ក្នុងបរិបទអសន្តិសុខពិភពលោក ចិនសម្រេចដំឡើងថវិកាកងទ័ពកាន់តែច្រើន
រដ្ឋាភិបាលចិន បានប្រកាសដំឡើងថវិកា ចំណាយក្នុងវិស័យការពារជាតិ ក្នុងឆ្នាំ២០២២នេះ លើសឆ្នាំមុនដល់ទៅជាង៧%។ នេះគឺជាកម្រឹតដំឡើងដ៏ខ្ពស់ ខណៈបញ្ហាសន្តិសុខពិភពលោក កំពុងតែក្តៅគគុកខ្លាំង ជាមួយនឹងសង្គ្រាមឈ្លានពាននៅអ៊ុយក្រែន ពីសំណាក់រុស្ស៊ី។ មានការបារម្ភកាន់តែខ្លាំងឡើង អំពីបញ្ហាតៃវ៉ាន់ និងតំបន់សមុទ្រចិនខាងត្បូង ដែលចិនមានបំណងដណ្តើមកាន់កាប់។
ចុះផ្សាយនៅថ្ងៃ៖
ស្តាប់ - ០២:៣៧
នៅពេលបើកសម័យប្រជុំប្រចាំឆ្នាំ នៃសភាប្រជាមានិតចិន នៅថ្ងៃសៅរ៍ទី៥មីនា រដ្ឋមន្ត្រីហិរញ្ញវត្ថុចិនបានប្រកាសថា ថវិកាចំណាយផ្នែកកងទ័ព នឹងត្រូវដំឡើងចំនួន ៧.១% នៅក្នុងឆ្នាំ២០២២។ ពោលគឺមានចំនួនសរុប ប្រមាណ ១៤៥០ពាន់លានយាន់ ឬស្មើនឹង ២៣០ពាន់លានដុល្លារអាមេរិក។
គួរកត់សំគាល់ថា ថវិកាកងទ័ពចិន បានកើនឡើងជាលំដាប់ ដោយនៅឆ្នាំ២០១៩ បានឡើងខ្ពស់បំផុត ដល់ទៅ៧.៥% ហើយនៅឆ្នាំទៅមិញ បានឡើងចំនួន ៦.៨%។ ជាមួយនឹងកញ្ចប់ថវិកានេះ ចិនគឺជាប្រទេសធំជាងគេទី២ ដែលចំណាយច្រើនជាងគេផ្នែកកងទ័ព បន្ទាប់ពីសហរដ្ឋអាមេរិកដែលមានថវិកាចំណាយប្រមាណ ៧៤០ពាន់លានដុល្លារក្នុងឆ្នាំ២០២២។ ជាងនេះទៀត ការដំឡើងថវិកាផ្នែកកងទ័ពចិននេះ គឺវាមានលើសខ្លាំង ពីចំណូលដុលក្នុងស្រុក ដែលលោកនាយករដ្ឋមន្ត្រី លី កឺឈាំង បានព្យាករណ៍ថាមានចំនួន ប្រមាណ៥.៥% ក្នុងឆ្នាំ២០២២នេះ។
គួរបញ្ជាក់ដែរថា ការដំឡើងថវិកាកងទ័ពចិននៅពេលនេះ គឺជួនចំពេល ដែលពិភពលោកកំពុងឈានចូលដល់ដំណាល់កាលគ្រោះថ្នាក់ ផ្នែកសន្តិសុខ បន្ទាប់ពីរុស្ស៊ីបានលើកទ័ពទៅឈ្លានពានអ៊ុយក្រែន ដែលជាសម្ព័ន្ធមិត្តរបស់ក្រុមប្រទេសលោកខាងលិច។ ចិន បានបង្ហាញជំហរគាំទ្រ លោកពូទីន និងបានចូលរួមរិះគន់អាមេរិក ថាបានប្រើគោលនយោបាយបង្កបញ្ហា មិនថានៅអឺរ៉ុប ឬនៅតំបន់អាស៊ីប៉ាស៊ីហ្វិក។
ក្រោយការធ្វើសង្គ្រាមឈ្លានពានអ៊ុយក្រែន ពីសំណាក់រុស្ស៊ី ការព្រួយបារម្ភមួយទៀត កាន់តែផុសផុលឡើង នៅតំបន់អាស៊ីប៉ាស៊ីហ្វិក ទាក់ទិននឹងសំណុំរឿងតៃវ៉ាន់ ព្រមទាំងបញ្ហាសមុទ្រចិនខាងត្បូង ដែលចិនចង់ច្ប៉ាមដណ្តើមយកមកកាន់កាប់ទាំងស្រុង។ កាលពីខែកុម្ភៈកន្លងទៅ លោកប្រធានាធិបតីចិន ស៊ី ជីនពីង បានបញ្ជាទៅកាន់កងទ័ពឲ្យហ្វឹកហាត់សម ដើម្បីត្រៀមបើកការប្រយុទ្ធ និងបង្កើនសមត្ថភាពទប់ទល់ផ្នែកបច្ចេកវិទ្យាព័ត៌មានវិទ្យា។
យោងតាមលោក James Char សាស្ត្រាចារ្យជំនាញការពារជាតិ នៅសកលវិទ្យាល័យណានយ៉ាងសិង្ហបុរី គឺកងទ័ពចិន កំពុងតែប្រឹងប្រែងធ្វើទំនើបកម្ម សមត្ថភាពបច្ចេកវិទ្យា លើគ្រឿងសព្វាវុធរបស់ខ្លួនទាំងអស់ ដើម្បីឲ្យទាន់ និងអាចលើសសហរដ្ឋអាមេរិក។ កាលពីឆ្នាំមុន យោងតាមក្រសួងការពារជាតិអាេមរិក ចិនបានបង្ហោះសាកល្បង យានមួយ ប្រភេទ planeur hypersonique ដែលបានហោះជុំវិញផែនដី ក្នុងល្បឿនយ៉ាងលឿន ប្រមាណ៦០០០គីឡូម៉ែត្រ ក្នុងមួយម៉ោង។ ក្នុងពេលហោះ យាននេះបានទាំងបាញ់សាកល្បងគ្រាប់មួយថែមទៀតផង ដែលបានធ្វើឲ្យ ក្រសួងការពារជាតិអាមេរិក មានការភ្ញាក់ផ្អើល ព្រោះថាអាមេរិកមិនទាន់មានបច្ចេកវិទ្យាប្រភេទនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ