ធនាគារសាធារណៈចិនកំរិតហិរញ្ញវត្ថុទិញវត្ថុដើមពីរុស្ស៊ី ដោយខ្លាចទណ្ឌកម្មបស្ចឹមលោក
ចិនមិនថ្កោលទោសរុស្ស៊ីនៅអង្គការសហប្រជាជាតិទេ។ ចិននិងរុស្ស៊ីត្រូវបានគេចាត់ទុកថាជាប្រទេសពីរដែលបានពង្រឹងទំនាក់ទំនងគ្នាខ្លាំង តាំងពីម៉ូស្គូក្រសោបយកតំបន់គ្រីមេរបស់អ៊ុយក្រែនកាលពីឆ្នាំ២០១៤មក។ ប៉ុន្តែនៅក្នុងបរិបទនៃសង្គ្រាមនៅអ៊ុយក្រែន បើតាមភ្នាក់ងារ Bloomberg ធនាគារសាធារណៈចិនជាច្រើន បានកំរិតការទិញវត្ថុធាតុដើមពីរុស្ស៊ី ដោយខ្លាចជាប់ទណ្ឌកម្មពីបស្ចឹមលោក។
ចុះផ្សាយនៅថ្ងៃ៖
ស្តាប់ - ០១:៥៨
ដើម្បីកំណើនសេដ្ឋកិច្ច ចិនបានបង្កើនការទិញវត្ថុធាតុដើមពីរុស្ស៊ីច្រើនណាស់ ៖ ៣០%នៃឧស្ម័ននិងប្រេងរុស្ស៊ី បានលក់ទៅឱ្យចិន។ ប៉ុន្តែដោយហេតុសង្គ្រាមនៅអ៊ុយក្រែន មាន ធនាគារសាធារណៈដ៏ធំនិងសំខាន់របស់ចិន យ៉ាងហោចណាស់ពីរ គឺ ICBC និងBank of China បានសម្រេចកំរិតហិរញ្ញវត្ថុទិញវត្ថុធាតុដើមពីរុស្ស៊ី។ នេះបើតាមភ្នាក់ងារBloomberg ចេញផ្សាយនៅថ្ងៃសៅរ៍ទី ២៦កុម្ភៈ។
បើតាមការលម្អិតរបស់ភ្នាក់ងារអាមេរិកដដែល ធនាគាររដ្ឋចិនទាំងពីរសម្រេចចិត្តដូច្នេះ ដើម្បីកុំឱ្យជាប់ឈ្មោះជាប្រទេសគាំទ្រ រុស្ស៊ីដែលចូលឈ្លានពានអ៊ុយក្រែន ដែលអាចនាំចិនរងទណ្ឌកម្មអាមេរិកនិងសម្ព័ន្ធមិត្តដែរ។ ព្រោះបើមានទណ្ឌកម្មអាមេរិកមែន ធនាគារចិនអាចនឹងលែងប្រើប្រាស់លុយដុល្លារបាន។ ICBC ជាធនាគារដែលធំជាងគេបំផុតនៅលើពិភពលោកបើគិតពីចំនួនភាគហ៊ុន។ ឯចំណែកBank of China ជាធនាគារពាណិជ្ជកម្មលេខមួយរបស់ចិន ខាងផ្នែកផ្តោះប្តូរប្រាក់។
ប៉ុន្តែធនាគារចិនធ្វើបែបនេះតែមួយសំណើតែប៉ុណ្ណោះ។ នេះបើតាមភ្នាក់ងារ Bloomberg ដដែល។
ទង្វើឈ្លានពានរបស់រុស្ស៊ីលើអ៊ុយក្រែន បានជំរុញឱ្យក្រុមប្រទេសបស្ចឹមលោកបញ្ចេញទណ្ឌកម្មជាបន្តបន្ទាប់ដាក់លើរុស្ស៊ី។ សហរដ្ឋអាមេរិក បានដាក់ទណ្ឌកម្មជាអាទិ៍ លើក្រុមហ៊ុន Gazprom និងក្រុមហ៊ុនថាមពលផ្សេងៗរុស្ស៊ី ដោយមិនអាចដកលុយពីទីផ្សារអន្តរជាតិ (លោកខាងលិច)បានទេ។ រូបលោកពូទីន ព្រមទាំងរដ្ឋមន្ត្រីការបរទេសរុស្ស៊ីផ្ទាល់តែម្តង ក៏ជាប់ទណ្ឌកម្មពីសហរដ្ឋអាមេរិក។
ត្រូវបានចាត់ទុកជាមិត្តរបស់រុស្ស៊ី និងមានជំហរនយោបាយខ្លះដូចគ្នា ចិននិងរុស្ស៊ី បានចុះកិច្ចព្រមព្រៀងលើកិច្ចសហប្រតិបត្តិការក្នុងវិស័យហិរញ្ញវត្ថុ និងថាមពលឧស្ម័ន ពេលលោកពូទីនអញ្ជើញទៅបំពេញទស្សនកិច្ចនៅក្រុងប៉េកាំងក្នុងអំឡុងពេលអូឡាំពិក។ ចិនមិនប្រាថ្នាប្រឆាំងតទល់នឹងរុស្ស៊ីទេ តែក៏មិនចង់មានឈ្មោះជាអ្នកគាំទ្រការឈ្លានពានអ៊ុយក្រែនដែរ បើទោះបីជាប៉េកាំងមិនថ្កោលទោសក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ