នាវាដឹកយន្តហោះចិនបើកកាត់ច្រកសមុទ្រតៃវ៉ាន់មុនជំនួបលោកបៃដិននិងលោកស៊ី
នាវាដឹកយន្តហោះរបស់ចិនមួយគ្រឿងបានបើកឆ្លងកាត់ច្រកសមុទ្រតៃវ៉ាន់នៅថ្ងៃសុក្រ ទី១៨មីនា ឆ្នាំ២០២២។ ក្រសួងការពារជាតិតៃវ៉ាន់និយាយថាហេតុការណ៍នេះបានកើតឡើងតែប៉ុន្មានម៉ោងប៉ុណ្ណោះ មុនជំនួបតាមទូរសព្ទរវាងលោកចូ បៃដិន និងលោកស៊ី ជីនពីង។
ចុះផ្សាយនៅថ្ងៃ៖
ស្តាប់ - ០២:២០
ក្នុងពេលដែលពិភពលោកកំពុងព្រួយបារម្ភខ្លាំងពីបញ្ហាអ៊ុយក្រែន ចិនបានបញ្ជូននាវាផ្ទុកយន្តហោះមួយគ្រឿងទៅកាន់ច្រកសមុទ្រតៃវ៉ាន់។ ច្រកសមុទ្រតៃវ៉ាន់ដែលជាចំណុចខណ្ឌចែករវាងចិនដីគោកនិងកោះតៃវ៉ាន់ និងជាផ្លូវទឹកអន្តរជាតិដ៏ចម្រូងចម្រាសបំផុតមួយ។
នៅក្នុងសេចក្តីថ្លែងការណ៍ផ្ញើទៅកាន់ទីភ្នាក់ងារព័ត៌មាន AFP ក្រសួងការពារជាតិតៃវ៉ាន់បញ្ជាក់ថានាវាដឹកយន្តហោះមួយគ្រឿងរបស់ចិនឈ្មោះថា Shandong បានបើកឆ្លងកាត់ច្រកសមុទ្រតៃវ៉ាន់កាលពីថ្ងៃសុក្រម្សិលមិញ។
តាមរយៈសេចក្តីថ្លែងការណ៍ដដែលនេះ ទីក្រុងតៃប៉ិបានសង្កត់ធ្ងន់ទៀតថាខ្លួនបានតាមដាននិងដឹងទាំងអស់នូវរាល់ប្រតិបត្តិការយន្តហោះចម្បាំងនិងនាវាដឹកយន្តហោះរបស់ចិននៅជុំវិញច្រកសមុទ្រតៃវ៉ាន់។ នាវាដឹកយន្តហោះចិនបានបើកកាត់ផ្លូវទឹកដ៏រស៊ើបនេះ តែប៉ុន្មានម៉ោងប៉ុណ្ណោះមុនការចាប់ផ្តើមនៃជំនួបសន្ទនាតាមទូរសព្ទរវាងលោកចូ បៃដិន និងលោកស៊ី ជីនពីង។
គួរបញ្ជាក់ថាជំនួបតាមទូរសព្ទដែលផ្តោតជាពិសេសលើបញ្ហាអ៊ុយក្រែនរវាងលោក បៃដិន ជាមួយសមភាគីចិនលោក ស៊ី បានចាប់ផ្តើមនៅថ្ងៃសុក្រម្សិលមិញនាវេលាម៉ោង ៩ព្រឹក ម៉ោងក្នុងទីក្រុងវ៉ាស៊ីនតោនឬស្មើនឹងម៉ោង ៨យប់នៅកម្ពុជា។
អ្នកវិភាគលើកឡើងថាការបរកាត់ច្រកសមុទ្រតៃវ៉ាន់ពីសំណាក់នាវាចិនមុនជំនួបរវាងលោកបៃដិននិងលោកស៊ីនេះមិនមែនជារឿងចៃដន្យឡើយ។ កាលពីចុងឆ្នាំ ២០២០ ប៉េកាំងក៏បានបញ្ជូននាវាផ្ទុកយន្តហោះទៅកាន់ច្រកសមុទ្រតៃវ៉ាន់ដែរ នៅមួយថ្ងៃក្រោយនាវាចម្បាំងអាមេរិកបើកឆ្លងកាត់ទីនោះ។ នៅក្នុងឆ្នាំ ២០១៩ ប៉ុន្មានសប្តាហ៍មុនការបោះឆ្នោតនៅតៃវ៉ាន់ នាវា Shandong របស់ចិនក៏បានបរឆ្លងកាត់ច្រកសមុទ្រតៃវ៉ាន់ដែរ។
គួរជ្រាបដែរថា រដ្ឋបាលអាមេរិករបស់លោកចូ បៃដិនបានបង្ហាញការគាំទ្រយ៉ាងខ្លាំងចំពោះទីក្រុងតៃប៉ិ។ មកទល់ពេលនេះ វ៉ាស៊ីនតោនបានអនុម័តកិច្ចព្រមព្រៀងលក់អាវុធយ៉ាងហោចណាស់ក៏ពីរដែរដល់តៃប៉ិដើម្បីគាំទ្រប្រព័ន្ធការពារដែនអាកាសនិងប្រព័ន្ធខែលការពារមីស៊ីលរបស់តៃវ៉ាន់។
ចំណាត់ការរបស់អាមេរិកខាងលើបានធ្វើឲ្យចិនខឹងក្តៅត្រចៀកជាខ្លាំង។ ចិនបាននិយាយថាទង្វើរបស់រដ្ឋបាលលោកបៃដិននេះធ្វើខូចទំនាក់អាមេរិក-ចិនខ្លាំងណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ