ថៃសម្រេចផ្អាក ការអនុវត្តវិធានការកាតព្វកិច្ចធ្វើចត្តាឡីស័ក ទៅលើអ្នកដំណើរបរទេស
ដើម្បីប្រយុទ្ធប្រឆាំង នឹងការឆ្លងរាលដាលកូវីដក្នុងប្រទេសថៃ កាលពីចុងខែធ្នូ រដ្ឋាភិបាលថៃ បានសម្រេច ដាក់កំហិតឲ្យអ្នកដំណើរបរទេសទាំងអស់ ដែលបានមកដល់ទឹកដីថៃ ត្រូវធ្វើចត្តាឡីស័ក។ ក៏ប៉ុន្តែអស់ប្រមាណជិតមួយខែមកនេះ ស្ថានការណ៍ឆ្លងរាលដាល ក៏ដូចជាករណីស្លាប់ដោយសារកូវីដ នៅក្នុងប្រទេសថៃ ហាក់នៅនឹង ទើបជំរុញឲ្យរដ្ឋាភិបាលថៃ សម្រេចនៅថ្ងៃព្រហស្បតិ៍ ទី២០មករា ផ្អាកឈប់អនុវត្តកាតព្វកិច្ចធ្វើចត្តាឡីស័ក ទៅលើអ្នកដំណើរបរទេស។ វិធានការថ្មីនេះ ក៏គឺដើម្បីបើកចំហរ ប្រទេសទទួលភ្ញៀវទេសចរណ៍ឲ្យបានច្រើនឡើងវិញផងដែរ។
ចុះផ្សាយនៅថ្ងៃ៖
ស្តាប់ - ០២:១៦
ចាប់ពីថ្ងៃទី១កុម្ភៈតទៅ អ្នកដំណើរបរទេសទាំងអស់ ដែលបានចាក់វ៉ាក់សាំងហើយ ដែលនឹងមកដល់ទឹកដីថៃ គឺមិនមានកាតព្វកិច្ចធ្វើចត្តាឡីស័កទេ។ អ្នកដំណើរគ្រាន់តែបង្ហាញ លទ្ធផលតេស្តអវិជ្ជមាននៅមុនពេលធ្វើដំណើរមក និងត្រូវធ្វើតេស្តម្តងទៀត ពេលមកដល់ថៃភ្លាម បន្ទាប់មកធ្វើតេស្តលើកទី២ នៅរយៈពេល៥ថ្ងៃបន្ទាប់។ នេះបើផ្អែកតាមការបញ្ជាក់ ពីលោក Taweesin Visanuyothin អ្នកនាំពាក្យរដ្ឋាភិបាលថៃ។
ប្រភពដដែលបានបន្ថែមថា ការធ្វើតេស្ត គឺនឹងត្រូវគេរៀបចំធ្វើ នៅក្នុងសណ្ឋាគារមួយ ដែលអាជ្ញាធរថៃ បានអនុញ្ញាតយកជាទីតាំង។ ក្នុងករណីលទ្ធតេស្តអវិជ្ជមាន អ្នកដំណើរអាចចេញដើរហើរដោយសេរី នៅក្នុងប្រទេសថៃ។ តែយ៉ាងណា រដ្ឋាភិបាលថៃ សូមរក្សាសិទ្ធិ រឹតបន្តឹងវិធានការឡើងវិញ ក្នុងករណីដែលតួលេខឆ្លងរាលដាលកូវីដ ស្ទុះហក់ឡើងនៅថ្ងៃខាងមុខ។
គួររំលឹកថា ក្រោយការបិទទ្វារសឹងតែជិតឈឹង អស់រយៈពេលប្រមាណ១៨ខែ ថៃបានចាប់ផ្តើមបើកច្រកទ្វារ ទទួលអ្នកដំណើរបរទេស ភ្ញៀវទេសចរណ៍ដែលចាក់វ៉ាក់សាំងរួចរាល់ កាលពីខែវិច្ឆិកា ឆ្នាំ២០២១ ដោយអ្នកដំណើរគ្រាន់តែបង្ហាញលទ្ធផលតេស្ត PCR អវិជ្ជមាន។ ក្រោយការបន្ធូរបន្ថយនេះ មានភ្ញៀវទេសចរណ៍ជាច្រើនពាន់នាក់ បានទៅដល់ទឹកដីថៃ ខណៈកូវីដអូមីក្រុង បានចាប់ផ្តើមអន្រួនធ្វើឲ្យពិភពលោកភ័យបារម្ភ។
នៅចុងខែធ្នូ រដ្ឋាភិបាលថៃ បាសម្រេចរិតបន្តឹងវិធានការឡើងវិញ ដោយបានអនុវត្តកាតព្វកិច្ចធ្វើចត្តាឡីស័ក។ ក៏ប៉ុន្តែ ផ្អែកតាមតួលេខផ្លូវការ រយៈពេលជិត១ខែមកនេះ អាជ្ញាធរសុខាភិបាលថៃ សង្កេងឃើញថាស្ថានការណ៍មានភាពវិជ្ជមាន ដោយចំនួនឆ្លងរាលដាល និងករណីស្លាប់ដោយសារកូវីដ បាននៅនឹងមិនប្រែប្រួលច្រើន។ ប្រការនេះ បានជំរុញឲ្យរដ្ឋាភិបាលថៃសម្រេច បន្ធូរបន្ថយវិធានការវិញ ដោយដកចេញនូវកាតព្វកិច្ចធ្វើចត្តាឡីស័ក។
គួរបញ្ជាក់ដែរថា វិស័យទេសចរណ៍ថៃ បានរងផលប៉ះពាល់ខ្លាំងណាស់។ មុនមានកូវីដ នៅឆ្នាំ២០១៩ មានទេសចរណ៍បរទេសប្រមាណ៤០លាននាក់ បានទៅលេខកម្សាន្តនៅថៃ។ សម្រាប់ឆ្នាំ២០២២នេះ ក្រសួងទេសចរណ៍ថៃ បានអះអាងថា គេរំពឹងថានឹងអាចទទួលទេសចរណ៍ ចំនួនប្រមាណ៥លាននាក់ តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ