ប្រឈមនឹងវិបត្តិខ្វះថវិកា ស្រីលង្កាស្នើឲ្យចិនពិនិត្យរយៈពេលនៃការសងបំណុល
ប្រមុខការទូតចិនលោកវ៉ាង យីបានបំពេញទស្សនកិច្ចនៅក្នុងប្រទេសស្រីលង្កានាថ្ងៃអាទិត្យ ទី៩ មករា។ លោកវ៉ាង យីបានជួបសន្ទនាជាមួយនាយករដ្ឋមន្រ្តីស្រីលង្កាលោកម៉ាហ៊ីនដា រ៉ាយ៉ាប៉ាក់សេនៅក្នុងទីក្រុងកូឡុំបូ។ តែប្រធានាធិបតីស្រីលង្កាលោកហ្គោតាបាយ៉ា រ៉ាយ៉ាប៉ាក់សាបានប្រកាសឲ្យដឹងថា ស្រីលង្កាបានស្នើចិនឲ្យពិនិត្យមើលឡើងវិញលើរយៈពេលនៃការសងបំណុលចិនដែលស្រីលង្កាបានជំពាក់យ៉ាងច្រើនសម្បើម។ គួរបញ្ជាក់ថា ចិនជាអ្នកផ្តល់ប្រាក់កម្ចីទ្វេភាគីដ៏ធំបំផុតរបស់ស្រីលង្កា។
ចុះផ្សាយនៅថ្ងៃ៖
ស្តាប់ - ០២:២០
ក្នុងនាមជាប្រទេសដែលសេដ្ឋកិច្ចបានពឹងផ្អែកខ្លាំងលើវិស័យទេសចរណ៍ ស្រីលង្កាបានរងគ្រោះធ្ងន់ធ្ងរដោយវិបត្តិជំងឺកូវីដ១៩។ វិបត្តិសកលមួយនេះបានធ្វើឲ្យស្រីលង្កាបាត់បង់ចំណូល និងកំពុងជួបវិបត្តិខ្វះថវិកា។ តែដើម្បីបន្តចិញ្ចឹមប្រទេស រដ្ឋាភិបាលគ្មានជម្រើសអ្វីផ្សេងក្រៅពីដកលុយពីហិបបម្រុងរូបិយប័ណ្ណបរទេសទៅចាយទេ។ គិតត្រឹមដំណាច់ខែវិច្ឆិកា ឆ្នាំ ២០២១ ហិបបម្រុងរូបិយប័ណ្ណបរទេសរបស់ស្រីលង្កានៅសល់តែ ១ ៥០០លានដុល្លារប៉ុណ្ណោះ។ ទន្ទឹមនឹងបំពេញការផ្គត់ផ្គង់ក្នុងស្រុក រដ្ឋាភិបាលក៏ត្រូវការសងបំណុលអ្នកផ្សេង ពិសេសបំណុលដ៏ច្រើនសម្បើមដែលប្រទេសអាស៊ីមួយនេះកំពុងជំពាក់ចិន។
អ៊ីចឹងហើយបានជានៅក្នុងជំនួបជាមួយប្រមុខការទូតចិនលោកវ៉ាង យី នាយករដ្ឋមន្រ្តីស្រីលង្កាលោកម៉ាហ៊ីនដា រ៉ាយ៉ាប៉ាក់សេបានស្នើឲ្យចិនពន្យារពេលសងបំណុលដែលស្រីលង្កាជំពាក់។ លោកវ៉ាង យីមិនបានឆ្លើយយ៉ាងម៉េចចំពោះសំណើរបស់លោកម៉ាហ៊ីនដា ហើយស្ថានទូតចិនប្រចាំស្រីលង្កាក៏មិនបានធ្វើអត្ថាធិប្បាយអ្វីលើសំណើរបស់លោកម៉ាហ៊ីនដាដែរ។ ចំណែកវិមានប្រធានាធិបតីស្រីលង្កាបានត្រឹមបញ្ជាក់ថា ប្រធានាធិបតីលោកហ្គោតាបាយ៉ា រ៉ាយ៉ាប៉ាក់សាបានគូសបញ្ជាក់ពីភាពធូរស្បើយ ប្រសិនបើការទូទាត់បំណុលជាមួយចិនអាចនឹងត្រូវបានកំណត់ពេលឡើងវិញនោះ។
គិតត្រឹមខែមេសា ឆ្នាំ ២០២១ ស្រីលង្កាជំពាក់ចិនដល់ទៅ ៣៥ ០០០លានដុល្លារ។ តែទឹកប្រាក់បំណុលនេះអាចនឹងមានច្រើនជាងនេះ បើគេបូកបន្ថែមនូវប្រាក់ខ្ចីដែលចិនបានផ្តល់ឲ្យធនាគារកណ្តាល និងរោងចក្រ សហគ្រាសរបស់រដ្ឋស្រីលង្កា។ គួរបញ្ជាក់ថា ស្រីលង្កាបានខ្ចីលុយចិនច្រើនណាស់ក្នុងរយៈពេល ១០ឆ្នាំនេះសម្រាប់គម្រោងកសាងហេដ្ឋារចនាសម្ព័ន្ធជាច្រើនរបស់ប្រទេស។ តែគម្រោងខ្លះបានធ្លាក់ទឹកមិនអាចបន្តធ្វើបាន និងបានបង្ខំចិត្តប្រគល់ឲ្យក្រុមហ៊ុនចិនជាអ្នកបន្តធ្វើ។ ជាក់ស្តែងក្នុងឆ្នាំ ២០១៧ និងដោយគ្មានលទ្ធភាពសងប្រាក់កម្ចីចំនួន ១ ៤០០លានដុល្លារ រដ្ឋាភិបាលបានបង្ខំចិត្តជួលកំពង់ផែមួយឲ្យក្រុមហ៊ុនចិនក្នុងឆ្នាំ ២០១៧ សម្រាប់រយៈពេល ៩៩ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ