បន្ទាប់ពីតូតាល់ ក្រុមហ៊ុនថាមពលអូស្តា្រលីប្រកាសដកខ្លួនចេញពីភូមា
ក្រោយរដ្ឋប្រហារយោធាថ្ងៃទី ១កុម្ភៈ២០២១ ទម្លាក់រដ្ឋាភិបាលស៊ីវិលរបស់លោកស្រីអ៊ុងសានស៊ូជីមក ក្រុមហ៊ុនអន្តរជាតិធំៗជាច្រើនបានសម្រេចចិត្តចាកចេញពីភូមា។ បន្ទាប់ពីក្រុមហ៊ុនតូតាល់បារាំង នៅថ្ងៃព្រហស្បតិ៍ទី ២៧មករា ២០២២ ក្រុមហ៊ុនប្រេងដ៏ធំជាងគេរបស់អូស្ត្រាលី Woodside បានប្រកាស ដកខ្លួនចេញពីប្រទេសភូមាដែរ។
ចុះផ្សាយនៅថ្ងៃ៖
ស្តាប់ - ០២:១២
ជាក្រុមហ៊ុនថាមពលមួយក្នុងចំណោមក្រុមហ៊ុនផលិតឧស្ម័នហ្កាសធម្មជាតិ ដ៏ធំជាងគេបំផុតនៅលើពិភពលោក ក្រុមហ៊ុន Woodside ដែលបានចូលមកធ្វើផលិតកម្មនិងរុករកឧស្ម័ន នៅប្រទេសភូមា ក្នុងទីតាំងជាច្រើន តាំងពី៩មកឆ្នាំមកហើយ បានប្រកាសនៅថ្ងៃនេះ បញ្ចប់សកម្មភាពរកស៊ីនៅក្នុងប្រទេសភូមា ដោយពន្យល់ថា ស្ថានភាពសិទ្ធិមនុស្សនៅភូមាធ្លាក់ដុនដាបខ្លាំង។ សម្រេចដកខ្លួនចេញពីប្រទេសនេះ បានធ្វើឱ្យក្រុមហ៊ុនខាតប្រយោជន៍អស់យ៉ាងហោច២០០លានដុល្លារ។ ប៉ុន្តែស្ថានភាពនៅភូមានាពេលបច្ចុប្បន្ន មិនអនុញ្ញាតឱ្យ Woodside បន្តសកម្មភាពរុករកឧស្ម័ននៅក្នុងតំបន់ A-6 ដែលជាគម្រោងអភិវឌ្ឍន៍រួមជាមួយក្រុមហ៊ុនតូតាល់បារាំងបានទេ ហើយក្រុមហ៊ុនក៏មិនអាចបន្តសកម្មភាពនៅកន្លែងផ្សេងក្នុងផ្ទៃប្រទេសភូមាបានដែរ។ នេះបើតាមលោកអគ្គនាយកប្រតិបត្តិរងរបស់ក្រុមហ៊ុនលោក Meg O'Neill ។
ក្រុមហ៊ុនបានសម្រេចដកខ្លួនចេញពីភូមា តែមួយសប្តាហ៍ក្រោយការចាកចេញរបស់ក្រុមហ៊ុនជាដៃគូ តូតាល់របស់បារាំង និងក្រុមហ៊ុន Chevron របស់អាមេរិក ក្រោមហេតុផលតែ មួយគឺស្ថានភាពសិទ្ធិមនុស្សភូមាបានធ្លាក់អាក្រក់ខ្លាំងតាំងពីមានរដ្ឋប្រហារមក។ ក្រោយរដ្ឋប្រហារ មេដឹកនាំយោធាបានបង្ក្រាបចលនាបាតុកម្ម យ៉ាងហិង្សាបង្កឱ្យស្លាប់ជនស៊ីវិលជាង១៥០០នាក់ និងមានទម្រង់ជាសង្គ្រាមស៊ីវិល។
ជាមួយនឹងការអបអរសេចក្តីសម្រេចរបស់ក្រុមហ៊ុន នាយកអង្គការការពារសិទ្ធិមនុស្ស Human Rights Watch អូស្ត្រាលី បានគូសបញ្ជាក់អំពីភាពបន្ទាន់នៃការសម្របសម្រួលគ្នាដាក់ទណ្ឌកម្ម ឱ្យចំលើវិស័យថាមពលហ្កាសដែលជាប្រភពចំណូលរបស់រដ្ឋាភិបាលសឹកភូមា។ឧស្សាហកម្មឧស្ម័នធម្មជាតិនាំចំណូលឱ្យភូមាប្រមាណ១ពាន់លានដុល្លារក្នុងមួយឆ្នាំៗ។ ដូច្នេះការចាកចេញរបស់ក្រុមហ៊ុនអន្តរជាតិនឹងធ្វើឱ្យរដ្ឋាភិបាលសឹកបាត់បង់ចំណូលអស់ច្រើន ក្នុងខណៈដែលសេដ្ឋកិច្ចជាតិកំពុងរងសម្ពាធ និងទណ្ឌកម្មជុំទិសផង។
ជាងនេះទៅទៀត នៅថ្ងៃពុធម្សិលមិញ សហរដ្ឋអាមេរិកបានជំរុញឱ្យក្រុមហ៊ុនអាមេរិកដែលបន្តរកស៊ីនៅភូមា ប្រុងប្រយ័ត្នខ្ពស់ និងចៀសកុំរកស៊ីពាក់ព័ន្ធជាមួយក្រុមហ៊ុនរដ្ឋភូមា បើមិនចង់មានហានិភ័យហិរញ្ញវត្ថុ និងច្បាប់ ថារំលោភទណ្ឌកម្មឬជាប់ពាក់ព័ន្ធនឹងការលាងលុយកខ្វក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ