មេបញ្ជាការអាមេរិកបារម្ភថាចិន អាចរករឿងនៅអាស៊ីប៉ាស៊ីហ្វិក ខណៈបស្ចឹមលោកជាប់រវល់ជាមួយរុស្ស៊ី
មេបញ្ជាការកងទ័ពអាកាសអាមេរិកម្នាក់ បានលើកឡើងថា ក្នុងពេលដែលក្រុមប្រទេសលោកខាងលិច រវល់ជាប់ដៃដោះស្រាយបញ្ហារុស្ស៊ី គឺចិនអាចនឹងឆក់ឱកាស ធ្វើសកម្មភាពអ្វីម្យ៉ាងដើម្បីបង្កបញ្ហា នៅតំបន់អាស៊ីប៉ាស៊ីហ្វិក។ នេះ គឺជាការព្រួយបារម្ភ ដែលអាមេរិក រួមជាមួយសម្ព័ន្ធមិត្តតំបន់នេះ កំពុងជជែកគ្នា ឲ្យមានការប្រុងប្រយ័ត្ន។
ចុះផ្សាយនៅថ្ងៃ៖
ស្តាប់ - ០២:០៣
ថ្លែងទៅកាន់អ្នកកាសែត នៅក្នុងឱកាសពិព័ណ៌យន្តហោះ នៅសិង្ហបុរី លោក Kenneth Wilsbach មេបញ្ជាការកងទ័ពអាកាសអាេមរិក ប្រចាំតំបន់ប៉ាស៊ីហ្វិក បានលើកឡើងថា ការដែលចិន បានប្រកាសគោលជំហរ គាំទ្ររុស្ស៊ី នៅក្នុងសំណុំរឿងអ៊ុយក្រែន គឺវាមិនអាចធ្វើមិនឲ្យគេគិតបានទេ អំពីចេតនាអាក្រក់ ចង់កេងចំណេញណាមួយរបស់ចិន នៅពីក្រោយវិបត្តិនេះ។
លោកលើកឡើងថា គ្រាន់តែចិនបានប្រកាសគាំទ្ររុស្ស៊ី ប្រឆាំងនឹងការពង្រីកសមាជិកនៃអង្គការសម្ព័ន្ធមិត្តអូតង់ភ្លាម គឺលោកបានយកបញ្ហានេះទៅជជែកជាមួយ ប្រទេសសម្ព័ន្ធមិត្តផ្សេងទៀត ដើម្បីនៅក្នុងតំបន់ឥណ្ឌូប៉ាស៊ីហ្វិក ដើម្បីឆ្វេងយល់អំពីចេតនាពិតប្រាកដរបស់ចិន។
មេបញ្ជាការអាមេរិករូបនេះ បន្ថែមថា គេកំពុងបារម្ភ និងសង្ស័យថា ចិនអាចនឹងធ្វើសកម្មភាពអ្វីម្យ៉ាង ដើម្បីបង្កបញ្ហាដល់តំបន់ឥណ្ឌូប៉ាស៊ីហ្វិក ក្នុងខណៈពេលដែលក្រុមប្រទេសលោកខាងលិច មានអាេមរិក និងអឺរ៉ុប កំពុងតែរវល់ជាប់ដៃ ដោះស្រាយសំណុំរឿង រុស្ស៊ី-អ៊ុយក្រែន។ លោកអះអាងថា វាមិនមែនជារឿងចម្លែកទេនោះ បើចិនធ្វើសកម្មភាពបែបនេះមែន ព្រោះចិនអាចមានបំណងរករឿង ដើម្បីស្ទាបស្ទង់សាកកម្លាំង និងចង់ដឹងប្រតិកម្មរបស់សហគមន៍អន្តរជាតិ។
គួរបញ្ជាក់ថា ចិនកំពុងមានវិវាទជាមួយ ប្រទេសអាស៊ីមួយចំនួន ដូចជាម៉ាឡេស៊ី វៀតណាម ហ្វ៊ីលីពីន និង ប្រ៊ុយណេ ដោយចិនបានទាមទារគ្រប់គ្រងអធិបតេយ្យភាព លើដែនទឹកសឹងតែទាំងស្រុង នៅក្នុងតំបន់សមុទ្រចិនខាងត្បូង។ បើទោះបីសហរដ្ឋអាមេរិក មិនមានបញ្ហាជាមួយចិនក្នុងសំណុំរឿងនេះក៏ដោយ តែអាមេរិក បានចេញមុខការពារសេរីភាពនៃការធ្វើចរាចរណ៍ផ្លូវសមុទ្រ ព្រោះថាច្រកនេះជាច្រកយុទ្ធសាស្ត្រ។
បន្ថែមពីនេះទៀត ប៉ុន្មានខែមកនេះ ចិនបានដាក់សំពាធកាន់តែខ្លាំងទៅលើតៃវ៉ាន់ តាមរយៈការបញ្ជូនយន្តហោះចម្បាំទៅក្រវែល លើដែនអាកាសតៃវ៉ាន់ជាញឹកញាប់។ លោកមេបញ្ជាការ Kenneth Wilsbach បានអះអាងថា កងកម្លាំងលោកដែលឈរជើងនៅកោះហាវ៉ៃ នឹងមានតួនាទីជួរមុខគេ ក្នុងករណីចិនហ៊ានបង្កបញ្ហាផ្ទុះអាវុធនៅតំបន់អាស៊ី ប៉ាស៊ីហ្វិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ