រដ្ឋាភិបាលកាហ្សាក់ស្ថានចោទ ក្រុមភេរវកម្មបរទេស នៅពីក្រោយបាតុកម្មហិង្សាអាណាធិបតេយ្យ
រដ្ឋាភិបាលកាហ្សាក់ស្ថាន បានលើកឡើងថា ចលនាបាតុកម្មហិង្សាអាណាធិបតេយ្យ នាពេលកន្លងមកថ្មីៗនេះ គឺជាស្នាដៃ របស់ក្រុមចលនាភេរវកម្ម ដែលមានប្រភពមកពីបរទេស។ ជាការលើកឡើង ដែលធ្វើឲ្យប្រជាពលរដ្ឋកាហ្សាក់ស្ថានមួយចំនួន មានការស្រឡាំងកាំង និងហួសចិត្តជាខ្លាំង ព្រោះពួកគេដឹងយ៉ាងច្បាស់ ថាគឺប្រជាចលនាបាតុកម្មរបស់ប្រជាពលរដ្ឋ ដែលតវ៉ាដើម្បីជីវភាព ព្រមទាំងប្រឆាំងនឹងអំពើពុករលួយ ហើយអ្នកដែលបានបាញ់សម្លាប់បាតុករជាច្រើនរយនាក់នោះ គឺជាទាហានរបស់រដ្ឋាភិបាលកាហ្សាក់ស្ថាន។
ចុះផ្សាយនៅថ្ងៃ៖
ស្តាប់ - ០៣:០៤
បន្ទាប់ពីបានឮដំណឹងថា រដ្ឋភិបាលកាហ្សាក់ស្ថានបានចោទថា ចលនាបាតុកម្មនាពេលកន្លងមក គឺជាស្នាដៃរបស់ក្រុមភេរវកម្មបរទេស បុរសជនជាតិកាហ្សាក់ស្ថានម្នាក់ បានថ្លែងប្រាប់អ្នកយកព័ត៌មានបារាំង AFP ដោយក្តីហួសចិត្ត ថាគ្មានក្រុមភេរវកម្មបរទេស មកពីណានោះទេ ក្រៅតែពីប្រជាពលរដ្ឋកាហ្សាក់ស្ថាន ដែលបានធ្វើបាតុកម្ម ដើម្បីប្រឆាំងនឹងអំពើពុករលួយ ប្រឆាំងនឹងការដឹកនាំផ្តាច់ការ ដែលធ្វើឲ្យជីវភាពរបស់ពួកគេមានការលំបាកខ្លាំង។ ប្រជាជនកាហ្សាក់ស្ថានបានឃើញនឹងភ្នែកច្បាស់ណាស់ ថាទាហានបានបាញ់សម្លាប់ប្រជាពលរដ្ឋស្លូតត្រង់។
គួរបញ្ជាក់ថា បច្ចុប្បន្ននេះ ស្ថានការណ៍នៅកាហ្សាក់ស្ថាន បានវិលត្រលប់មករកភាពស្ងប់ស្ងាត់វិញហើយ បន្ទាប់ពីរដ្ឋាភិបាលប្រទេសនេះ បានបើកទ្វារឲ្យកងទ័ពរុស្ស៊ី លើកកម្លាំងមកបង្ក្រាបបាតុករ។ កន្លងមក រដ្ឋាភិបាលកាហ្សាក់ស្ថាន បានរក្សាការស្ងាត់ស្ងៀម មិននិយាយអ្វីទាំងអស់ ទាក់ទិននឹងចលនាបាតុកម្ម ក៏ដូចជាការបង្ក្រាបដ៏ហិង្សានេះ។ ស្រាប់តែនៅថ្ងៃទី១៦មករានេះ លោកប្រធានាធិបតី Kassym-Jomart Tokaïev បានចេញមុខប្រកាសថាគឺ « ក្រុមភេរវកម្មបរទេស » ដែលជាអ្នកនៅពីក្រោយចលនាបាតុកម្ម។ រដ្ឋាភិបាលកាហ្សាក់ស្ថាន ក៏បានបង្ហាញតួលេខអ្នកស្លាប់ថាមានចំនួន ២២៥នាក់ ក្នុងនោះ១៩នាក់ជានគរបាល។ តែយ៉ាងណា រដ្ឋាភិបាលមិនបានលំអិតទេ អំពីករណីស្លាប់ប្រជាជនស៊ីវីល។
លោក Galim Aguéleuov សកម្មជនសិទ្ធិមនុស្សម្នាក់ បានលើកឡើងថា ការអះអាងដោយគ្មានបង្ហាញភស្តុតាងត្រឹមត្រូវនេះ វាគ្រាន់តែជាពាក្យកុហកបោកប្រាស់ ដើម្បីផ្តល់ភាពត្រឹមត្រូវឲ្យរដ្ឋាភិបាល ដែលបានអនុញ្ញាតឲ្យកម្លាំងទ័ពរុស្ស៊ីចូលមកអន្តរាគមតែប៉ុណ្ណោះ។ លោក Daniyar Moldabékov អ្នកវិភាគនយោបាយម្នាក់នៅកាហ្សាក់ស្ថាន បានលើកឡើងដែរថាមានប្រជាជនមួយចំនួនតូច ជឿតាមពាក្យឃោសនាកុហកនេះ ថាអ្នកធ្វើបាតុកម្មសុទ្ធតែជាក្រុមអន្ធបាល និងក្រុមភេរវកម្ម។ តែទន្ទឹមនឹងនេះ ប្រជាជនកាហ្សាក់ស្ថានមួយចំនួនធំ ដឹងយ៉ាងច្បាស់ ថាមានប្រជាជនស្លូតត្រង់ច្រើននាក់ណាស់ ដែលត្រូវគេសម្លាប់ និងចាប់ដាក់ឃុំ។
គួររំលឹកថា បាតុកម្មនៅកាហ្សាក់ស្ថានបានផ្ទុះឡើង នៅថ្ងៃទី២មករា ដោយផ្តើមចេញពីការឡើងថ្លៃប្រេងឥន្ធនៈ ឧស្ម័នហ្កាស (GPL) និងបញ្ហាជីវភាពដែលកាន់តែក្រីក្រ។ កំហឹងតវ៉ារបស់ប្រជាជន បានរីករាលដាល ឈានក្លាយជាការតវ៉ាប្រឆាំងនឹងរបបនយោបាយផ្តាច់ការ ពុករលួយ បក្សពួកនិយម របស់ក្រុមអ្នកមានអំណាច។
យោងតាមការវិភាគ ហេតុផលមួយទៀតនៅពីក្រោយចលនាបាតុកម្មនេះដែរ គឺអាចជាការប្រជែងអំណាចគ្នា រវាងលោកប្រធានាធិបតី Kassym-Jomart Tokaïev និងលោកអតីតប្រធានាធិបតី Noursoultan Nazarbaïev។ កាលពីថ្ងៃអង្គារទី១១មករា លោកប្រធានាធិបតី Tokaïev បានចោទលោក Noursoultan Nazarbaïev ថាគឺជាអ្នកបានបង្កើត ឲ្យមានក្រុមបក្សពួកអ្នកមានស្តុកស្តម្ភ អភិជន។ ហើយកាលពីថ្ងៃសៅរ៍ទី១៥មករា កូនប្រសារប្រុស២នាក់ របស់លោកNoursoultan Nazarbaïev ត្រូវបានគេដកចេញ ពីការដឹកនាំក្រុមហ៊ុនថាមពលកាហ្សាក់ស្ថានថែមទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ