ភូមា៖ ការវាយឆ្នាំងវាយប៉ោត ឬចុចស៊ីប្លេបន្លឺសំឡេងប្រឆាំងរដ្ឋាភិបាល អាចត្រូវជាប់ទោសក្បត់ជាតិ
ជិតមួយឆ្នាំ ក្រោយការធ្វើរដ្ឋប្រហារក្តោបក្តាប់អំណាច របស់ក្រុមកងទ័ពភូមា របបសិកនេះ ហាក់កំពុងតែពង្រឹងការកៀបសង្កត់ខ្លាំងឡើង ទៅលើការតវ៉ាប្រឆាំងនានា របស់ប្រជាពលរដ្ឋភូមា។ ចាប់ពីពេលនេះទៅ អ្នកដែលវាយឆ្នាំង វាយធុង ឬចុចស៊ីប្លេបន្លឺសំឡេង និងអ្នកដែលធ្វើកូដកម្មដោយស្ងៀមស្ងាត់ ដើម្បីប្រឆាំងនឹងរបបសិក គឺនឹងអាចជាប់ចោទពីបទ « ក្បត់ជាតិ »។
ចុះផ្សាយនៅថ្ងៃ៖
ស្តាប់ - ០២:៤២
នៅក្នុងលិខិតប្រកាសមួយ របបសិកភូមា បានសរសេរថា « រដ្ឋាភិបាលបង្រួបបង្រួមជាតិ ដែលជារដ្ឋាភិបាលក្លែងក្លាយ បង្កើតឡើងដោយក្រុមអតីតមនុស្សរបស់លោកស្រីអ៊ុងសាន ស៊ូជី បានឃុបឃិតជាមួយក្រុមជនជាតិភាគតិច ដើម្បីញុះញង់ ជំរុញឲ្យប្រជាជនភូមា បំផ្លាញស្ថិរភាពជាតិ។ ជាសកម្មភាពបំផ្លាញដែលត្រូវបានធ្វើតាមរយៈការចូលរួមធ្វើកូដកម្មដោយស្ងាត់ស្ងៀម ការទះដៃ ឬការវាយឆ្នាំង វាយប៉ោត និងការចុចស៊ីប្លេបន្លឺសំឡេងកងរំពងជាដើម »។
លិខិតប្រកាសនេះ បានបន្ថែមថា « ចាប់ពីពេលនេះទៅ មនុស្សដែលធ្វើសកម្មភាពទាំងអស់នេះ អាចប្រឈមនឹងបទចោទប្រកាន់ បង្កអសន្តិសុខសង្គម រំខានសណ្តាប់ធ្លាប់សាធារណៈ ឬអាចជាប់ចោទ ពីបទក្បត់ជាតិថែមទៀតផង »។
គួរបញ្ជាក់ថា អំពើក្បត់ជាតិ នៅភូមា គឺអាចត្រូវជាប់ទោសប្រហារជីវិត។ វិធានការចោទប្រកាន់ដ៏ធ្ងន់ធ្ងរ ទៅលើប្រជាពលរដ្ឋ ដែលចូលរួមសកម្មភាពផ្សេងៗ ដើម្បីបង្ហាញការប្រឆាំងតវ៉ា គឺមានទម្រង់ជាការបំភ័យសំឡុត មួយកម្រិតទៀតពីសំណាក់របបសិកភូមា។ ប្រមាណជិតមួយឆ្នាំក្រោយការធ្វើរដ្ឋប្រហារប្លន់អំណាច សកម្មភាពតវ៉ារបស់ប្រជាពលរដ្ឋភូមា នៅតែមាន បើទោះបីជាមិនត្រូវបានធ្វើក្រោមរូបភាពបាតុកម្មដង្ហែរក្បួនធំដុំក្តី។
ជានិច្ចជាកាល ប្រជាពលរដ្ឋភូមា តែងណាត់គ្នា វាយឆ្នាំង វាយប៉ោត ចុចស៊ីប្លេបន្លឺសំឡេង ដើម្បីបង្ហាញការប្រឆាំងតវ៉ា។ ការបន្លឺសំឡេងកងរំពង គឺជាជំនឿប្រពៃណី ដែលប្រជាជនភូមាតែងតែធ្វើ ដើម្បីបណ្តេញខ្មោចព្រាយ ឧបទ្រពចង្រៃ ចេញពីភូមិស្រុក។ ក្រៅពីការណាត់គ្នាបន្លឺសំឡេងនេះ ប្រជាជនភូមាខ្លះ ក៏បានចូលរួមធ្វើកូដកម្ម ដោយស្ងាត់ស្ងៀម មិនចូលធ្វើការ ជាក់ស្តែងកាលពីថ្ងៃទី ១០ធ្នូកន្លងទៅ ក្នុងឱកាសទិវាសិទ្ធិមនុស្សអន្តរជាតិ។
គួរកត់សំគាល់ថា ប្រមាណជិតមួយឆ្នាំមកនេះ របបសិកភូមា បានពង្រឹងអំណាចកាន់តែខ្លាំង បើទោះបីជាមានប្រជាពលរដ្ឋ នឹងក្រុមជនជាតិភាគតិចប្រដាប់អាវុធជាច្រើនក្រុម បានប្រកាសរួមកម្លាំងគ្នាប្រយុទ្ធ។ យោងតាមអង្គការសិទ្ធិមនុស្ស មនុស្សប្រមាណ១៥០០នាក់ ត្រូវបានកងទ័ពភូមាសម្លាប់ និងយ៉ាងហោច១១០០០នាក់ ត្រូវជាប់ឃុំ។
ដោយសង្កេតឃើញអំពើរំលោភសិទ្ធិមនុស្សធ្ងន់ធ្ងរទាំងនេះ ក្រុមហ៊ុន TotalEnergies និងក្រុមហ៊ុន Chevron បានសម្រេចដកខ្លួនចេញ ឈប់ធ្វើអាជីវកម្មហ្កាសនៅភូមាតទៅទៀត។ លោក John Sifton តំណាងប្រចាំអាស៊ីនៃអង្គការ Human Rights Watch បានអំពាវនាវឲ្យសហគមន៍អន្តរជាតិ ត្រូវតែរួមគ្នា វាយឲ្យចំកញ្ចប់ប្រាក់ របស់របបសិកភូមា ដែលមួយផ្នែកធំបានមកពីអាជីវកម្មឧស្ម័នហ្កាសធម្មជាតិ។ លោកបានហៅឲ្យក្រុមហ៊ុនថៃ PTT និងក្រុមហ៊ុនកូរ៉េខាងត្បូង POSCO ដែលនៅតែបន្តរកស៊ីនៅភូមា ត្រូវតែបញ្ឈប់អាជីវកម្មជាបន្ទាន់ ដើម្បីដាក់សំពាធលើរបបសិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ