសមយុទ្ធយោធារួមគ្នានៅក្នុងប្រទេសជប៉ុនជាមួយសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ