របាយការណ៍ អ.ស.ប៖ ២០២១ កូរ៉េខាងជើងបន្តអភិវឌ្ឍន៍សព្វាវុធនុយក្លេអ៊ែរ និងបាលីស្ទីក ដោយមិនខ្វល់ពីទណ្ឌកម្ម
ក្នុងឆ្នាំ២០២១កន្លងទៅ របបផ្តាច់ការកូរ៉េខាងជើង នៅតែបន្តអភិវឌ្ឍន៍កម្មវិធីផលិតសព្វាវុធនុយក្លេអ៊ែរ និងមីស៊ីលបាលីស្ទីកដដែល បើទោះបីជាប្រទេសនេះ បានរងនូវទណ្ឌកម្មអន្តរជាតិក៏ដោយ។ នេះគឺជាការសន្និដ្ឋានរបស់ក្រុមងារជំនាញ នៃអង្គការសហប្រជាជាតិ ដែលទទួលបន្ទុកតាមដានការគោពរទណ្ឌកម្ម ដាក់ទៅលើកូរ៉េខាងជើង។ នៅថ្ងៃចន្ទទី៧កុម្ភៈ ក្រុមប្រឹក្សាសន្តិសុខនឹងបើកការប្រជុំមួយ ក្រោមការស្នើសុំពីរុស្ស៊ី ដើម្បីជជែកគ្នាអំពីគោលនយោបាយដាក់ទណ្ឌកម្មលើកូរ៉េខាងជើង ដែលមិនបានជះផលជាវិជ្ជមាន។
ចុះផ្សាយនៅថ្ងៃ៖
ស្តាប់ - ០២:០៩
យោងតាមរបាយការណ៍បូកសរុប ប្រចាំឆ្នាំ២០២១ នៃក្រុមការងារតាមដានការគោរពទណ្ឌកម្មនៃអង្គការសហប្រជាជាតិ បានឲ្យដឹងថាប្រភពចំណូលដ៏សំខាន់មួយរបស់កូរ៉េខាងជើង គឺការវាយប្រហារតាមប្រព័ន្ធបច្ចេកវិទ្យាអ៊ីនធ័រនិត ជាពិសេសទៅលើបណ្តាញលុយឌីជីថល។ ក្នុងឆ្នាំ២០២១ ការនាំចូលប្រេងឥន្ធនៈដោយខុសច្បាប់ ចូលទៅកូរ៉េខាងជើង បានកើនឡើងជាលំដាប់ បើទោះបីមានចំនួនទាបជាងឆ្នាំ២០២០ក៏ដោយ។
របាយការណ៍ដែលទើបតែត្រូវបានប្រគល់ ទៅឲ្យប្រទេសទាំង១៥នៃក្រុមប្រឹក្សាសន្តិសុខពិនិត្យនេះ បានលើកឡើងថាឆ្នាំកន្លងទៅនេះ កូរ៉េខាងបានបន្តការអភិវឌ្ឍន៍កម្មវិធីផលិតអាវុធនុយក្លេអ៊ែរ និងមីស៊ីលបាលីស្ទីក បើទោះបីជាជាប់ទណ្ឌកម្មអន្តរជាតិក៏ដោយ។ ក្រុមអ្នកជំនាញបានអះអាងថា របបផ្តាច់ការកូរ៉េខាងជើង បានប្រឹងប្រែងពង្រឹងសមត្ថភាពកាន់តែខ្លាំង តួយ៉ាងក្នុងការពង្រាយ ប្រើប្រាស់សព្វាវុធយ៉ាងរហ័ស ក្នុងទ្រង់ទ្រាយធំ ទាំងលើគោក និងលើទឹក។ បន្ថែមពីនេះទៀត កូរ៉េខាងជើងបន្តអភិវឌ្ឍន៍ ហេដ្ឋារចនាសម្ព័ន្ធនុយក្លេអ៊ែរ និងមីស៊ីលបាលីស្ទីក ព្រមទាំងបន្តស្រាវជ្រាវលើសម្ភាៈ បច្ចេកវិទ្យា និងជំនាញផលិតអាវុធទាំងនេះ ជាមួយប្រទេសផ្សេងថែមទៀតផង។
គួររំលឹកថា កូរ៉េខាងជើង បានជាប់ទណ្ឌកម្មអន្តរជាតិ តាំងតែពីឆ្នាំ២០០៦មកម្លេះ។ ទណ្ឌកម្មដែលបានកើនឡើងខ្លាំង នៅឆ្នាំ២០១៧ ក្នុងអាណត្តិលោកដូណាល់ ត្រាំ។ អង្គការសហប្រជាជាតិ បានកំណត់ទណ្ឌកម្ម មួយចំនួនទៅលើរបបផ្តាច់ការនេះ មានជាអាទិ៍ ហាមឃាត់ការនាំចូលប្រេងឥន្ធនៈ ធ្យូងថ្ម ដែកថែប សំលៀកបំពាក់ និងផលនេសាទជាដើម។
គិតពីឆ្នាំ២០១៧មក ក្រុមប្រឹក្សាសន្តិសុខមិនដែលត្រូវរ៉ូវគ្នា សម្រេចអ្វីមួយទាក់ទិននឹងកូរ៉េខាងជើងទេ។ សម្រាប់ ចិន និងរុស្ស៊ី ទណ្ឌកម្មសេដ្ឋកិច្ចវាគឺជាវិធានាការដែលគ្មានប្រយោជន៍ ហើយធ្វើបាបតែប្រជាជនកូរ៉េខាងជើងតែប៉ុណ្ណោះ។ តែយ៉ាងណា ក្រុមប្រទេសលោកខាងលិច មិនយល់ស្របនឹងគំនិតនេះឡើយ។ នៅថ្ងៃចន្ទទី៧កុម្ភៈនេះ រុស្ស៊ីបានស្នើឲ្យមានការជជែកគ្នាមួយ ក្នុងក្របខណ្ឌក្រុមប្រឹក្សាសន្តិសុខ ស្តីពីផលអវិជ្ជមាននៃគោលនយោបាយដាក់ទណ្ឌកម្មលើកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ