ថៃនិងអារ៉ាប៊ីសាអូឌីត ភ្ជាប់ទំនាក់ទំនងទូតនឹងគ្នាឡើងវិញ ក្រោយ៣០ឆ្នាំនៃរឿងរ៉ាវ « ពេជ្រខៀវ »
ប្រទេសថៃ និង អារ៉ាប៊ីសាអូឌីត បានសន្យាភ្ជាប់ទំនាក់ទំនងការទូតនឹងគ្នាឡើងវិញ នៅក្នុងឱកាសដែលលោកនាយករដ្ឋមន្ត្រីថៃ ប្រាយុទ្ធ ចាន់អូចា ទៅបំពេញទស្សនកិច្ចជាលើកទី១ នៅទីក្រុងរីយ៉ាត។ នេះគឺជាការភ្ជាប់ទំនាក់ទំនងឡើងវិញ បន្ទាប់ពីប្រទេសទាំង២ បានផ្តាច់ចំណងទូតនឹងគ្នា អស់រយៈពេល៣០ឆ្នាំមកហើយ ក្រោយពីមានរឿងរ៉ាវ លួចពេជ្រនិងត្បូងមានតម្លៃកាលពីឆ្នាំ១៩៨៩ នៅក្នុងដំណាក់គ្រួសារស្តេចអារ៉ាប៊ីសាអូឌីត ដោយជនជាតិថ្ងៃម្នាក់។
ចុះផ្សាយនៅថ្ងៃ៖
ស្តាប់ - ០៣:០២
យោងតាមលិខិតប្រកាសរួមគ្នា នៅក្រោយការជួបគ្នា រវាងលោកប្រាយុទ្ធ ចាន់អូចា និង ព្រះអង្គម្ចាស់ម៉ូហាម៉េដ បេនសាល់ម៉ាន់ នៅថ្ងៃទី២៥មករា រដ្ឋាភិបាលថៃ និង អារ៉ាប៊ីសាអូឌីត បានប្រកាសចាប់ផ្តើមបង្កើតទំនាក់ទំនងការទូត ពេញលេញនឹងគ្នាឡើងវិញ។ ប្រទេសទាំង២នឹងតែងតាំងឯកអគ្គរាជទូតរៀងៗខ្លួន ក្នុងពេលឆាប់ៗនេះ ព្រមទាំងរៀបចំយន្តការ ដើម្បីពង្រឹងចំណងសហប្រតិបត្តិការទ្វេភាគី ឲ្យបានរឹងមាំជាដរាប។
លិខិតដដែលបានសង្កត់ធ្ងន់ថា ការបោះជំហានទៅមុខដ៏ខ្លាំងក្លានេះ គឺជាលទ្ធផលនៃកិច្ចប្រឹងប្រែង ជាយូរយាមកហើយ នៅគ្រប់ជាន់ថ្នាក់ ដើម្បីស្តារពង្រឹកទំនុកចិត្តគ្នា ព្រមទាំងទំនាក់ទំនងមិត្តភាពនឹងគ្នាឡើងវិញ រវាងព្រះរាជាណាចក្រទាំង២។ នៅក្នុងឱកាសនៃការភ្ជាប់ទំនាក់ទំនងគ្នាឡើងវិញនេះ ក្រុមហ៊ុនអាកាសចរណ៍ Saudi Airlines បានប្រកាសថា គេនឹងចាប់ផ្តើមដំណើរការជើងហោះហើរទៅកាន់ប្រទេសថៃឡើងវិញ ចាប់ពីខែក្រោយទៅ។
យោងតាមអ្នកនាំពាក្យរដ្ឋាភិបាលថៃ គឺភាគីអារ៉ាប៊ីសាអូឌីត បានលើកឡើងអំពីតម្រូវការ កម្លាំងពលកម្មការងារចំនួនយ៉ាងហោច៨លាននាក់ មានជាអាទិ៍ ក្នុងវិស័យសណ្ឋាគារ វិស័យសុខាភិបាល និងក្នុងគម្រោងសំណង់ផ្សេងៗផងដែរ។ លោកប្រាយុទ្ធ ចាន់អូចា បានឆ្លើយតបថាថៃ អាចបំពេញតម្រូវការនេះមួយផ្នែក ជូនអារ៉ាប៊ីសាអូឌីត។
គួររំលឹកថា ថៃនិងអារ៉ាប៊ីសាអូឌីត បានជួបបញ្ហារកាំរកូសនឹងគ្នា កាលពីឆ្នាំ១៩៨៩ បន្ទាប់ពីបុរសជនជាតិថៃម្នាក់ ដែលជាបុគ្គលិកបម្រើការងារនៅក្នុងដំណាក់មួយ នៃគ្រួសារស្តេចអារ៉ាប៊ីសាអូឌីត បានលួចគ្រឿងអល្លង្ការ ត្បូងមានតម្លៃជាច្រើន គិតជាប្រាក់សរុបប្រមាណ២០លានដុល្លារ។ ក្នុងចំណោមត្បូងមានតម្លៃ គឺមានគ្រាប់ពេជ្រមួយគ្រាប់ដ៏កម្រ មានពណ៌ខៀវ ទំហំ៥០ការ៉ាត។ អាជ្ញាធរអារ៉ាប៊ីសាអូឌីត បានចោទសមត្ថកិច្ចនគរបាលថៃ ថាបានរឹបអូសយកត្បូងមានតម្លៃទាំងនោះ ពីជនដៃដល់ និងបានរារាំងការស៊ើបអង្កេត។
បើទោះជាសមត្ថកិច្ចថៃ បានប្រគល់ត្បូងមានតម្លៃមួយចំនួនត្រលប់មកវិញ តែភាគីអារ៉ាប៊ីសាអូឌីត អះអាងថា ភាគច្រើនគឺជាត្បូងក្លែងក្លាយ។ ចាប់តាំងពីពេលនោះមក អារ៉ាប៊ីសាអូឌីត មិនបានតែងតាំងអគ្គរាជទូតទៅកាន់ប្រទេសថៃទេ។ នៅឆ្នាំ១៩៩០ អារ៉ាប៊ីសាអូឌីត បានបញ្ជូនអ្នកជំនួញម្នាក់ ឲ្យទៅស៊ើបអង្កេតដោយសម្ងាត់ តែមនុស្សនោះត្រូវបានគេសម្លាប់នៅប្រទេសថៃ រួមជាមួយនឹងមន្ត្រីទូតអារ៉ាប៊ីសាអូឌីត៣នាក់ទៀត។ កាលពីឆ្នាំ២០១៤ សមត្ថកិច្ចថៃបានឈានទៅចោទប្រកាន់មនុស្ស៥នាក់ ក្នុងនោះមានមន្ត្រីតម្រួតថៃបុណ្យសក្តិ៍ធំម្នាក់ផង ទាក់ទិននឹងករណីឃាតកម្មនេះ។ តែក្រោយមកការចោទប្រកាន់ត្រូវបានបោះបង់ចោលវិញ ដោយសារតែគ្មានភស្តុតាងគ្រប់គ្រាន់។
យោងតាមអ្នកនាំពាក្យរដ្ឋាភិបាលថៃ នៅក្នុងពេលជួបជាមួយព្រះអង្គម្ចាស់បេនសាល់ម៉ាន់ កាលពីថ្ងៃអង្គារទី២៥មករា លោកប្រាយុទ្ធ ចាន់អូចា បានសម្តែងការសោកស្តាយចំពោះរឿងរ៉ាវដែលបានកើតឡើងរវាងពីឆ្នាំ៨៩-៩០ ហើយលោកបានសន្យាថា នឹងបើកការស៊ើបអង្កេតឡើងវិញ ប្រសិនបើមានតម្រុយ ឬភស្តុតាងថ្មីណាមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ