នៅទីបំផុត ក្រុមហ៊ុនតូតាល់បានសម្រេចដកខ្លួនចេញពីភូមា
ប្រឈមនឹងការផ្ទុះអាវុធកាន់តែហិង្សា នៅក្នុងភូមា ក្រុមហ៊ុនប្រេងបារាំង តូតាល់បានសម្រេចចិត្តដកខ្លួនចេញពីភូមា។ នៅក្នុងសេចក្តីប្រកាសព័ត៌មាន ចុះផ្សាយនៅថ្ងៃសុក្រទី ២១ មករា ក្រុមហ៊ុនតូតាល់បានបញ្ជាក់ថា ស្ថានភាពកាន់តែធ្លាក់ចុះដុនដាបនៅភូមា ជាពិសេស នៅក្នុងផ្នែកសិទ្ធិមនុស្ស និងនិតិរដ្ឋ លែងអនុញ្ញាតឲ្យក្រុមហ៊ុននាំយកចំនុចវិជ្ជមាន សម្រាប់ប្រទេសភូមា។ ការដកខ្លួនរបស់ក្រុមហ៊ុនតូតាល់ ពីប្រទេសភូមា ជាចំណុចទាមទារជាយូរមកហើយ របស់អង្គការការពារសិទ្ធិមនុស្ស និងក្រុមប្រឆាំងភូមា ដែលបានចោទប្រកាន់ របបសឹកថា បានបង្រ្កាបហិង្សាទៅលើបាតុករ ដែលប្រឆាំង នឹងការធ្វើរដ្ឋប្រហារយោធា នៅភូមា។
ចុះផ្សាយនៅថ្ងៃ៖
ស្តាប់ - ០២:១៤
Total Energies ក្រុមហ៊ុនប្រេងដ៏ធំជាងគេរបស់បារាំង បានសម្រេចដកខ្លួនចេញពីភូមា ជាទីដែលក្រុមហ៊ុនដើរតួនាទីជាដៃគូ និងជាអ្នកចាត់ចែងលើអណ្តូងឧស្ម័ននៅយាដាណា។ នៅក្នុងសេចក្តីប្រកាសព័ត៌មាន នៅថ្ងៃសុក្រ ក្រុមហ៊ុនតូតាល់របស់បារាំង បានពន្យល់ការសម្រេចចិត្ត របស់ខ្លួនថា មានជាប់ទាក់ទងនឹងស្ថានការណ៍កាន់តែធ្លាក់ចុះអាក្រក់ ចាប់តាំងពីមានរដ្ឋប្រហារយោធានៅភូមា ដូចជានៅក្នុងផ្នែកសិទ្ធិមនុស្ស និងនិតិរដ្ឋ។
តាម ក្រុមហ៊ុនតូតាល់ ក្រុមហ៊ុនបានចាប់ផ្តើម និតិវិធីដកខ្លួនស្របច្បាប់ ដើម្បីជៀសវាងការបង់ប្រាក់ពិន័យ។ ជារួម ដំណើរការដកខ្លួនរបស់ក្រុមហ៊ុនតូតាល់ ចេញពីភូមា ផ្តោតទៅលើកិច្ចសន្យាវិនិយោគពីរ គឺ អាជីវកម្មបូមឧស្ម័ននៅយាដាណា និងក្រុមហ៊ុនដឹកជញ្ជូន MGTC នៅភូមា។ សម្រាប់ការវិនិយោគលើអាជីវកម្មបូមឧស្ម័ន ក្រុមហ៊ុនតូតាល់អះអាងថា នឹងលក់ភាគហ៊ុនរបស់ខ្លួនទាំងអស់ទៅឲ្យដៃគូ ដែលនៅក្នុងនោះ មានក្រុមហ៊ុនប្រេងអាមេរិក Unocal Chevron ក្រុមហ៊ុនប្រេងថៃ PTTEPនិងក្រុមហ៊ុនប្រេងជាតិភូមា MOGE។ នៅប៉ុន្មានម៉ោងក្រោយក្រុមហ៊ុនបារាំងប្រកាសដកខ្លួន ចេញពីភូមា ក្រុមហ៊ុនប្រេងអាមេរិកាំងដែលជាដៃគូវិនិយោគធំទី២សម្រាប់គម្រោងយាដាណា បានប្រកាសថា នឹងចាត់វិធានការដូចក្រុមហ៊ុនតូតាល់ដែរ។
តាមក្រុមហ៊ុនតូតាល់ គេកំពុងចរចាជាមួយក្រុមហ៊ុនប្រេងថៃ PTTEP ដើម្បីបន្តវេនពីក្រុមហ៊ុនតូតាល់ នៅអាជីវកម្មឧស្ម័ន យាដាណា។ ការដកខ្លួនរបស់ក្រុមហ៊ុនបរទេស ដូចជាក្រុមហ៊ុនប្រេងតូតាល់ ដែលជាដៃគូវិនិយោគដ៏សំខាន់របស់យោធាភូមា គឺជាការទាមទារកន្លងមករបស់អង្គការការពារសិទ្ធិមនុស្ស និងចលនាប្រឆាំង រដ្ឋប្រហារនៅភូមា។
នៅថ្ងៃសុក្រ អង្គការការពារសិទ្ធិមនុស្សHuman Rights Watch បានថ្លែងស្វាគមការសម្រេចចិត្តរបស់ក្រុមហ៊ុនប្រេងតូតាល់។ កាលពីថ្ងៃព្រហស្បតិ៍ អង្គការមួយនេះ បានអំពាវនាវឲ្យ រដ្ឋាភិបាលអាមេរិក ក៏ដូចជាសហភាពអឺរ៉ុបដាក់ ទណ្ឌកម្មសេដ្ឋកិច្ច ដោយផ្តោតសំដៅតែ ក្រុមហ៊ុន និងវិស័យទាំងឡាយណា ដែលជាឆ្នាំងបាយរបស់ក្រុមមន្រ្តីយោធាជាន់ខ្ពស់ ភូមា ដែលក្រុមអ្នកប្រឆាំងបានចោទប្រកាន់ថា ជាអ្នកចូលរួមធ្វើរដ្ឋប្រហារ រហូតធ្វើឲ្យភូមា ធ្លាក់ក្នុងស្ថានភាពអសន្តិសុខ និងសង្រ្គាមស៊ីវិល នាពេលសព្វថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ