នាយករដ្ឋមន្ត្រីថៃធ្វើទស្សនកិច្ចជាលើកដំបូងទៅអារ៉ាប៊ីសាអូឌីតក្នុងរយៈពេល៣០ឆ្នាំកន្លងមកនេះ
នាយករដ្ឋមន្ត្រីថៃលោក ប្រាយុទ្ធ ចាន់អូចា នឹងបំពេញទស្សនកិច្ចដ៏កម្រទៅកាន់ប្រទេសអារ៉ាប៊ីសាអូឌីតនាថ្ងៃអង្គារ ទី២៥ មករា ឆ្នាំ២០២២។ នេះរាប់ចាត់ទុកថាជាករណីដ៏កម្រក៏ព្រោះតែវាជាទស្សនកិច្ចលើកដំបូងរបស់មេដឹកនាំថៃទៅកាន់ប្រទេសអារ៉ាប់មួយនេះ ក្រោយប្រទេសទាំងពីរមានជម្លោះការទូតនឹងគ្នាជាង ៣ទសវត្សរ៍ជុំវិញករណីលួចគ្រឿងអលង្ការនិងត្បូងមានតម្លៃពីវាំងអារ៉ាប៊ីសាអូឌីត។
ចុះផ្សាយនៅថ្ងៃ៖
ស្តាប់ - ០២:១៦
តាមរយៈសេចក្តីថ្លែងការណ៍មួយ ក្រសួងការបរទេសអារ៉ាប៊ីសាអូឌីតនិយាយថានាយករដ្ឋមន្ត្រីថៃលោក ប្រាយុទ្ធ ចាន់អូចា នឹងចាប់ផ្តើមដំណើរទស្សនកិច្ចរយៈពេលពីរថ្ងៃទៅកាន់ប្រទេសអារ៉ាប៊ីសាអូឌីតនៅថ្ងៃអង្គារស្អែកតបតាមការអញ្ជើញរបស់រាជទាយាទម៉ូហាមេដ បេនសាលម៉ាន។
ជំនួបរវាងលោក ប្រាយុទ្ធ ជាមួយព្រះអង្គម្ចាស់អារ៉ាប៊ីសាអូឌីតនឹងក្លាយជាកិច្ចប្រជុំជាន់ខ្ពស់លើកដំបូងរវាងប្រទេសទាំងពីរក្នុងរយៈពេលជាង ៣០ឆ្នាំមកនេះ។ បើតាមការបញ្ជាក់របស់រដ្ឋាភិបាលថៃ ការពង្រឹងនិងលើកកម្ពស់ទំនាក់ទំនងទ្វេភាគីគឺជារបៀបវីរៈសំខាន់នៃជំនួបខាងលើ។
គួររំឭកថា ភាពតានតឹងផ្នែកកាទូតរវាងទីក្រុងរីយ៉ាដនិងក្រុងបាងកកបានចាប់ផ្ទុះឡើងក្នុងឆ្នាំ ១៩៨៩ បន្ទាប់ពីបុរសជនជាតិថៃម្នាក់ដែលធ្វើការនៅក្នុងវាំងអារ៉ាប៊ីសាអូឌីតបានលួចគ្រឿងអលង្ការ និងត្បូងមានតម្លៃរហូតដល់ប្រមាណ ២០លានដុល្លាររបស់ព្រះអង្គម្ចាស់អារ៉ាប៊ីសាអូឌីត Faisal ដែលជាម្ចាស់។ ជម្លោះការទូតដ៏ល្បីរន្ទឺរវាងប្រទេសទាំងពីរត្រូវគេស្គាល់ឈ្មោះថាសំណុំរឿងពេជ្រពណ៌ខៀវ ឬហៅជាភាសាអង់គ្លេសថា "Blue Diamond Affair"។
មកទល់នឹងពេលនេះ ត្បូងមានតម្លៃមួយចំនួនធំរួមទាំងត្បូងពេជ្រពណ៌ខៀវដ៏កម្រទំហំ ៥០ការ៉ាត់នៅមិនទាន់ត្រូវបានរកឃើញនៅឡើយទេ។ ប៉ូលិសថៃធ្លាប់បានប្រគល់គ្រឿងអលង្ការមួយចំនួនទៅឲ្យអារ៉ាប៊ីសាអូឌីតដែរ ប៉ុន្តែមន្ត្រីក្រុងរីយ៉ាដបានអះអាងថាភាគច្រើននៃគ្រឿងអលង្ការទាំងនោះគឺជារបស់ក្លែងក្លាយ។
ជាយូរមកហើយ អារ៉ាប៊ីសាអូឌីតបានចោទប្រកាន់ប៉ូលិសថៃថាបានរារាំងការស៊ើបអង្កេតរបស់ពួកគេទាក់ទិនករណីនេះ និងបានចោទប្រកាន់មន្រ្តីជាន់ខ្ពស់ថៃថាបានទិញក្នុងក្នុងតម្លៃទាបឬក៏ប្រមូលយកនូវត្បូងដែលត្រូវបានលួចយកទៅ។ បុរសជនជាតិថៃឈ្មោះ Kriangkrai បានជាប់ពន្ធនាគាររយៈពេលប្រាំឆ្នាំ ពីបទលួចគ្រឿងអលង្ការនិងលក់ត្បូងមានតម្លៃមួយចំនួនរបស់អារ៉ាប៊ីសាអូឌីត។ បន្ទាប់មកបុរសថៃរូបនេះបានបួសជាព្រះសង្ឃនៅឆ្នាំ២០១៦ ក្នុងបំណងលាងជម្រះកម្មផលអាក្រក់ដែលបានសាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ