ចិនធ្វើតេស្តកូវីដទ្រង់ទ្រាយធំ នៅក្រុងកៀកប៉េកាំង ក្រោយរកឃើញករណីអូមីក្រុង
ស្ថិតនៅភាគខាងលិចរដ្ឋធានីប៉េកាំង ក្រុងកំពង់ផែធានជីន Tianjing បានបើកយុទ្ធនាការធ្វើតេស្តរកកូវីដទ្រង់ទ្រាយ លើប្រជាជនចំនួន១៤លាននាក់។ យុទ្ធនាការបានចាប់ផ្តើម នៅថ្ងៃអាទិត្យទី ៩មករា បន្ទាប់ពីរកឃើញមានករណីឆ្លងកូវីដជិត ២០នាក់ ក្នុងនោះ ២នាក់មានផ្ទុកមេរោគបំប្លែងខ្លួនថ្មី អូមីក្រុង។ អាជ្ញាធរប្រុងប្រយ័ត្នខ្លាំងណាស់ ព្រោះក្រុងធានជីន ស្ថិតនៅចម្ងាយប្រមាណតែ៣០នាទី ពីប៉េកាំងដែលត្រូវរៀបចំកីឡាអូឡាំពិករដូវរងារប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:១៣
ឱ្យតែមានករណីឆ្លងកូវីដផ្ទុះឡើងក្នុងសហគមន៍ម្តងៗ រូបភាពស្រែកស្លន់ស្លោ រត់ជាន់គ្នានៅតាមហាងទំនិញ មានបង្ហោះផ្សាយតាមប្រព័ន្ធសង្គមភ្លាម ពីព្រោះវិធានការទប់ស្កាត់កូវីដនៅចិន មិនបានប្រែប្រួលទេ គិតចាប់ពីផ្ទុះជំងឺរាតត្បាតនេះឡើងមក។
រកឃើញករណីវិជ្ជមានកូវីដ នៅថ្ងៃសៅរ៍ទី៨មករា អាជ្ញាធរក្រុងធានជីន បានចាប់អនុវត្តវិធានការហ្សេរ៉ូកូវីដភ្លាម ដោយបិទខ្ទប់ ឃុំសង្កាត់ចំនួន ២៨សហគមន៍។ ស្តង់ធ្វើតេស្តរកកូវីដដោយប្រើម៉ាស៊ីនធំ PCR បានលើកមកដាក់បញ្ឈរ តាំងពីយប់នៅក្រោមអាគារខ្ពស់ៗ ដើម្បីឱ្យព្រលឹមឡើងថ្ងៃ អាទិត្យទី ៩មករា ក្រុមការងារអាចចាប់ធ្វើតេស្តស្វែងរកករណីវិជ្ជមាន លើប្រជាជនដែលរស់នៅក្នុងទាំងជាង១៤លាននាក់។
ជាលទ្ធផល អាជ្ញាធរបានរកឃើញករណីឆ្លងថ្មី១៨នាក់បន្ថែមពីលើករណីវិជ្ជមានកូវីដដំបូង២នាក់ ដែលម្នាក់ជាសិស្សនៅសាលាបឋមសិក្សា និងជាអ្នកមើលក្មេង។ ការវិភាគបានបង្ហាញទៀតថា ក្នុងចំណោមអ្នកវិជ្ជមាន ពីរនាក់មានផ្ទុកអូមីក្រុង ប៉ុន្តែគេនៅពុំទាន់ដឹងថាអំពីប្រភពនៃការចម្លងនេះនៅឡើយទេ។
ភ្លាមមួយរំពេច ស្ថានីយ៍រថភ្លើងក្រោមដី បណ្តាញរថយន្តក្រុងត្រូវបិទ ប្រជាពលរដ្ឋក្នុងត្រូវជាប់បម្រាមមិនឱ្យចាកចេញពីក្រុង លើកលែងតែករណីចាំបាច់បំផុត។ គណៈកម្មការពាណិជ្ជកម្មក្រុងធានជីងបានចេញផែនការសង្គ្រោះបន្ទាន់ ដើម្បីធានាផ្គត់ផ្គង់និងរក្សាស្ថិរភាពស្បៀងអាហារ និងសេចក្តីត្រូវចាំបាច់ជាងគេក្នុងជីវភាពប្រចាំថ្ងៃ។ បើតាមអ្នកទទួលខុសត្រូវម្នាក់ ក្នុងជួរគណៈកម្មការ ក្រុងមានអង្ករ មី ប្រេងក្នុងស្តុកសម្រាប់រយៈពេលមួយខែប៉ុណ្ណោះ។ កាលពីខែវិច្ឆិកា រដ្ឋាភិបាលធ្លាប់ទាំងបានប្រកាសណែនាំឱ្យប្រជាពលរដ្ឋត្រៀមរៀបចំស្បៀងអាហារទុកបំរុងសម្រាប់រដូវរងារផង។
ជាវិញ្ញាសាថ្មីមួយទៀតសម្រាប់យុទ្ធសាស្ត្រ គ្មានកូវីដសោះ “ហ្សេរ៉ូកូវីដ” អូមីក្រុងបានរំកិលមកកាន់តែកៀកប៉េកាំង ដែលត្រូវទទួលរៀបចំកីឡាអូពិករដូវរងារខែកុម្ភៈនេះផង។ សូមបញ្ជាក់ថា ធានជីង ស្ថិតនៅចម្ងាយតែប្រមាណពីរម៉ោង ពីប៉េកាំង តាមផ្លូវឡាន និងតែកន្លះម៉ោងប៉ុណ្ណោះបើជិះរថភ្លើងល្បឿនលឿន។ ហើយក្រុងធានជីងជាច្រកចូលដ៏សំខាន់ឆ្ពោះទៅរដ្ឋធានីប៉េកាំង។ តាំងពីខែក្តៅឆ្នាំ២០២០មក រាល់ជំនួបការទូត និងជំនួបជាន់ខ្ពស់អន្តរជាតិប្រព្រឹត្តទៅក្នុងក្រុងកំពង់ផែនេះទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ